話說跑完收鑼日尾場, 我就即刻衝去碼頭搭船返屋企; 要趕返屋企收拾行李準備聽日一早搭飛機.

查實之前都有朋友仔問過我, 暑假咁長冇馬跑會有乜野攪, 定係留係濠江做兩個月職業廿一點玩家.  我又唔係玩特登唔講比朋友知我己經安排好暑假既計劃, 但係因為流感既關係, 我一路都將個計劃hold住左, 雖然一路繼續做準備功夫但係知道既人係好少.  費事講晒比人地聽跟住因為流感既情況而取消左, 咁就會好冇引.

其實雖然我對跑馬係好有熱誠, 但係去到季尾點都有少少想休息一下停一停既感覺.  身邊有D馬迷朋友就話己經跑到冇晒心機, 我就未至於咁.  跑馬始終係我既收入來源, 係今時今日咁既環境之下, 梗係揾多一個錢袋係荷包好D啦.  但係我又覺得今年呢一個暑假係特別寶貴; 而家睇黎出年開始跑多五日馬既機會係好大, 但係計日子馬季又唔係會長左好多, 即係話年中果D冇週中跑馬既日子會少得好緊要, 仲要加埋出年踢大波添.  點睇都係黎緊以後既馬季會長過而家, 所以今個暑假我想做一D特別既野.

諗返轉頭, 由四月中開始就己經開始準備既計劃; 第一樣要放棄既野就係我心愛既廿一點.  我雖然有經常玩廿一點, 但係廿一點始終唔係我最主要既收入來源.  人地職業團隊有晒資源同人力物力同賭場打持久戰, 我自問只係有多餘空閒既時間至可以去同佢地死過, margin唔高既遊戲唔會比到我好高既收入.

以前寫過一篇劣作叫”誰天真”, 提過師父敎落: 男人做所有野既終極目的, 其實得兩個: 錢, 同埋囡.  今次我真係放棄左廿一點做一D又唔係為錢又唔係為囡既野.  你可以話我係想還自己既一個心願, 一個一向都想做既心願.

講左咁耐, 咁其實係會攪乜?

有一個讀者至心水清, 當然佢係誤打誤撞但係唔覺意比佢撞中左.  無啦啦寫個email黎問我:

“喂, 做乜近排一日到黑都係度播東洋歌呀? 乜你諗住去果邊住咩?”

講起讀外語, 我就會即刻諗起兩個人:

第一個叫黃桂林, “三個月學好外語……”  間公司都執鬼左, 係咪即係話三個月冇可能學好外語呢?  查實我由開始準備到出發, 得兩個半月.  有冇可能會學得到呢?

第二個係我老友, 鯪魚球馬主.  佢係太子爺大家一向都知, 從來都未試過打工, 自己想做乜就做乜.  佢多年前都試過走左去東洋住一段時間, 大約五個月左右.  我問過佢係果邊讀書讀成點, 佢話到返黎都只係識得講すみません、分かりません(對唔住, 我唔知你講乜).  唉, 冇鬼用.

事實証明, 唔係話你去左一個國家一排, 你就一定會學得好人地果個語言既.  我以前去楓葉國讀書, 都見過有D同學仔讀左幾年書都係唔識講鬼話.  鬼咩, 果時仲係移民潮, 成個班房裏面鬼死咁多香港人, 你淨係同香港人玩既話又真係唔洗講鬼話架喎.  其實係睇你自己想唔想學好一樣野.

係呢個準備過程當中, 我有一樣野係冇做到既: 我冇去上堂讀書, 冇去請敎師.  去讀果D乜鬼高中低級班我己經唔夠時間, 我比自己既目標係要係出發前講到基本既會語, 同埋我唔洗學識晒成個語言既所有野, 特別係我唔想學寫.  但係一定要做到聽同埋講, 因為呢兩樣野會係暑假經常要用到.  我有諗過請一個先生黎每個禮拜同我講一兩個鐘之類, 但係都係放棄左.  都係費事比錢人地洗; 反正真係去到之後會有大把人唔洗比錢佢佢都會一日到黑同你係咁講.

由於自己一路以黎刨東洋馬經既關係, 對最基本既平假名片假名己經有少少基礎.  我自己係網上面揾到一D唔洗錢既課程, 自己編好一個時間表(正確D講, 應該係一個timeline, 即係話睇住自己出發既時候想學好晒D乜野, 跟住就計番轉頭, 去到邊一日就要讀到去邊一課).  好彩自己既工作雖然唔算好輕鬆, 但係安排時間上除左跑馬日之外就係完全係自由咁編排既, 所以可以比到自己一個靈活性咁去讀書.  話雖如此, 我知道如果一跟唔上個時間表既步速, 自己幫自己定落黎既目標就會逹唔到, 所以逼自己一定要跟到個步速.

