話說禮拜日第七場仲有十六分鐘, 我望住公司架電算機一臉無奈.

跑之前果一晚, 同SD係MSN己經講過我對場馬既睇法:

SD: What do you think of 埃及?

我: I tend to think he cannot beat 老豆, his form at 1400 and 1600 is too big diff

SD: I am thinking the track….rain non stop since evening….if the track is affected….his racing style could be big advantage

我: r7 is not easy, 可能爆得

SD: Yes I am thinking if I can tip any horse to beat 老豆

琴晚我最後刨一次場馬既時候, 我仲係覺得埃及贏唔到.  係我既賽馬世界裏面, 埃及跑千四同千六係兩隻馬黎; 千四佢係超勁, 但係千六我唔敢講佢係呢度贏得.  唔係唔好, 但係呢棚馬好惡.  但係…..去到呢一刻, 我有個強烈既感覺SD可能係啱既.

呢場馬, 我真係冇心水.  係冇心水既情況之下, 睇完頭果幾場點樣跑法, 如果埃及可以自己控制到個步速放到入直路, 佢機會係好唔錯.  賭唔賭得……好難講, 得五倍我又唔覺得好抵.  我依然係覺得呢場馬好多事可以發生.

我自己賭馬最後一定係信自己, 贏又好輸又好唔可以怨天尤人, 更加唔可以信D迷信野.  但係……識左黑柴咁鬼耐, 我琴晚亦都同黑柴MSN過, 唔信都參考一下:

黑柴: 簡單黎講, 第七場係搏埃及做低老豆.  埃及要做低老豆要靠D形勢, 但係best chance過左.  上次十八倍, 今次八倍都未必有.

黑柴既分析係全對既, 話晒佢算係我半個徒弟, 我點會唔知佢諗乜.  又話晒佢係我半個徒弟, 我點會唔了解佢?  我呢世人死都唔會同黑柴搭同一隻船.

喂, 講笑啫.  講清楚先: 我冇話過埃及輸係因為黑柴呀.

我估唔到去到現場, 隻打甩比冠軍問題一個會仲熱過老豆.  唔係咁多人睇唔到問題一個既問題掛?  而家面對住大部份賭仔既問題係: 你會唔會賭一隻比問題攪到好分左好多既老豆?

3.5倍好尷尬.  我上年買3.4倍既老豆對住生雞我係好有信心, 但係而家一隻3.5倍既老豆對住問題我就唔敢買.  定係買個大披士好呢?  又係好吸引.  但係我都幾清楚自己點賭馬, 我唔會夠膽買.

個difference係: 上年果場, 老豆跑得贏生雞既話佢一定贏得; 今日老豆跑得贏問題都未必贏得.

好老實講, 我唔鐘意老豆上一場既表現.  埃及係贏得好靚, 但係老豆比唔到我睇佢早兩個月果種高人一等既表現.  我要賭佢既話, 係估佢會唔會好似上年十二月大賽之前咁樣, 個馴獸師是但跑一場非主力既賽事, 去到主力既賽事就會大變身.  當然有咁樣既可能, 佢十二月咪做到過一次啦.  但係, 佢跑番佢上一場既表現既話, 佢要有D運氣至贏到呢場馬.  以前既老豆, 佢唔洗靠運氣, 佢走大圈避免碰運氣都贏硬你.  你用呢個賠率買老豆係OK既, 但係我唔覺得係特別抵.

兩隻跑完沙漠大賽既馬, 隻駱駝我就唔會信.  今年幾場沙漠大賽係嚴重受到沙漠落大雨影響.  喂, 沙漠都識得落大雨, 跑D超級無敵奇形怪狀既賽果出黎都得啦, 我身邊有幾個朋友仔都賭果幾場馬幾乎輸死.  但係肥仔郭果隻我點都要防一防, 佢係黎搏定係黎陪肥仔另一隻馬我唔想估, 但係你唔信隻馬都信下個馴獸師啦, 呢條友係香港個form勁到飛天.

