話說仲有十七分鐘跑馬拉松, 我同SD係MSN度講: 我地有個客想買問題獨贏四百五十蚊.  因為我地個網上投注唔會接受咁大額既投注, 佢一定要比電話我地, 我地同意左之後用密碼改左佢個戶口佢至可以買得咁大.

SD: icic……but will you take on……or kick out?

我: probably keep a small portion, then use a big portion to lower the odds on the tote, boss will decide

自己幫左老板攪檔口一段日子, 覺得自己係控制風險管理方面係日漸成熟.  以前啱啱開始幫老板手既時候成日都係想靠賭馬賭中邊隻會贏黎交功課比老板, 而家係越黎越注意到底一隻馬抵唔抵賭, 多過估佢究竟會贏定係輸.  馬拉松呢場馬係一個好好既例子.

其實係之前果晚, 己經係MSN同SD傾過呢一場馬; SD面對既問題就係佢係七粒得金究竟應該貼邊隻好.  同佢之前傾開, 佢話佢覺得去到臨場, 問題會大熱; 我就話我覺得何生會大熱, 但係我亦都同佢講, 我係估賠率方面係好差既, 好多時熱門既馬, 我都完全唔明白佢點解會係大熱門.  跑之前果晚, 問題係大熱門2.1倍左右, SD話佢開始想貼何生.  我完全同意.

問題肯定係有機會既馬, 但係唔係兩倍馬.

我睇過我老板比佢地既評分, 我老板同我既意見都係一樣: 問題計實力係好過何生少少, 但係只係少少.  問題係好好既馬, 但係部署上佢係棋差一著, 同埋你一定要防一防個馴獸師佢其實係想點.  呢場唔係一場問題一定要贏既馬.

當然, 呢場亦都唔係何生一定要贏既一場馬.  但係係何生連續幾場近而不勝之後, 坊間似乎係多左好多人覺得何生係玩完既時候, 覺得呢場係問題由何生手上接棒既時候.  我唔係好知會唔會係咁, 因為評分上, 何生唔會差過問題好多, 何生上一場係跑得好好, 輸比一隻可能係現今果個路程世界上最好既馬仲可以點.  問題幾好都唔可以話佢一定會贏何生, 除非你係想賭何生會開始落.  我同意何生遲早會落, 但係佢一個月前都仲係好勁.

我係十七分鐘同SD既對話, 其實係一個比起賭馬高層次D既做法黎, 強烈建議大家當睇故仔算, 唔好諗你可以攞到D乜野思維可以第日賭馬既時候用.  呢個動作只係我地做檔口至會做到.

個思維係: 我覺唔覺得呢隻馬贏得, 己經唔係最重要; 最重要既係, 係某一個賠率之中, 某一隻馬抵唔抵賭.  我地作為檔口, 如果一隻馬佢既fair odds 係三倍, 咁如果佢係電算機既賠率係四倍既話, 我地係好唔想去受佢, 我地會想賭.  但係如果隻馬變左做兩倍既話, 我地就突然會變為好唔想去賭佢, 好想受佢多D.   注意: 係呢個故仔裏面, 我對呢隻馬贏唔贏得出既睇法係完全冇改變過既; 你亦都可以話, 只要我將以上既動作execute得好既話, 隻馬最後贏唔贏己經再唔重要.  理論就好簡單, 大部份人都一定會明白, 但係同埋普羅賭馬既做法係完全唔同.  你唔會本來想買一隻馬, 點知佢一路落飛, 落到你改為好想佢輸.  因為你都己經買左佢贏, 你頂多只係唔高興佢如果跑出黎你係會比起原先既估計收少左錢.  賭仔從來都唔會覺得”我賭呢隻馬贏唔贏己經唔再重要”.  你試下咁樣同人地講既話人地會以為你痴左線.

“五分鐘, 我幫公司出左一注大飛比馬會, 我好想問題輸.”

你比自己諗下, 你明唔明白我點解會做以上呢一個動作.  仲係唔明既話歡迎你寫電郵比我.  我一出左條飛, SD即刻MSN我: “your ticket la”.  係.  問題由2.6倍跌左落去兩倍正.

場馬跑完, 世界仔問我點解問題D飛數會咁樣改變.

五分鐘呢注飛, 其實有幾個意義:

第一, 佢最直接咁減低左我地係問題呢隻馬上面既風險.  我地只要將百幾蚊既飛比馬會, 佢既賠率就會跌到落去一個我地好願意去受佢既水平度.  雖然如果呢場馬唔係賭錢, 只係大家係度估邊個會先過終點既話, 我都仲係估係問題會首先過終點.

第二, 我地想鼓勵其他人買番多D其他既馬.

第三, 我點解要五分鐘就比飛馬會呢?  我連打呢注飛比對面既折扣都唔要, 而係特登打比馬會.  你一定要睇得出, 我係好想出面個個都睇到呢條飛.  其中一個原因係: 我其實係想打百幾蚊落馬會, 但係希望有人跟我地既飛, 等我地唔洗用百幾蚊就做到百幾蚊既效果.  另一個原因係: 特別係專業或者集團式賭馬果個層面, 佢地係用回報率既角度去賭馬既.  如果佢賭左問題, 但係問題落飛既話, 佢就一定要補番多D飛落去問題度至可以保持番佢本來想有既回報率.  落飛越多就越補得勁.  呢個亦都係雪球效應產生既最大原因.