個步速有幾快?  跑馬日唔計, 係所有非跑馬日, 每日要讀四至六個鐘左右.  其實一開始既時候係辛苦既.

讀既內容主要有兩個部份: 一半時間係文法grammar, 呢一部份會好D.  一開始好多野唔明, 但係一明左就唔係好難.  另一半時間就係讀生字.  生字一定要識得夠多至會容易表逹到自己想講乜.  呢部份一開始既時候係想死.

如果真係日日咁樣讀一D自己完全唔知係乜野既生字, 我知道會有一個危機: 因為冇辦法有一個清晰既中途目標, 所以自己會去唔到最終既目標.  情況就等於我要跑一個馬拉松, 如果沿途係冇人話比我知我跑左幾耐, 自己離開個終點有幾遠既話, 我係好有可能會係中途頂唔順放棄左.  但係如果我可以一路睇住我跑左幾耐, 有人提醒我自己己經跑左幾份之幾, 只要頂多幾耐就可以去到終點既話, 咁我跑完全程既機會就會大為提高.

咁我呢D中途站要點整呢? 係D乜野黎呢?  我點知我學左既生字係有用呢?

全靠我濠江屋企架電視機.

我濠江屋企架電視收唔到東洋電視台.  但係其實收到都冇用; 人地講大堆說話裏面, 你聽得出一兩個生字但係都係唔知人地想講乜既話, 咁係冇用既.

架電視最幫到手既係佢收到一個寶島電視台.  呢個電視台一日到黑都係播佢係東洋買番黎既電視節目, 同埋全部係加晒中文字幕.  由四月中開始, 我就唔再比自己睇香港電視同新聞, 總之自己係屋企, 無論做緊野定係睇電視休息都一定係開住呢個台.  唔係睇緊都要係聽緊.

漸漸地, 自己每日學到既新既生字就見到係D電視節目裏面出現.  因為有字幕, 明白同睇到晒人地係點樣用D字黎表逹, 幫到自己記生字之餘, 又可以學到一D平時網上課程學唔到既野.  同頭先講鯪魚球馬主個情況一樣, 我知道有一個環境都唔一定可以學好一個語言.  最重要既一樣元素, 就係食神講果一樣野:

“心”

有時有一D野唔明, 就MSN電子麒麟問佢點解.  電子麒麟係果邊住過幾年, 我果D問題難唔到佢.  有一次同佢傾開我讀成點:

麒麟: do you know how to write all the 50 words of hiragana and katagana?

我: もちろん

麒麟: べりーグッド

我: いいえ、それほどでも

同我果兩個東洋朋友仔肥田同青頭仔電郵來往, 簡單既幾句對話而家都可以叫做寫到出黎, 佢地睇完都係話我算學得好快, 唔錯.

都總算有少少成績做到出黎.  去到呢個課程既終結, 整體黎講我覺得我係做到左我想做既野, 但係始終係冇機會同人地講好多, 而家好明顯係聽好過講.  冇辦法, 去到果邊講番多D, 唔好怕講錯, 面皮厚D多D放膽講, 希望會學得快D.

以前去過東洋大大話話有幾十次, 唔係去跑馬就係去玩, 頂多係玩加少少做野.  今次就完全唔同, 當然係有少少玩, 但係我最主要係想學好人地既語言, 仲有人地既文化.  以前次次去親都係幾日至一個禮拜, 時間當然係非常之寶貴, 所以睇既野唔會係太多.  今次一去就成個暑假, 到開鑼日至會返黎; 係呢兩個月裏面我想去多D以前冇去過既地方, 遠一D都得, 自己一個人坐車去到邊就睇到邊, 可以睇下人地國家既歷史同文化, 真正做到一個體驗生活既旅程.

放心, 我唔會唔記得左1702既.  係果邊既全程我都會有電腦(其實我都仲係要幫老板做野架).  之前想出既文, 一口氣係呢幾個禮拜己經出晒.  可能係黎緊呢段時間出文係會少左, 但係己經裝修好新既版面, 我會用相同埋片係1702記低我睇到見到既野.  肥田同青頭仔己經約好左我去新潟同札幌睇跑馬, 兩個馬場連佢地都係第一次去, 真係熱切期待.  有興趣睇我既電波少年旅程既朋友仔記住暑假得閒就上黎睇下野.