如果我同人地講我覺得豆豆係有些少機會既話, 我睇大部份人會覺得我係馬後炮.  但係呢隻馬我諗左好耐; 佢究竟想點?  佢唔要香港護照返返去祖家己經激死香港馬會, 明明跑得好好地既兩隻馬無啦啦一齊唔要護照, 個馬主再申請要護照馬會死都唔批, 費事以後個個有樣學樣.  隻馬返去跑兩場普通賽事, 贏左第二場, 跟住明明有D贏得既袋鼠國大賽唔跑, 走返返黎跑呢場?  個做法好奇怪.  Make sense既做法就係贏左一場袋鼠國大賽先, 跟住至光宗耀祖咁走返返黎.  你唔信佢實力上贏得係另一件事, 但係如果你當佢個馴獸師仲係駝背佬唔係雞王, 呢個部署就係正宗呢條友既做法.  喂, 過完關三十倍喎, 你話有冇信心飛?  做法係奇怪左D, 但係反正呢個馬主都己經做左D好古怪既行為啦.  又假設你當個馬主係一個影子馬主, 真正主腦係駝背佬自己呢?  可能係我亂諗野諗得太多, 但係亦都可能係我以前中咖啡中到傻左.

講番我既一臉無奈.

黑柴琴晚仲有講一句:

黑柴: 其實唔要老豆同問題就好分….我一D都唔鐘意問題.

我:  me too.  我點會唔知你諗乜, 問題都唔make sense.

我同我老板呢場馬既策略就係同問題死過.  但係:  我地架電算機冇人買問題, 亦都冇人買老豆.  唉, 可能註定呢場係睇跑馬.  自從金融風暴黎左, 投注額當然受到打擊, 但係更大既問題係: D輸錢飛唔見晒.  而家D賭仔真係好鬼精, 攪到我地今年既生意都比起上年差好遠.  唉, D唔開心既野唔好講, 講番場馬.

場馬一過終點, 對我地黎講算係一個好既賽果.  我囡囡比我睇其中一個客點買:

九號膽拖五隻: 一, 三, 五, 七, 十, 每注一毫子.  我諗呢條友仔而家瞓左係度噴緊血.  差一條毛就中條勁冷既Q; 不過跑出黎我地都唔洗死, 話明搏問題死, 呢D飛我地一定會防到.  但係真係好想捉呢個客上去新聞透視訪問下佢點解冇拖到隻二.

簡直係人間慘事.

跟住又收到SD個短訊:

SD: I bet all 駝背佬’s horses except 九號 and my main bet is 埃及 ….(呢度開始刪左好多唔出得街既字)……

又一人間慘事.

其實SD個諗頭係好好; 駝背佬呢場排個咁樣既陣, 佢係有計既.  我唔怪佢唔信九號, 我都冇諗過九號會贏得; 但係我如果真係要飛駝背佬其中一隻既話, 我反而會飛亞媽打.  亞媽打有幾高大家心照, 我有好多朋友仔都嚴重睇實呢隻馬幾時黎料.  駝背佬自從佢復出一場識飛之後就收埋左佢, 我都係唔係好信亞媽打呢場會砌: 亞媽打可以做D更加石破天驚既事既.  我維持住我一直以黎既睇法: 我希望亞媽打會再一次遠征報番上年一戰之仇.

另一個勁開心既人應該叫香港馬會.  好彩唔洗上頒獎台頒獎比豆豆馬主.

去到第八場, 公司學緊賭馬個後生仔問我何生贏唔贏得.  要講何生就要由季頭講起.

話說上年十月尾果場三級賽, 何生今季初出. 香港仔寫網頁冇貼佢, 話何生跑新鮮唔得.  世界仔後黎睇左網頁之後MSN問我: 你覺唔覺得何生新鮮唔得?

我答佢: 點會唔得?  要得一定得.

一隻馬新鮮得唔得, 最主要睇佢個老豆係邊個.  何生個老豆我冇理由唔了解掛?  我既世紀愛駒, 以前世外高人係佢全無狀態之下跑一場一千直路輸九十幾個馬位跟住就去東洋搏殺, 呢個老豆既仔仔囡囡全部都係新鮮特佳.

