話說禮拜三晚跑到尾場, 我係度諗緊點樣可以係一個完全失敗既賽日裏面絶地反擊成功.

全晚主要既心水馬有兩隻.  第六場D馬一過終點之後, 老友記黑柴係MSN度出現(佢出現前我冇同佢傾過計, 我唔知佢買乜野架):

黑柴: 我都好少小騎師, 但係呢場神父都輸得好肉酸下

我:  我都買左N位數………XXX, 唔知跑乜馬

黑柴: 好明顯佢呢場唔要

我: 可能魔頭真係季尾唔應該再跟, 佢地果邊今季夠晒

黑柴: 買呢隻之前我都唔信, 輸埋呢隻真係冇得唔信

我: 冇野講

榜尾係圈中算係一個好人, 憎佢既人唔係咁多.  近年佢身體唔係咁好, 成績己經大不如前, 大家都知道榜尾己經開始倒數緊自己做馴獸師既日子.  難得既係佢冇採取放棄態度, 係好有限既彈藥之下, 依然盡力希望可以去到安全線.  今晚佢個倉都可以話係精英盡出, 我睇係佢個倉裏面可能係季尾之前有可能贏到馬既馬佢都攞晒出黎搏, 無論得唔得我都好欣賞佢呢份精神.

欣賞還欣賞, 賭錢還賭錢.  全世界都知你想點, 你又唔係叻既時候, 人家就會用盡呢個可以利用你既機會.  我玩呢個遊戲玩左咁多年, 每逢呢D弱勢倉咁樣走出黎搏命既時候, 我就會揾有乜野友仔會走出來開餐.  話明係榜尾, 要打贏佢唔係咁難.  榜尾呢幾隻馬根本評分上己經好盡, 佢過份熱門既話係一D都唔值.  你知佢一定砌唔表示佢所以就買得過.

Make sense賭得過既馬, 照計唔係神父就係肥龍.  兩隻馬係呢個路程有晒根據, 隻肥龍仲要好好分添, 好分到我有少少驚佢會唔會好分過頭.  神父個隔夜飛我好鐘意, 現場我有少少覺得熱過頭, 但係榜尾係冇我想像中咁熱.

黑柴講完之後, 又到世界仔走出黎:

世界仔: XXXX, why don’t  he take the leading position when release the horse up front at the opposite side? ………

哈哈, 不愧係我半個徒弟仔.  原來佢買肥龍補神父.  仲唔小死.

黑柴同世界仔冇錯, 事實上你睇番榜尾要跑到咁樣至贏到一條毛, 我覺得我事前既睇法係冇錯.  賭馬年紀有番咁上下既賭仔, 個個都一定試過買左一隻唔肯砌既馬.  買落去既係自己既血汗錢, 見到隻馬跑到咁, 慶係好理所當然.  公仔箱同網上討論區會有好多人走出黎小神父或者個馴獸師, 我唔會.  馴獸師同埋神父都係人; 換著你係佢, 你都唔會場場砌.  你試下攞晒D馬出黎場場砌到盡睇下會點?  好快趣你就會比人睇住黎食.  連費爵爺紅魔鬼都唔會場場砌啦, 有乜咁奇?  唔通佢唔想贏咩?  就係因為佢想贏, 所以佢至唔會場場砌.

又或者會有人走出黎小馬會, 小班董事, 話佢地做乜唔睇得緊D, 問多D, 罰多D; 我唔會.  又係果句: 換著你係佢, 你可以點?  你睇番賽後報告, 你話佢睇唔睇到神父攪乜鬼?  就等如經濟唔好, 大把友仔走出黎小政府同小特首, 但係換著你係特首你會做得衰過佢幾多倍?  其實經濟好唔好同特首做得好唔好有幾大既關係呢?

早兩個禮拜同一個朋友講起賭馬同賭股市類似既地方.  我話:

“我做既工作, 其實同一個基金經理係好類似.  我要賭一隻股票, 我一定要對呢間公司既業務有充份既了解, 呢個固然係最重要既地方.  但係唔係話間公司好就賭得, 我計好晒果D乜鬼P/E ratio之後, 我係賭佢之前我仲要睇下出面條大鱷, 其實佢係想個市上定係落.  兩樣野係互相配合既, 大鱷係一個necessary condition, 但係唔係一個sufficient condition.  你唔可以因為條大鱷買佢上而跟佢買上, 唔好因為條大鱷而放棄左個基本.  一定要兩樣野都睇.  但係你又要記住一定要睇埋條大鱷想點, 你唔睇住佢既話佢係有可能會整死你.”

大部份既馬迷, 當佢買左一隻唔砌既馬之後, 佢只會怪其他人.  其實年中亦都有好多其他既日子, 佢買既馬贏左係因為有其他有實力既馬唔砌而比佢買左果隻贏左既, 當然佢就唔會計果D日子.  我買左一隻唔砌既買, 我只會怪自己.  我會因為咁而唔開心, 我會返去做番功課, 睇番自己點解睇唔出呢隻馬有呢一個弱點, 睇下將來點樣可以做好D.  講就容易, 做就難; 但係都係要盡力去做.

輸埋第七場, 我真係覺得今晚係一個完全冇運既日子; 我買果隻馬轉彎亞鬼仔跌鬼左落黎, 雖然佢唔跌落黎我睇我都唔會有錢收.  希望鬼仔冇事啦.  跑左七場, 我一毫子都未收過; 好似09年都未試過有一日衰到咁.

