平時我寫野, 會係腦海裏面或者係一張紙上面畫定一個藍圖, 成篇文寫到去邊度就要講到乜, 比到個讀者乜野既感覺, 要整得靚靚仔仔至會肯出街.  今日呢篇就完全冇, 而家一坐係電腦面前就一路係咁打; 我本來己經有兩三篇文準備好, 但係都要比呢篇文打尖出街先, 因為係想記低一個而家有既感覺.  我想講沙沙.

話說好幾年前, 我同朋友仔入場睇跑馬, 我係第二座看台個六樓廂房睇場馬點跑, 頂頭大熱門係一點幾倍既大B.  亞豬亞狗都係買大B贏; 大B既事業正係如日方中, 佢再贏一場一D都唔奇.  場馬跑到一半, D馬係我面前跑過, 我心裏面諗: 隻大熱門輸得.  正當個個都以為穏穏陣陣有錢收既時候, 原來有人想食大茶飯.

今時今日睇番地中海隻星球統領, 大家都知佢係幾好既直路馬, 地中海做足晒功夫去偷呢一場馬.  隻馬打晒針食晒葯, 用到頂級高手焗桑拿焗到奶汁都出埋黎之下用超級輕磅去偷呢場馬, 賭左錢都仲係勁好分.  憑住果十幾磅既優勢, 統領拍住大B走上黎, 睇馬睇左好多年既人都知道: 過梗.

就係果時, 意想不到既事發生左.  大B耳子一豎, 奮力再彈番開隻統領.  頂級高手出盡法寶都係差一條頸追唔到.

我好記得, 我身邊D朋友仔一過終點就入番晒去廂房裏面談論呢場馬佢地中乜唔中乜, 我自己一個人就企左係看台出面諗番頭先既情境.  突然之間, 我做左D我自己都意想不到既事.

我好似一個國家領導人咁, 係度拍手.  對住一條空既跑道係度拍手.

我拍手, 因為剛才我睇到既野, 我覺得係好了不起.  大B係一隻好馬, 但係年年都有連勝好多場既好馬.  但係佢今日打敗左統領係好了不起, 因為係身體, 形勢都輸左既情況下, 佢能夠反敗為勝.  佢可以反敗為勝, 因為佢有一個心, 一顆熱切既鬥心.  英文叫heart.  跑得快既馬年年都有好多; 但係一隻有無比鬥心既馬係難能可貴.

鏡頭一轉, 帶大家去兩個月前既同一個馬場.  我而家既工作攪到我唔可以入場, 但係我D朋友仔就入晒去睇亞媽打大戰沙沙.

我以前寫過一篇野有講過亞媽打, 都有收過讀者寫比我既電郵, 當中亦都有人話過唔明點解我會咁樣講亞媽打, 話點睇都係隻馬己經跑唔番.

有唔同意見唔係問題, 我亦都想講清楚, 我今日寫呢篇野唔係想話証明我當年係冇睇錯.  我錯與對唔係咁大件事, 我贏錢就大件事好多.  亞媽打當然未必夠當年贏一級賽果時咁勁, 佢贏大賽己經係好多年前既事.  隻馬睇過晒晨課明明冇問題, 駝背佬真係超級好心機, 等左咁Q耐終於比佢等到一個肯砌既機會.  等咁耐為左乜?  你話呢?

唔單止我睇到, 我D朋友仔都睇到.  我幫朋友仔同我老板買馬個戶口, 唔知點解有好Q多亞媽打既飛.  場馬跑到二百米, 亞媽打衝上黎挑戰沙沙, 贏晒形勢之下點都係過唔到沙沙.  如果當時我個寫字樓有個露台既話, 我係會走出去, 扮係馬場廂房咁樣係度拍手.  雖然係輸左錢, 但係真係好精彩.  聽SD講番佢地係馬場裏面, 有個朋友仔激到差D打爆玻璃.

大B係一隻短途馬, 沙沙係一隻中距離馬, 但係兩隻馬係好似樣.  大B一開始就連贏十幾場, 沙沙跑左幾場就己經輸左, 但係呢個唔係個point.  沙沙能夠係劣勢之下反勝亞媽打, 表現出一份無比既鬥心, 難能可貴.  係呢個時候, 我愛上左沙沙.