唔好怪晒香港仔, 何生又真係幾季以黎次次都係要熱幾次身先跑得好既.  呢場千六我都唔睇好佢, 廿二倍比佢爆冷贏左.  跑完就知道個馴獸師想點.

以前何生年輕時, 佢係馴獸師既鎮倉之寶, 由十二月跑起, 要跑到季尾掃晒D大賽, 仲要玩埋遠征, 頭一兩場實唔會做足隻馬架.  唔係隻馬新鮮唔得, 係個馴獸師唔想比隻馬新鮮.  今季佢竟然清脆脷落贏左呢場千六, 意義好大.

隻馬年紀唔細lu, 馴獸師想比佢贏十二月場國際一級賽.  為左咁佢甚至乎願意比隻馬十二月peak, 放棄後面D大賽都得.  都咪話唔用心良苦.

十二月大賽發生既事, 唉.  點算?

對上呢幾個月何生跑呢幾場馬, 真係好差.  跑二千平磅都贏得咁辛苦, 馴獸師都知時代就黎會終結.  為左何生, 為左馬主, 馴獸師當然呢場跑盡佢, 但係為左比何生一個最大既機會, 佢又做D驚天動地既野.

問題一個居然跑第七場, 唔係第八場.

馴獸師當然知道問題有幾好.  就係好過頭.  佢知道何生搏盡未必贏, 但係起碼千祈唔好問題第一, 何生第二.  大佬, 何生一生都係成日跑第二架啦, 有乜咁奇?

攪到問題咁好既馬要跑場應該輸梗既千六, 真係好浪費.  如果你係問題既粉絲, 你應該覺得好可惜.  問題呢場係有權去做另外一隻鯪魚球, 但係呢個機會就係咁樣白白失去左.

琴晚黑柴話:

黑柴: (問題)要縮落千六贏老豆…..得既話可以試下遠征凱旋門

講番場馬, 肥仔隻馬係幾四平八穏, 肥仔今年係沙漠係冇以前果種霸氣, 我都未見過佢隻亞洲仔係沙漠可以跑得咁差既.  我對佢以前帶過黎既馬大信心過今年呢一隻馬, 但係睇在馴獸師份上我係鐘意佢既.

百勝威要估.  佢可能會唔知跑左去邊, 但係佢係沙漠跑得好好.  雖然話沙漠果場D form不能作準, 但係佢咁樣大外檔出閘跟住走大圈衝到上黎跑得近, 計馬既表現係果一場最好果隻.  仲有幾個有利既因素: 隻馬証明左搭得飛機, 呢件衫同呢個馴獸師又係正面因素, 唔係果D第一次玩遠征既友仔.  如果我話肥仔係一個正面因素, 呢位馴獸師唔會差得過佢.  個地可能係對何生有利, 但係亦都係對百勝威有利既.

何生己經盡晒力, 亦都跑得好好.  跑完場馬SD話跑到一絶都係輸, 阿加汗就話洗米想害死何生, 攪到馴獸師好慶.  洗米攪完個步速再頂係何生前面, 係有些少影響但係我睇只要百勝威有位既話都仲係百勝威贏.  百勝威當然係有實力, 包晒尾入直路都可以咁樣贏法唔係講少, 但係運氣亦都係佢果一邊.

又或者可能係人地睇得出運氣唔係係何生果一邊, 見你跑親大賽就會差少少所以次次賭你對面.  可能人地鬼佬都識得玩百家樂.

再睇番隻豉油好, 靚仔蘇騎得好精彩但係隻馬差少少.  呢隻馬好快趣就可以繼承同主馬豉油行既地位, 一味係大賽跑得近但係贏唔到.  睇番佢跑成點, 有冇人夠膽講如果問題係跑呢一場既話, 問題會跑成點?

馴獸師咁樣玩法, 唔好怪佢, 大家都明白佢既難處.  換著我偶像既話就唔會攪成咁; 唔單止會何生問題同場一齊出, 等你班友仔估下佢想點, 可能贏果隻係馬主另外一隻馬用牌仔唔要讓磅, 呢位馬主捧盃但係連佢自己都唔中.

呢隻馬應該唔係叫爆煲就係叫爆廠.