話說禮拜二下晏, 碌七約左我出黎同佢好朋友有錢仔飲下午茶吹水傾馬仔; 有錢仔成日聽碌七提起我, 佢想同我見下面, 問下我佢隻馬好大碌揾司機既問題.

好大碌係團體馬; 佢個馴獸師幾年前攞到牌坐正, 玩左兩年之後我仲記得身邊朋友仔己經話對呢位馴獸師既前途唔係好睇好.  通常新既馴獸師都會有三四年蜜月期, 一開檔時手上既籌碼用得就用, 成績一定唔會好差; 過左幾年有D成績, 要開始玩野至再有馬贏, 加埋多左D新老細賞識, 老細開始有D好古怪同埋好難真係實行到既要求既時候, 果時就要睇下你有冇真功夫.  呢位馴獸師開檔咁短時間己經係長期維持住係馴獸師排行榜既中下游位置, 長遠既形勢唔係好樂觀.

既然係咁, 當好大碌上季季尾初出, 以雷霆萬鈞之勢係大外檔天馬行空咁贏左之後, 加上多得好似山高咁樣既傳媒大力吹噓, 新一季好多人都好留意好大碌既部署.

新馬季初出, 好大碌兩點幾倍頂頭大熱, 馴獸師用番佢既影子主帥, 結果入直路影子走左入box屎冇位出, 最後一百米一望空就狂衝上黎, 以勁勢衝過終點得梗頸四, 有錢仔同佢隻馬個名一樣, 輸到碌碌下.

有錢仔一見面就比左個電郵我睇, 當然係亞影子寫比佢:

“I hate making mistakes.  I thought he was big and strong enough to be able to push his way out but I did not count on the kid on XXX letting his horse shift out in front of me.  Hopefully next time we can redeem ourselves”(大意係: 我以為好大碌會可以衝到出去, 點知騎XXX個死粉樣閃出黎頂緊住我.  求下你下次揾我啦……)

唉, 早知如此何必當初呢.

有錢仔同馴獸師傾, 話想比其他人試下.  馴獸師呢D弱勢馬房, 本身就己經好難控制到D大師傅.  夠食力既馴獸師當然有自己既御用司機, D大師傅得閒見你有利用價值就過黎客串同你玩下, 你隻馬一唔得佢就大把理由唔同你合作.  鬼咩, 你咁鬼屎人地洗鬼睇你面色喎. 個馴獸師本身最熟就己經係影子, 點知又到有錢仔話要換人, 佢都好鬼煩.

話雖如此, 好大碌有咁強勁既走勢, 大家都睇到佢係乜野料.  第二朝, 馴獸師比個電話有錢仔, 話揾到新司機比佢.  原來晨課果陣, 老野走過黎問馴獸師有冇合作空間.  呢兩條友就唔係咁常合作, 好明顯老野係睇中左好大碌.  有錢仔人又冇乜野既, 佢對老野又冇乜特別壞既印象, 就係咁老野就跳左上去好大碌度.

影子見到朝頭早老野係好大碌上面, 當然識做.  佢揾番有錢仔: “唔緊要既, 咪試下囉, 老野我都好熟架, 我會話比佢聽點騎會贏.  第日如果佢唔得我隨時都可以幫你手架.”  心裏面佢應該係小晒.

你見我咁樣寫法, 故事當然仲有下文.  跑之前兩個禮拜, 老野好唔小心跌左落黎入左廠.

社會係好現實既. 第二朝係峰火台, 馴獸師係度睇緊操, 冠軍司機走過黎同馴獸師打招呼:

“Hey how you are, long time no talk………you know, we have not cooperate a lot, maybe we can work closer a bit, you know………your horse Ho Dai Look you know………it is a very good horse you know………but last time Shadow is stupid you know………and Lo Yeah break his leg now in hospital you know………I think he cannot ride Ho Dai Look you know………if you need a driver I am sure I can win Ho Dai Look for you, you know………I am champion driver I drive very well you know………”

有錢仔問碌七同我既意見, 熟悉我既朋友仔都知道我會同佢講乜啦.  睇左老野點先, 如果老野仲開得工既話, 比老野試一次先算.  老野瞓左係度都成日叫人同有錢仔保持聯絡, 叫佢記住記住留番好大碌比佢, 佢斷左隻腳都日日做住運動保持住狀態, 一出黎就可以開工.  連排位都係出老野個名.  講真, 事情發展到咁樣樣, 我都覺得好大碌今次順順利利贏馬既機會係好微.

排位日下晏, 碌七比電話我, 超級壞消息.  醫生睇過老野隻腳, 仲係未完全好番晒, 唔比佢果日開工.  其他司機又一早有晒著落.  咁點算?  馴獸師揾佢當時可以揾到佢覺得最好既選擇 ---  中國人.

唉………

我問碌七: 咁有錢仔而家點睇?

碌七: 有錢仔係自己公司度自閉緊, 情緒嚴重低落.  唔係好肯講野.

唉………

場馬都未跑, 但係影子, 老野, 冠軍, 馴獸師, 有錢仔, 碌七, 全部都己經好唔開心.  全世界都係好鬼唔開心, 我都唔知道點解會攪到咁.