有時你愛上一隻馬, 唔係話因為佢幫你贏好多錢.  如果係因為贏錢而愛上一隻馬既話, 其實我係會愛上好多好屎既馬既.  我愛上沙沙, 係因為佢有一D其他好馬冇既野.

大B係一隻了不起既馬, 唔係因為佢連贏左幾多場, 或者佢幫邊個贏左幾多錢, 而係因為佢既鬥心係多年難得一見既.  佢贏到冇野好贏, 個馴獸師幫佢報D越黎越難贏既賽事,  直至上到一哩, 係連我亞媽都要記住睇呢一場馬咁矚目既情況下, 輸比一隻跑一哩好到無比既一哩王牛仔.  再跟住搭飛機去東洋, 係絶對不利既身體情況, 不利既賽事形勢跑唔啱既路程, 頂足大半條直路最後輸比兩隻跑到一絶既馬.  後來受完傷出番黎, 係身體己經唔得之下, 你係老化退化緊至同人地D後生仔跑, 係香港仲可以跑二二三三, 遠征東洋仲跑到四四五五………

完全係用個鬥心去搭夠; 難得既好馬.

睇番沙沙上季季尾初出第一場馬, 準備功夫唔夠, 戰意不明跟係馬群後面入直路, 鬼仔一放手比隻馬走, 睇隻馬係鬼仔冇幫助既情況下點樣走上黎贏.  再睇佢跑既第二場馬, 睇佢跑贏後面第二三四果幾隻馬, 第二同第四果兩隻………

話時話, 跑第三隻水公主雖然係一代正宗衰馬, 但係佢點跑到果日個第三架?  你如果果日中左水公主披既話你應該快D去還神.

我係好欣賞沙沙, 但係我唔會同錢作對.  今日沙沙我一亳子都冇買, 雖然我賽前係好睇好佢既機會.  佢今日輸, 有人會話係個地, 有人會話係增程出事.  我唔肯定係咪呢兩樣野, 但係沙沙今日輸左, 我係會怪責個馴獸師.  馴獸師既諗法係: 唔好比沙沙自己放, 自己出四隻放晒係前面包圍住沙沙, 比鬼仔用隻全無機會既馬做步速, 入直路比沙沙走甩, 等後面追唔到; 起碼個馴獸師係咁諗.

可能係馴獸師明知D主要對手全部都係後上, 又有可能佢自己都有少少驚沙沙增程唔知到唔到, 唔好比佢盡走.  但係: 我係唔同意呢個戰術.

比鬼仔做步速係一個問題.  鬼仔係佢愛徒, 功力亦都唔洗懷疑, 但係睇鬼仔跑細場就見到佢而家既缺點.  鬼仔仲係年輕, 經驗尚淺, 臨場智慧係唔夠, 要佢做一D要執生既動作係有問題.  今日就出左好大問題.  我事前都覺得, 駝背佬未必贏到呢場馬, 但係佢出三隻馬, 佢係最有可能出黎攪事既一個.  一出閘大威就走係前面, 唔比沙沙自己領放.  比大威放唔係問題, 問題係: 鬼仔依然跟足老細既指示, 走係大威前面.  對面果段走左廿二秒都唔洗.

有人會問: 我係咪想話快步速利後上? 但係咪係轉彎時拖番慢囉.

唔係.  我係想話: 我係馴獸師既話, 我會比沙沙自己放, 比人攪至算.  至多出多幾隻頂住後面D馬唔比佢地走上去攪隻主力, 但係唔好圍住沙沙.  如果隻馬係好鬥心既話, 你最好唔好揾野拍佢.  果隻係一隻畜生, 佢唔會知道隔離果D係隊友黎.  佢全程都有野拍住既話, 佢就全程都唔會放鬆, 你要佢全條直路一路打低對手, 佢就未必會頂得到最後.  大B第一次遠征東洋就係咁樣輸.

當然, 大B係短途馬, 佢自己走出黎會容易好多.  但係你睇下沙沙自己走出黎, 後面D馬追唔追到佢?  如果上次係好成功, 點解今次要改戰術唔比佢咁樣做?

仲記得好多年前, 係七笠得金網頁既前身, 我曾經有一年寫過一系列打甩比日記.  傳統既打甩比, 通常跑到去真係要跑既時候, 都會好明顯係得番一兩隻馬有好大機會.  又有一D年份, 係有好幾隻馬都係有機會, 但係主要原因其實係因為果年D馬係較為屎.  今年既打甩比, 因為沙沙今日既敗陣, 可能會攪到場馬可觀性高左好多.  今晚同幾個朋友仔初步傾過場馬, 個個既意見都唔係好同.