劉華同我傾開計, 佢話:

劉華:  jockey dropped + late start, u r very dark tonight wor.  Better have a rest lar.

我唔係扮洛奇, 但係我好有型咁答左佢:

我: I won’t give up, still one race.  Never give up.

唔係話唔信運氣, 但係賭馬係我既職業, 我要做到係應該賭既時候就賭, 唔應該賭既時候就唔應該賭.  乜野係”應該賭既時候”? 

Cxwong就會咁樣答你: “當你係呢個賭戲裏面有優勢既時候.”

係賭馬黎講, 乜野係賭仔有優勢既時候?  當有抵賭既馬既時候.  呢樣野同你之前係贏緊定輸緊, 你今日有冇收過錢係完全冇關係.

榜尾第六場果隻都只係贏一條毛, 佢尾場呢隻走出黎孭飛, 仲唔賭等幾時?  我第二隻心水就係係尾場.

駝背佬呢隻馬佢都算好好心機, 一隻咁好既馬佢居然成大半季都唔郁手, 跑番佢最首本既路程排到個一檔.  有左頭先神父既教訓, 我就更加鐘意潮汕既機會.  第五場隻龍舟同潮汕既情況幾乎係一模一樣: 兩隻都係今年駝背佬好比心機去收收埋埋左好耐, 去到而家近季尾配合番個倉既攻勢至攞番出黎跑番自己既強項, 同埋同場有隻實力唔強既大熱門係度幫手; 我都有少少慶自己冇買到龍舟.  咁好賠率駝背佬應該會肯郁手掛?  佢真係唔砌我冇佢乎, 但係呢個賠率我覺得點都要賭, 我睇駝背佬一定會流晒口水.

第一個打擊過完關冇幾耐就黎.  鬼仔跌完落黎唔騎得, 隻作曲家冇人騎退出左, 少咁一隻馬幫手.  喂大佬我要追數呀, 唔好再比潮汕落飛啦.

第二個打擊九分鐘黎.  我啱啱計好晒諗住賭幾多之後, 老板係耳筒度揾我, 我聽完差D暈左:

“你今晚都辛苦晒, 公司都係想賭潮汕, 不如你今晚休息一下, 週末你至再賭過.  尾場公司會賭得幾大, 要小心唔好比人跟到”

好彩老板係另一個國家, 唔係我真係會控制唔到自己走去佢面前同佢講: 我頂你個肺.  今晚注定certified.  冇得追, 激死.  但係又係果句, 一切要以大局為重, 公司贏即係自己贏, 做好自己既工作先.  己經係尾場, 賭完就大家一齊返屋企瞓覺, 希望大家唔會怪我呢場兇狠少少啦.  我決定呢場狼少少, 一D都唔比人地跟.  同所有手足講好: 大機裏面潮汕既飛, 完全唔好比對面, 我要最後一刻比晒馬會.  如果冇雪球效應既話, 我希望可以有五十五至六十蚊開跑.

同所有手足講好晒點樣做; 因為主力係比飛馬會, 直情調多兩個囡囡過黎幫手打比馬會.

呢度有一個動作係大家係屋企千祈唔好試.  如果你用電話投注, 一注飛如果到左某一個數目既話, 個電話投注馬會囡囡就唔可以即刻幫你落呢條飛.  佢要揾一個supervisor之類既人過黎reconfirm一次條飛幾多錢至可以落到.  由於我地做果樣野係爭分奪秒既, 你hold我幾十秒係可能會死人冇命賠, 我要安排好多個囡囡一齊用唔同既戶口一齊落同一條飛, 每條都係唔過果個數目.  我同每個人講清楚要點樣做, 一定唔可以出錯.  同埋你要記住, 我地檔口去到最後一分鐘都仲係開緊門做生意, 最後真係要打幾多飛出去係唔知既, 所以我要做好多準備功夫.  不過我同班囡囡當然唔係第一次做呢個動作, 大家都知道要點樣做, 我只係想保証唔好有人出錯啫.

準備入閘, 我再睇一次大機既飛, 好彩連埋我地要買既飛都唔算好多.  入左兩隻馬, 我比一個手勢, 班囡囡一齊做野.  臨開閘前全部比手勢我話OK晒.  出閘……

轉彎入直路, 潮汕己經咬住榜尾, 班伙記有D幫潮汕打氣, 隻馬一出頭班囡囡一齊歡呼.  好彩一切順利.  我除左尾場幫自己個荷包買番少少之外, 全日埋單自己幫公司賭輸鑊甘; 公司尾場之前係小勝, 尾場之後就大勝.

放工落街買宵夜拎番屋企食, 等緊攞野既時候, 食緊野有一枱有條友係度同佢班朋友仔講: “尾場果隻野都離晒譜, 我睇住佢架, 入緊閘都係有七倍幾一路都唔郁, 一出閘就得番五倍, 你話有冇攪錯……”

我差D想走過去同佢講: “喂老友, 其實你有冇諗過, 可能買果條友仔都係好Q痛架?”

拎住宵夜行緊番屋企, 忽然好想約朋友仔去唱K.. 我想唱學友隻心如刀割.  大佬, 真係越諗越痛.

“……我是真的為你……哭啦…….”