講起小田就不得不提黑柴; 冇黑柴既話我同小田就未必會認識.  我同小田係十幾年前係黑柴個網上討論區度認識既.

小田跑馬既年資大過我好多; 我係年青人既時候仲係不知競賽為何物; 小田未夠秤己經係細場爬係個鐵絲網上面睇跑馬.  小田當初接觸賽馬時果D馬我全部都唔識.

因為佢賭馬年資耐既關係, 小田對老牌既馴獸師有特別既偏好, 特別係魔頭.  魔頭D馬主黎黎去去都係果幾個, 佢做野既手法亦都同佢老豆既一套差唔多, 咁多年黎都冇乜點變; 係呢方面小田對魔頭有佢獨特既見解.  今時今日如果魔頭有一隻好分既馬跑出黎, 我都會第一個諗起小田, 問下佢捉唔捉到.

當年一大班朋友仔入去細場跑日馬, 冇記錯果日係睇一代馬后贏袋鼠國大賽, 果日地中海馴獸師有一隻新馬初出, 四十倍大冷門賠率一路急跌落唔夠十倍勝出.  自此以後小田就做左呢隻馬既香港區應援會會長.  後黎一齊係1702室作戰既時候, 公司要賭呢隻馬, 小田用投注寶幫公司落左注買呢隻馬之後, 自己一個人衝左入會議室關埋門睇隻馬點樣贏, 到而家我都唔知佢係因為公司果注定係佢自己銀包果張飛而咁緊張.  果隻馬叫做超級無聊.

當年係1702室另一個經典事件”周麗淇大戰屎塔肥”, 我同Cxwong一人企係房既一邊鬥嗌; 小田係當今世上少有親眼目睹呢件事件既人.

又係因為佢賭馬年資既關係, 加上小田特強既記憶力(只限賽馬題材既問題), 每逄一D有關馬圈陳年舊事既問題, 通常打個電話比小田佢都可以答到你.  佢唔單止可以答到你個問題, 有關你問緊果隻馬既其他野, 同一場馬有其他乜野馬跑, 果場馬佢買左乜, 點樣大勝(或者慘敗), 每一隻馬賠率既變動, 佢好多時都會記得.  如果講緊果時係我地前面有一D棋子, 佢可以用D棋子模擬一次果場馬點樣跑比你睇.  唔係話小田乜野關於賽馬既野都識, 但係佢己經係幾接近一本識行識走識食飯既賽馬字典.

小田係我識既第一個人, 明明一齊食晏佢就唔食, 但係四五點佢就會自己跑落街買一包大著條食當午餐.  麥記加價佢係會非常之不滿既.

當年係我屋企舉行既第二屆大屠殺盃, 半準決賽打到下半場小田用既英格蘭一度以三比一領先我用既法蘭西.  我改打全場緊迫戰術, 神奇地連入四球, 以五比三淘汰左小田.  小弟殺到入決賽對住同屋Cxwong用既黑鬼隊, 憑住安歷卡完場前四分鐘既入球以二比一擊敗左Cxwong奪得冠軍.

小田係一個藝術家; 勁鍾意畫公仔.  有機會睇下可唔可以係1702比小田發揮一下佢畫馬仔既功夫.

近年小田既力作係佢既blog; 唔記得左邊期佢提過佢既blog係yahoo頭一百個最多人睇既blog既唔知第幾位.  睇佢既blog係我同我朋友仔每日都會做既指定動作.  日日睇佢個blog就開始發現佢其他既奇技同喜好, 包括砌積木, 寫影評, 兵工廠, 亞洲星光大道等等.

小田同我既人生道路唔同, 但係有一個層面我覺得我同小田都係好相似: 我覺得我同小田既座右銘都係好似謝四哥隻馬咁: 遊戲人生.  如果小田係古代生活既一個人, 我覺得小田會係一個到處流浪既一個劍客, 四海為家, 佢會過佢自己選擇既生活, 冇人可以管到佢.  如果佢好鍾意打牌既話佢會係一個哲也咁樣既人.  小田同我一樣最好唔好結婚; 邊個唔好彩跟住小田過餘下既人生既話, 佢既生活睇黎都係會唔開心既居多.

講左咁耐, 如果你唔知道發生左乜野事, 你淨係睇我上面寫呢D野既話, 可能你會以為小田死Q左; 通常類似以上咁樣既說話都係係一D追思會上面至睇到聽到既.  你放心, 小田除非有D我都唔知既暗病, 否則佢應該有排都未死.