場馬就仲有一個月左右, 但係其實值得去諗諗佢既野己經係好多.  幾個朋友仔都提出過魔頭隻伊朗人; 上次隻馬初出, 比我既感覺係: 隻馬好長, 跑馬拉松會好D.  睇完今日佢跑, SD話佢好鐘意佢今日既表現, 點到即止.  我既感覺係: 隻馬好長, 跑馬拉松會好D.  我同意, 佢今日係點到即止, 但係我睇隻馬係黎得唔夠.  以前我寫過竹星贏打甩比, 我係揾一隻有打甩比冠軍profile既馬; 伊朗人唔係呢一種馬.  以前既打甩比冠軍無論係唔係魔頭都好, 我明知你係主力跑打甩比, 但係隻馬要強到係非主力賽事都要輕描淡寫贏到, 比到我一個皇者既感覺.  以前魔頭既何生, 問題一個, 跑熱身賽一行出黎其他D馬己經全部死開啦, 邊有伊朗人咁樣收收埋埋架?  如果魔頭做伊朗人係用唔同以前既手法, 咁我下個月打甩比我會輸錢, 但係我係唔鍾意伊朗人既準備功夫.  唔係魔頭做錯, 係隻馬唔似何生同問題一個黎得咁快.  起碼伊朗人呢兩場幫我地檔口己經贏左好多錢, 我一定唔會介意同佢對賭多一次, 除非佢打甩比前仲跑多一次比我睇到佢有進步.  要係香港地既大場贏高水準賽事, 唔理你係跑最短至最長途, 都係有一個必要既條件: 隻馬係要有一個好強既加速力.  香港以往既一D馬王, 佢係外國未必係最強既馬王, 但係佢呢個特定既條件係比到佢一個好強既殺手鐧.  伊朗人呢兩場馬比唔到我睇到佢而家有呢一樣野. 

今日跑贏沙沙果兩隻馬, 肥仔條肥龍我就應該唔會鍾意.  話晒我都仲係想像唔到肥仔贏打甩比………實在太過不可思議.  嘉士伯隻撒旦今日跑得好好, 但係跑打甩比最好唔好用冠軍啦, 雖然佢增程一定冇問題.  如果冠軍係打甩比跑駝背佬既馬就會解決好多問題, 簡單黎講可以諗少一隻, 希望佢跑駝背佬隻不敗之師啦, 咁就真係幫到好大既忙.  駝背佬既馬跑大賽我就一向都唔鍾意, 但係我唔會睇小佢.  駝背佬可以贏大賽, 但係我點睇都一定唔會係冠軍騎, 同埋點都係要有好好賠率.

沙沙跑打甩比既機會, 我既諗法都仲係覺得會同可唔可以控制到步速有好大關係.  通常打甩比會有好多馬係懷疑自己增程可能唔到, 個個都死留爛留攪到個步速偏慢.  但係亦都係因為咁, 攪到有馴獸師會諗到用D全無機會既馬放係直面攪亂檔.

我係打甩比到而家係冇一隻心水既馬, 但係就有一隻馬我係好希望佢可以係打甩比上到陣, 比我睇到隻馬可以做到乜.  嘉士伯隻公平交易係我心目中係一隻充滿期待既馬, 佢出賽兩次既表現簡直係能人所不能.  兩次我都係覺得: 你點可能係咁樣既準備功夫之下贏馬呀?  佢就係兩次都係跑幾步就贏晒.  我知, 佢要贏打甩比都仲係有好多問號, 但係佢可能係一隻怪物.  如果你有時間既話, 今年呢個打甩比之謎係超級好玩, 強烈建議你花多D時間諗下刨下呢場馬.  以前D打甩比你解得開個謎團都冇鬼用, 好難贏到錢; 今年呢個謎團如果你可以解得開既話, 我睇個獎品係會幾豐富.  比D心機啦.

今年呢幾隻年輕馬既質素相當唔錯, 加埋現有既問題一個, 豉油好, 衰小姐會係香港未來既主力.  同埋東洋同袋鼠國呢一兩年既馬相比, 香港馬既未來係充滿希望既.