話說有兩封讀者既email留左係個郵箱裏面一段日子, 今日攞番出黎睇.

“嘩真係一個唔該轉過頭1702又update左, 今次超快, 其實你地有無打算做個rss?”

基本上, 個網update既速度係同我果一排做野忙唔忙有D關係, 我係盡量一個月出兩篇有質素既文, 但係冇保證.  寫野係創作黎, 就好似D人畫畫, 寫歌一樣, 有時有野諗到就可以寫得快, 冇野諗到就會慢D.  查實我寫既野, 大約只係得一半到係會出街.  寫完睇番唔滿意既話就唔會出街.  呢度大家要容許我有些少藝術家脾氣, 但係我係有個心想1702既野係好好睇睇既.  有時收到有人email比D鼓勵說話我既時候係會比D心機寫, 不過其實收得最多既email始終都係: “喂, 做乜仲未有新野睇架………”

RSS: 其實我唔知係乜野黎, 我諗即係如果有新野就會自動提醒你果類既野掛.  由於我唔知係乜野黎, 所以唔會有.

“咁其實你想係1702攪D咩呢? 我一直覺得呢度真係個好古怪既地方, 個台係你同cx既私人空間, 但係我又諗唔明, 其實個效果同寫blog差唔多, 點解要自己整個網頁出黎咁勞民傷財呢? (錢就洗左, 但個網站除左貼文就無其他功能…..我無貶意).  我諗裡面既意義真係得你地兩個至知.  不過連留言版都無, 究竟你心目中既互動又要點攪呢?  照睇應該無咁簡單既.”

“我對於1702既感覺, 係有兩個人係度較有學術性咁分享賭博既心得, 同一般既賭博討論區最大既分別在於谷主既取向係提倡一種賭博既價值觀, 係叫你”自己賭”, 唔好靠人, 一般討論區偶爾會有人分享佢勝利既方法(一般都係講纜), 但呢D方法只啱賭場用.  1702講既, 主題係集中係賭馬既策略.(我知, 都有講左幾篇廿一點嘛)”

“如果要靠呢個網站去普渡眾生, 曲奇兄既行文未免過於隠晦, (即係你唔識串dog個d, 老師會直接話你知係d, 而唔會同你講咪係c同e附近果個囉.  所以我唔認為真相係咁樣).  況且如果真係想廣傳開去, 呢個網站應該唔係叫1702, 應該會用同馬有關既名, 總之就係想多d人係search engine度揾到黎.”

關於我想做到點樣既互動, 點解無討論區, 呢篇文既最後會有答案.  我先講比你聽當初點解會有1702既故仔:

話說2006年某日, 我約左cxwong係蘭桂坊食晏.  我同佢講:

我有一個諗法, 我想攪一個我同你兩個人既網頁.  第一, 我同cxwong以前曾經一齊做過野, 但係己經各有各忙, 一齊攪個網頁就可以多D時候係網上見面; 第二, cxwong果時啱啱出左本書, 我都想透過同佢一齊攪一D野增加少少自己既知名度; 第三, 我一向都係小田個messageboard度留言同寫野, 但係個messageboard係一個自己友既小圈子地方, post過D野過左一排就會冇左, 我自己鐘意寫野, 想攪一樣野可以keep番晒自己寫過既野, 隨時可以揾番出黎睇.

因為各種原因, 攪左超過一年個網頁至正式出街, 但係1702就係咁樣開始.

點解唔係一個blog?  因為我攪1702既時候我都唔知乜野係一個blog.  不過你今時今日問我既話, 我都仲係會攪一個網.  一個網頁比我既自由度大好多, 我想點攪就點攪.  其實而家1702都有一D裝修工程正在進行中, 你過多一兩個月就會睇到有D新野, 我未必只係會係呢度貼文咁簡單.  又或者可能有一日, 1702會唔止係我同cx既地方都唔定.  如果攪blog就唔可以咁.

我問過大部份寫email比我既人, 你點樣揾到黎1702呢度?  最多人既答案係: “因為睇過cxwong本書, 上網揾下揾下揾左黎呢度.”

又試過有人問我: 咁你以前係小田個board度D舊文仲可唔可以揾得番?  應該唔得, 我有時仲會拎出黎睇.  頭先睇番當年一篇力作”戰國風雲第七回之鯪魚球外傳”, 超好睇, 真係笑到肚痛, 你如果可以揾得番出黎睇就睇啦.  呢篇文都係留番自己友睇算, 唔打算再post過lu, 有時我都會睇番自己以前寫過既野, 會有一番新既感受.

纜唔啱賭場用架, 請你睇番cxwong既”最強的纜”.  係賭場賭纜輸死既機會好大.

我攪1702完全唔係想普渡眾生, 我冇咁偉大, 事實上你可以話我攪1702係一個好自私既行為, 我係為自己而攪既.  我只係想攪一個我自己睇番會鐘意既網頁, 同埋一個我D朋友仔得閒可以上去睇下我寫野既地方.  我好歡迎任何人send個網比第二個睇, 但係我預左有好多人會唔鐘意睇, 冇所謂咪唔好再黎囉, 我只係想識一D大家講野啱聽既朋友.  如果透過1702識多左幾個咁樣既朋友, 我會好開心.  似乎呢個目的我係做到左既.