我寫完呢篇野之後, 特登留空左以下呢一個位, 比個機會小田對我以上既說話作出回應; 同佢己經講清楚, 無論佢寫乜都好, 佢寫既一切會不作收改, 作為呢篇野既一部份直接出街:

睇完唔知點回應, 識得笑…. :-) 都係好既, 可以睇到朋友點樣描述自己一部份既成長過程.

“超級無聊”萛係自己賭馬生涯中一匹幾重要既馬, 當日一個人入去會議室, 固然因為公司那注外, 當然仲有銀包那注哂冷. XDD, 同時亦係第一次體驗下投資大數目後既心理過程係點樣.

睇番可能會覺得那時好傻仔, 但其實冇呢D就冇今日 --- 呢D只係成長既一部份, 正如早前和朋友傾開, 我安慰佢: 有人買五位數字落巴塞隆拿VS奧沙辛拿半場主勝, 結果零比零.

關於blog的開設, 純粹俾日漸失憶的自己得閒睇番, blog某程度上係個人既野, 唔覺唔覺寫左三年, 從來沒想過會透過它來認識到朋友, 呢度集中講馬, 相信對賽馬有熱誠的人, 會較喜歡閱讀軟性的賽馬文章去啓發思維, 多過睇D講左等於冇講既貼士. 

賽馬字典唔敢當, 還看近年賽期加長, 馬匹流量快, 問番近幾年D大賽結果, 剎那間已經想唔起; 魔頭D馬有得有失, 冇可能隻隻都中到, 單係轉倉馬”奧比溫”在谷草爆一鑊, 真係一個仙都冇買到.

劍客…..想起以前有匹馬叫”劍膽琴心”, 假若做馬主改馬名, 用番呢套漫畫名賽事部唔知批唔批 ----- 「浪客劍心」XDDD (笑)

哈哈, 近年對生死已看化, 一如早前所言, touchwood講句, 儀式佛化而從簡,唔會有”破地獄”睇既. :-)

話說早兩個月, 約左Cxwong同小田出黎食晚飯, 除左聚舊之外, 亦都同佢地傾過1702裝修既事宜.  我想重新整過間屋, 邀請埋小田搬埋入黎1702, 有幾個原因:

一, 1702室既四位成員, 凱撒大帝己經榮休退出江湖不問世事, 好難請到佢再攪同馬有關既野, 但係加入埋小田既話都起碼齊集到三位當年既成員;

二, 睇開小田個blog既人, 對佢個blog最有趣既評語係: “小田個blog樣樣野都好適合普羅睇; 但係佢一寫馬既時候, 佢就好似變左做另外一個人.  唔講既話, 直情會以為係第二個人寫咁樣.”

寫blog係好個人化既一樣野, 睇一個人既blog就好似睇緊人地人生既一齣戲咁, 就算你唔識得果個人, 你睇得佢個blog多你都會好似認識左佢本人咁.  係呢個層面, 小田個blog係做得好好, D話題啱睇得黎又好有娛樂性.  問題係當佢一寫到馬既時候, 就會同埋唔跑開馬既讀者脫左節.  馬係小田生命中係好重要, 但係佢寫馬既專業程度, 我既睇法係應該放係一個佢個blog以外既地方.

三, 佢個blog始終唔係一個儲存野既地方; 好既野唔應該比佢流失, 應該比一個穏定同埋可以長住既地方比佢地好好保存, 幾時想睇番都可以即刻揾到.

我同小田有一個細細個既馬朋友圈子, 平時己經又睇開小田個blog, 又黎開1702呢度.  我同小田講: 我既意思就係小田唔好因為1702而寫多左野, 只係將佢係個blog度寫開有關馬既野, 放多一份係1702呢度.  所以對呢個圈子既觀眾們, 小田搬左黎1702呢度係對佢地黎講係冇乜分別既.  對於只係睇開1702既讀者, 我極力推薦你睇下小田賽馬既文章同思維, 佢同我同Cxwong又有一個唔同既角度, 特別係小田對大賽既賽後感, 好有參考價值.  1702主要都係比對賽馬有熱誠既人黎分享, 小田只係會放佢寫同賽馬有關既文章係呢度.  如果你睇完呢篇野對小田個blog有興趣既話, 請你直接寫電郵比小田, 睇下佢會唔會比個地址你.

歡迎小田搬入黎1702, 亦都歡迎睇1702既你, 以後請多D黎呢間新屋呢度坐坐飲杯茶傾下計.