話說禮拜五晚, 我係濠江一個賭場打緊poker(中文叫德州撲克, 寶島叫梭哈).  係我張枱度絶大部份既人都係鬼佬鬼仔, 但係我既注意力放左係坐係我斜對面既一個華人身上.  佢就係賭神.

當然唔係發哥或者星爺.

賭神同我一樣, 以前年輕時攪過投資.  三十歲一場風暴奪去佢既所有, 破左產.  係人生既低潮時候, 賭神要揾一個方法好快咁揾到好多錢, 重新振作.  結果, 佢揾到佢人生既最愛 --  廿一點.  憑住廿一點, 佢幾年內揾到佢曾經失去既錢, 以及更加多.

今時今日, 佢係世界上(包括埋鬼佬同埋集團式既團隊)其中一個賭得最大既廿一點賭客, 幾千蚊美金一鋪係佢經常會做既事.  亞洲主要既賭場都有佢既足跡; 特別係馬拉同人參國既國家大賭場, 都曾經比佢攻陷, 為左停止繼續輸錢比佢而改變廿一點既條例.  同佢係廿一點上既業績相比, 我完全唔入流.  賭神曾經比世界各地既賭場請佢離場超過一百五十次; 我一次都未試過.  佢有佢自己既團隊, 我每一次去打廿一點都係單拖.  十幾年前己經有乜周刋訪問佢係賭場既事跡, 賭神呢個名就係乜周刋比佢(查實佢自己會話果時既佢都完全仲未夠班, 同而家既佢差好遠).  佢有佢自己寫既書同埋專欄; 愚弟既劣作”真人米奇”提過既真人米奇係賭神既好朋友, 佢地經常聯絡交換賭博上面既心得.

賭神只係一個名, 你問佢既話, 佢會話佢唔係賭神.  以前都試過有人叫我做馬神, 我可以好肯定咁話你知, 我唔係馬神.  我同賭神做既野, 一D都唔神化.

點解賭神會係度玩緊poker?  我冇機會問佢.  賭神係識得玩poker既, 但係未去到世界頂級既境界.  唔係佢冇個天份去做到, 我諗應該係佢冇需要去咁做, 反正佢打敗到廿一點, 己經得到佢想得到既金錢同生活.  Poker賭客既好處係: 唔洗好似廿一點賭客咁, 一日到黑都驚個賭場發現你做乜, 唔比你玩趕你走.  賭得大既poker賭客仲係賭場既貴賓添.  但係職業既poker賭客付出既時間同心機真係嚇死人.  你問下亞毛, 佢玩一晚poker要贏既話, 真係會悶到叉街.  日日八個鐘頭以上都做一D咁悶既野, 唔係普通人會頂得順.

某程度上, 賭神同我又真係幾類似.  我同賭神都係幾懶惰既人.  如果我同賭神係勤力打工既話, 係打工界應該可以創出一番豐功偉績既, 但係我地都係行左偷懶既一條路.  鐘意賭既人, 唔多唔少都係想不勞而獲既.  但係唔好比賭神呃到你, 佢個人只係身體有D懶, 但係佢個腦筋一D都唔懶.  佢用既好多賭博技術係世界上係首屈一指, 賭神並唔係浪得虛名既.  為左避免比賭場追擊, 佢要一日到黑去世界各地唔同既賭場去賭, 浪跡江湖.

我同賭神大家都同意既係: 數牌其實一D都唔好玩.  某程度上, 數牌係超悶既.  數牌只係為左逹到你想要既目的.  我唔知呢個係咪今晚佢走左黎玩poker既原因, 不過呢個係我點解係度打poker既原因: 今晚我個腦筋好tire,  唔想玩廿一點.

如果你有機會問佢: “你係咪賭神?”  佢會咁樣回答你:

“我唔係神, 我更加唔係賭神.  我唔賭錢架.”

係賭神既世界裏面, 佢賭廿一點根本唔係賭錢.  中國人所謂既賭, 係一個對自己今日運氣既大測試.  我今日想賭錢, 因為我今日我覺得我運氣好.  如果我今日輸左錢, 係因為我今日黑.  賭神永遠都唔係咁樣諗.  賭神只係係度投資, 用資金去揾更多既資金.  佢投資緊D乜野?

隔離屋Cxwong係”最強的纜”裏面話:

“要贏錢, 在最佳的纜之前, 應先找最佳的賭戲”

乜野係”最佳的賭戲”?  任何對賭客有優勢既賭戲都係.  賭神就係一日到黑都玩一D對佢自己有優勢既賭戲.  既然個遊戲對佢係有著數, 佢直情可以出錢請人組織團隊, 一日到黑廿四小時車輪戰轟炸個賭場, 炸到佢投降為止.

人生中做乜都有運氣既因素, 冇運就做乜都會唔得.  但係冇人會好運一世或者黑一世, 賭神唔係想賭佢既運氣, 所以佢用好多方法去減低風險, 去減少佢呢個投資中既風浪.  呢個concept係好重要.  係呢個層面上, 係銀行門口個師奶係賭得大過賭神好多.  銀行門口個師奶, 雖然賭既金額比起賭神每日既投注額細好多, 但係佢係用緊佢自己既積蓄賭緊一D佢完全唔知係乜既股票號碼或者貨幣.  佢到底最後會贏定輸, 好大程度上係睇佢好唔好彩.  賭神係完全清楚計好晒自己會面對既風險, 佢每日要賭既金額, 點樣賭法, 每一個投資既決定, 都係有根有據既.  係呢個層面上, 賭神係盡量避免要去賭自己既運氣, 佢係想盡量減低自己要面對既風險.