呢個做法係比起賭馬高層次, 因為我己經唔係係度賭馬.  我唔係想賭邊隻馬先過終點; 我只係係度控制緊電算機個賠率, 從而控制到我地係呢場馬上面既風險.  對何生同問題跑成點, 大家會有自己既睇法, 我唔打算係呢度講.  場馬一跑完, 我第一個感覺係: 為豉油行同個騎師鼓掌.  跑得好精彩; 唔係因為佢跑贏左問題等我地賺多左好多, 係因為係唔夠跑之下佢跑左一場好精彩既賽事,  咁樣輸真係無話可說.

去到尾場, 我地既注意力係晒牛仔度, 當時佢6.9倍.  一過完關之後, 我係MSN話晒比所有友好老友記: “6會落飛”. 

SD: I don’t bet 牛仔……so it is good

黑柴: 咁緊要?

牛仔既飛係好Q多, 最主要既原因係纜, 亦即係D人買過關連中幾關落左去佢果度.  牛仔我地唔睇好, 飛係好多所以一定會走好多.  係正常既情況下, 我地只要好似頭先問題果場咁既做法, 打番一D飛落電算機度就可以控制到個風險.  但係經濟唔好, 我老板又想出少少古惑賺多少少錢, 我地就諗計仔做一個較為高難度既動作.

我地係仲有成十二分鐘既時候, 打兩注大飛出去, 一注比對面S記, 一注比馬會.  同一時間, 我地係網頁受牛仔只係比客仔用低折扣賭牛仔, 正常折扣取消.

一打左注飛, 黑柴就走出黎:

黑柴: 得番45蚊.

查實牛仔既飛係多但係我地係絶對應付到, 我地係唔鐘意佢所以至買佢買到咁大.  我地開得檔口, 根本就成日都有D客仔過幾關落到尾場有一隻馬有好Q多飛呢D情況出現.  如果我地係睇好果隻馬既話, 係一定唔會咁樣出飛既.  我地呢兩注將我地手上既飛打晒出去, 就係想市場裏面D檔口將佢地手上既牛仔過關飛用低折頭比晒我地.

檔口當時手上個個都有大量既牛仔飛.  有好多唔係個問題, 打番一D出去比同行或者比我地咪得囉.  但係無啦啦我地唔再用正常折扣受牛仔, 跟住S記放風出黎話我地勁賭牛仔, 大部份既檔口會比起正常既時間早少少走咁一D牛仔.

問題就黎嘞.  個個檔口一齊攞起個電話打比同行想走牛仔, 但係一攞起個電話, 對面第一句就話: “牛仔唔要”.  佢地而家至發覺: 原來個個手上都係有好Q多牛仔.

佢地得番兩個選擇: 一, 用低折扣打晒比我地; 二, 一野打晒比馬會.  中晒我地計, 我地就係想佢地幫手出錢打低牛仔個賠率, 等我地唔洗用我地自己既錢去做呢個動作.

睇到呢度, 你可能會問: 喂, 等陣, 我好唔明.  如果牛仔個賠率係會落得好勁既話, 咁其實個檔口既風險都係越黎越低架喎, 咁如果佢乜都唔做咁咪就得囉?

全對, 如果個個檔口都係咁理性咁處理牛仔既話, 我地個計劃係唔會成功既, 但係我地都好有信心D檔口會比晒D飛我地或者馬會.  查實絶大部份既檔口係唔識馬既, 佢根本就唔知牛仔既機會係好唔好.  但係佢驚既一樣野係: 佢想走咁一D牛仔既時候佢冇辦法走得到.  所以當市場個個都唔要牛仔既時候, 佢地都會想唔要牛仔.  我地其實只係係檔口市場裏面做左一個股災出黎, 當股災出現既時候, 股民做既野係唔理性既, 佢只係想不計成本盡快離場.  如果個個檔口都識得計馬既話, 可能我地既計劃係會失敗既.

六分鐘, 黑柴又走出黎:

黑柴: 得番廿幾蚊

我: he he he he ………

我地一早將手上既牛仔打晒出去, 而家又係咁收番晒個個比我地既牛仔, 但係我地好樂意受多D: 有人幫手打低左個賠率, 我地又可以低折扣受牛仔, 同埋我地其實由頭到尾都唔鐘意佢既機會.

由一開始攪1702, 寫過下我地會賭我地唔鐘意既馬既故仔, 一直以黎都有讀者寫電郵比我問關於呢方面既問題.  要解答唔係咁容易, 反正odds theory係一個好難既科目, 我都成日仲係係度學緊野.  啱啱呢一個賽日就有呢兩個好經典既例子, 建議有興趣既朋友仔, 睇番呢兩場馬, 睇番愚弟另外兩篇劣作”燈神”同埋”心如刀割”.  真飛同假飛係好唔同既, 如果你有一日可以睇得出, 有乜野飛係想你跟, 有乜野飛係唔想你跟, 咁你既贏面己經比起正常既賭仔高出好多.