因為同一個原因, 我講野唔會咁明.  唔係話特登咁隠晦, 但係我做既野, 無論係賭馬定係賭廿一點, 都係係香港地黎講係有些少敏感既.  同埋你可以話呢個係我寫野既風格, 我覺得寫一D睇果個人要諗下至明既野會好玩D.  我寫野既最終目的係想睇我寫野既人睇得開心, 我唔係想教書, 呢個亦都唔係一個教人賭馬既網頁, 佢係一個比我講我想講既野既網頁.  我想講馬就講馬, 我想講廿一點就廿一點, 我亦都有時會寫下其他既野.

“半杯水”一文出左街之後, 有好多以前未見過既人寫email比我, 講完自己既故仔(多數都係唔開心既), 講下自己睇完我篇文有幾感慨跟住就拜拜冇問野.  暫時呢篇文係回響最大既一篇.

“見你經常都有update, 但係cx果邊反而06年之後就無新文章, 我好好奇, 莫非呢個網站己經失去左當初你地建立時既功能?”

Cx係有打算係1702寫野既.  佢一路都係有一個好大既project攪緊, 攪既時間比佢想像中長左好多, 都係同馬有關但係我留番佢係適當既時候佢自己係1702度發表.

“……另外我認同問題一個不跑場大賽是可惜!  我不理馴獸師的部署, 只站在馬迷的角度, 都希望問題一個跑呢場而唔好走去碰D一哩強手!”

“何生真係盡到不能再盡, 我認為根本上佢上次跑一哩都係想博的, 唔係熱身, 隻馬係博得一場得一場, 只不過今次可能路程啱D所以名次先好過上次咁解, 上次一哩絶對唔係熱身.  以隻馬呢幾場既form, 我諗馬拉松好有可能同何生對賭, 唔知你認唔認同了.”

完全唔同意, 馴獸師都唔想何生跑果場一哩, 但係隻馬唔夠, 侷住跑多一場馬.  佢唔會盡力跑場一哩, 佢只係想準備好隻馬黎跑場大賽.  事實上佢場大賽己經跑得好好.  如果你睇埋隻百勝威係獅城既表現, 你可以睇到何生真係幾唔好彩, 遇到隻咁既對手仲可以點?

如果何生同問題一個一齊跑馬拉松, 唔係賭錢我會估問題一個會先到終點.  但係賭錢既話就一定要睇左賠率先至知道會賭乜, 所以答唔到你.

希望呢位讀者唔好介意我以上咁樣寫, 就好似出面有好多人唔同意我對亞媽打或者豆豆既睇法, 有唔同既意見唔係問題.  但係我好欣賞呢位讀者既思維:

“最後呢希望你可以多寫呢類咁既賽後評, 能夠講番事前刨馬既思路, 結合番賽果, 呢種寫法夠立體, 有別於坊間的賽後評, 就算不盡認同你既觀點都可以有所啟發, 值得閱讀.”

有時我對坊間既賽後評係過份挑剔左.  如果有一日我都要做坊間既賽後評既話, 我可能都會做得唔好, 因為我心目中想講既好多野, 其實都係唔係好出得街(你話我講豆豆果D野可唔可以係公仔箱度講出黎?).  如果有一日我為左開飯而要每場貼四隻既話, 我會好痛苦, 希望唔好攪到咁啦.  如果你覺得我呢度既野好睇過坊間既賽後評, 最主要既原因係因為坊間既人係打緊一份工, 所以佢地要講好多虛假既說話, 我攪1702唔係為左開飯, 所以我反而可以講乜都得.

賽馬係考驗你主觀能力既遊戲黎, 賭馬既人一定要某程度上主觀力好強, 太過客觀既人, 乜事都要考慮其他人諗乜講乜既人, 多數唔可以賭馬賭得好.  事實上, 大部份人係有自己一套賭馬既方式, 佢會覺得自己果套係啱, 人地係錯.  所以一場馬既賽果同自己事前既睇法唔同既時候, 多數人都係覺得自己事前既睇法係啱, 只係有D好唔公平既野發生左, 攪到佢果個”啱”既睇法冇發生.  呢個係點解係絶大部份既討論區裏面, 只係見到D人係度分享自己贏錢既方法, 其實佢唔係真係係度分享, 佢只係想其他人認同佢既睇法.  賽馬係一個好容易比人用黎認叻既遊戲黎, 1702冇興趣攪一D咁樣既野, 所以我唔打算攪討論區.  我賭馬唔係想認叻, 我只係想贏錢.  我既睇法錯晒但係我贏錢既話我係會好開心既, 我亦都一定唔會上網話比人知.

如果你能夠係自己有強既主觀能力之下, 仍然能夠客觀咁參考其他人既睇法, 吸收其他人既長處, 加強自己對賽馬既分析能力, 你己經比起絶大部份既馬迷強得多, 你有咁樣既心我要恭喜你.

1702唔打算特別做一D野去做互動, 但係好歡迎各方好友透過email同我聯絡, 我都目前為止應該係每一封email事無大小我都有回覆, 呢個係我好自豪既一樣野黎.  事實上, 想同我互動既人可能根本唔係咁多.  我係”賭神”一文裏面話過:

“但係如果有朋友仔自己係呢方面做自己既研究, 例如佢諗緊面對住濠江賭場有既廿一點牌例, 佢應該點樣去修改自己既基本策略表, 我係非常願意同有興趣同佢地交流既.”

篇文出左街之後, 有好朋友問過我關於玩廿一點遇上某一D情況既時候應該點做, 我都一一答左佢地.  但係只係得一個身邊既朋友係真係攞左個基本策略出黎自己研究, 跟住遇到D唔明既野同我傾過, 互相交換左意見, 從而增加自己以後玩呢個遊戲既勝出機會.

阿加汗點解可以賭馬為生, 其實唔係好難理解.