如果賭神能夠將佢既風險管理做得好既話, 理論上佢既勝利係必然既.  當然, 呢D野講就容易, 做就難.  我都唔止一次輸馬或者輸廿一點輸到差D失去控制.

試過劉華同我同其他朋友一齊食飯既時候問過我: 佢都諗過想第日唔洗做既時候係賭場玩廿一點揾食, 問我可唔可以將我D基本策略表比一份佢.  早排愛美麗既表弟滴滴仔同佢女朋友滴滴囡黎左濠江, 我除左同佢地食左一餐飯之外, 又同佢地係廿一點枱玩左一陣, 教左佢地一D基本策略.  托永利好既鴻福, 我地三個都贏, 特別係滴滴囡贏到開巷.  返黎之後, 滴滴仔話佢女朋友問我可唔可以將我既基本策略表比一份佢, 佢好有興趣研究一下.

我講左比滴滴仔同滴滴囡聽, 係濠江主要既賭場應該幾時投降, 但係冇比到佢地想要既野佢地.  再講清楚一次, 唔係我收收埋埋, 唔想益朋友仔.  問題係: 比左朋友仔我用開既策略表, 並唔能夠解決佢地既問題, 反而攪到佢地越黎越大鑊既機會係好高.  係呢個層面上, 我同賭神既處理方法係有所不同.  賭神唔單止寫野教你點樣玩廿一點, 佢仲公開埋佢既計算, 打濠江某幾個賭場既最佳玩法係點.

賭神同我係呢度既睇法上最大既分別係: 賭神知道公開一個基本策略表唔會影響到佢既事業.  佢明知道用基本策略黎打廿一點都仲係會輸既, 只係輸得少D.  佢跟本冇時間同興趣去做一D會輸既野, 佢做既野遠遠超越左跟住一個表機械式咁樣打廿一點.

試過有讀者寫信問賭神: 佢知道要做一個成功既賭場玩家, 成功既因素係有好多.  但係如果賭神只可以選一個最緊要最緊要既成功要素出黎, 會係乜?

賭神答: 賭大既勇氣.  我百份之一百同意.

係呢個層面上就要好小心, 千祈唔好以為只要有勇氣賭得大就可以做到賭神.  我可以帶你去好多個貴賓廳, 有好多祖國同胞懷著無比既勇氣賭到好Q大.  賭神既意思係: 賭大既勇氣係一個necessary condition, 但係唔係一個sufficient condition.  你有勇氣賭大係一個成功既要素, 但係只係識得賭大唔足夠幫你做到賭神.

愚弟係劣作”波浪理論” 裏面提過既波浪, 唔係普通人可以從文字上可以理解到.  滴滴囡果日係永利寶贏到開巷, 當然我敎佢做左D提高佢勝算既動作, 但係佢贏錢既最大原因係: 佢果日好好彩.  冠軍既球隊點解係冠軍唔係在於隊波點樣贏緊一球波可以保持到個勝果, 或者點樣去打贏一D屎過佢既隊伍.  冠軍既球隊往往能夠係明輸既情形之下都可以贏番一場輸梗既波返黎.

你問下阿加汗, 佢可以話比你知好多次, 佢賭既馬係啱晒, 但係運氣令到佢白費晒佢刨馬既一番心血.  你問下賭神, 佢可以話比你知好多次, 佢做啱晒佢應該要做既野, 莊家摶既牌, 十三種牌裏面, 十一種賭神會贏, 一種會打和, 得一種會輸.  但係偏偏就係跌賭神會輸果一隻出黎.  唔單止係一次, 係成晚, 成日以至成個禮拜不斷都係咁.  今年World Series of Poker final table, 個楓葉仔同人地all in, 隻river係成副牌四十幾隻未出既牌裏面, 得一隻階磚六會輸比對手, 其他任何一隻佢都會double up; 偏偏就係階磚六跌出黎.  兩個唔同既結果potentially差成七位數美金.  你問佢一萬次再黎過佢會唔會all in 多一次佢都會話去.  但係………

上面提過, 賭神唔覺得自己係度賭緊.  個遊戲係對佢有利既, 理論上佢係贏面高. “ 賭大既勇氣係最緊要既成功要素”, 意思就係係你完全失去左運氣既幫助之下, 你對你做既賭博仍然充滿信心, 能夠係劣境之下作出反敗為勝既一次賭博, 比自己一個絶地反擊既機會, 比自己反敗為勝.  亦即係話, 賭神唔覺得自己係賭緊, 佢係盡量唔想去冒風險, 佢想盡量減少佢要賭運氣既次數, 但係形勢逼佢要賭一次.

就等如一個賽馬日賭到尾場, 個個賭仔都想尾場番身.  但係絶大部份既人都會因為要追番輸左既錢而亂咁買, 希望好彩可以中到D冷野.  賭神就可以好冷靜咁分析頭幾場馬跑左D乜野馬出黎, 果日既場地同其他因素有乜野係賽前睇唔到既, 而家臨場可以點樣去微調自己既分析, 揾到人地睇唔出既機會份子出黎.  你自己如果入場賭馬既話, 去到尾場你會係邊一類?

做賭神真係唔容易.

將我既基本策略表印出黎派比人, 我冇興趣.  但係如果有朋友仔自己係呢方面做自己既研究, 例如佢諗緊面對住濠江賭場有既廿一點牌例, 佢應該點樣去修改自己既基本策略表, 我係非常願意同有興趣同佢地交流既.