跑馬日, 我當然要開工冇份入場, 碌七果日就同有錢仔落左去沙圈.  問番佢果日係沙圈發生左乜野事, 根據碌七講, 佢覺得馴獸師既壓力己經太大, 佢懷疑馴獸師患左”嚴重高估自己個人能力以及壓力下EQ及情緒失控症”.  有錢仔同團體成員一落到沙圈, 馴獸師就笑騎騎咁同佢地講, “放心, 好大碌好乖好容易騎, 中國人一定攪得掂既……”

到中國人一行出黎, 馴獸師就一路係度小佢, “你呀, 自己係司機黎就要醒目D, 你睇下你D gear(指住佢個馬鞍果set野), 點可以生晒锈架, 得閒就打理好D野嘛.  仲記唔記得果日同你講點騎好大碌架………”一隻兩倍公眾大熱門馬, 我都唔明點解會攪到咁.  最慘既係: 好大碌係一隻團體馬, 幾年內唔可以換馴獸師.

之前有同碌七傾起好大碌呢隻馬點樣黎.  原來當初有呢隻馬係手上既馴獸師唔止一個, 仲有杏仁.  點解會兩個馴獸師都有呢隻馬我就唔知, 碌七聽有錢仔講話本來既計劃係一個賣隻馬過黎, 另一個就出買家, 一人出一半, 錢就齊齊袋.  但係碌七話, 馴獸師後尾起左杏仁尾腳.  明知有錢仔係識得杏仁都唔比面杏仁, 用埋自己個團體牌照, 唔預杏仁一份, 咁有錢仔果班人又可以平D, 馴獸師自己又可以袋多D.  當然杏仁就冇野落袋.  有錢仔都話, 杏仁因為呢件事同馴獸師反晒面, 攪到有錢仔都唔好意思, 黎緊都同杏仁買番一隻馬放係佢度攪番好D關係.

場馬其實就冇乜野特別, 中國人係冇乜做錯野之下跑左個冇威脅性既第二.  算係咁啦, 我諗中國人自己都知道佢唔會有機會再騎好大碌, 盡左力就得.  有錢仔又輸到碌碌下.

故事本來寫到呢度就算, 但係頭先講起杏仁, 碌七又同我八左一個同杏仁有關既故仔, 講埋先.

話說碌七有一晚出席唔知乜鬼晚飯活動, 同枱有好多好有錢而佢又唔識既人. 佢同坐佢隔離果個人交換卡片(但係唔知點解咁都冇睇清楚人地既大名, 人地咁出名但係佢又居然冇聽過).  傾傾下發覺人地原來以前同而家都有養過馬玩過馬仔, 即刻精神晒.

碌七: 我公司係歐洲背景既投資公司, 得閒就攪下收購同上市之類.  你做乜野架?

人地: 哦, 我地呢D公司仔乜都有攪下, 多數都係貿易果方面, 我都係幫人打理架啫………

真係超級客氣.  人地係商界係超級有名既大紅人, 大董個董事總經理呀老友.  人地玩馬己經好多年, 以前隻馬放係地中海度, 我冇記錯既話佢隻馬係贏細場最後一次得三隻馬跑既賽事.  碌七唔記得人地係乜水, 但係就好記得佢中果場馬條三重彩.  隻馬係好好馬但係無啦啦係屋企自己食報紙食到閉塞死左.  人地而家己經冇自己養馬, 只係有玩下團體馬, 佢同埋其他人夾份養左一隻雞係杏仁度, 佢都只係當比個面D朋友仔.

碌七一知道佢有分養馬, 即刻問人地隻雞既野, 點知一講起隻雞同杏仁, 人地就小小聲.

人地一向都覺得杏仁冇乜野, 咁以前佢養馬係地中海既時候己經識得佢.  上次隻雞有份跑, 朋友叫左好多次入場佢都冇去過, 死死氣去一次啦.  隻雞又衰D既, 跑幾十次得贏過一次, 其他D近都未近過, 養馬養到一隻咁既衰馬其實都好無癮.

落到沙圈, 杏仁又係講果一句: “唔洗買.”  大佬, 次次都係講呢句架?  有團體成員出聲: “喂, 得十隻馬跑, 好似冇乜步速喎, 叫巫師放返黎, 頂到幾多咪幾多囉.  有獎金都好嘛.” 

杏仁即刻加把口: “我睇隻雞未必夠速度放得出, 唔洗買.”

D馬出沙圈, 人地同其他成員行番上沙圈.  人地諗住買少少例飛當支持一下, 當然佢既例飛己經係正常人既好大條飛啦.  佢行入去佢去開既高額投注區果一格, 正諗住畫飛之際, 突然見到杏仁由遠方狂衝入黎同佢講:

“記住唔好買咁大呀, 冇機會架.  記住呀.”

唉, 比著我聽到呢D野, 己經應該醒水買大D啦.  人地可能好人過頭, 本來諗住買兩萬W披幾千Q; 聽到杏仁咁講就全部買少一個零.  仲要攪到因為咁, 高額投注區唔受得佢D飛, 佢要行番出去公眾果度同人地排隊至買到.

隻雞廿八倍一放到底, 條Q冷到飛天.  人地同其他D成員拉頭馬既時候燶晒, 人地中W披Q但係全部買少左一個零, 有D其他既成員連例飛都冇買到.

好耐以前仲係小田度寫野既時候, 我仲記得寫過碌七撞到亞東既故仔; 果時碌七既結論係: 亞東係一個壞人.

今次碌七同我講完呢個故仔, 碌七既結論係: 杏仁都係一個壞人.