1702近幾個月最大既進步就係收到唔少既讀者電郵; 係呢度多謝晒有send email比我既人.  似乎係零宣傳之下, 睇個網頁既人數係慢慢增加緊.

近期回響比較大既係”個案一二三”果篇文, 可能係個題材有少少學術性之餘, 對好多人黎講係比較新奇.  我想係呢度講番其中一個讀者既電郵.  佢既名同原文就唔好講嘞, 但係大意就係咁樣:  佢自己都有渠道用到個案二提過既地下交易平台去賭馬同受馬, 佢今季開始既時候就用個平台去受一D佢唔睇好既馬, 賭左六個月, 成績越黎越差, 佢問我好多關於受馬既問題, 乜野馬受得過, 上面飛數多少同賽果既關係等等. 

我既睇法同立場同係”個案一二三”文章裏面既睇法冇乜變: 由於水位既問題, 佢長線要用個平台黎贏錢既難度係好高, 我唔建議佢繼續用個平台黎受馬, 反而用黎賭就比較可行.

佢又覆番我: 佢覺得雖然水位係高, 但係因為用平台佢係有得揀黎受, 唔同我地開檔口, 客人買乜我地都要受乜, 所以佢認為水位較一般高係可以接受.  似乎佢仲係想試下佢既方法可唔可行; 佢開始同我講佢賭馬既理論, 例如某一隻馬係電算機係大熱門, 但係係個平台度係冇人想買佢, 個個都係受, 即係幕後知道隻馬會輸.  漸漸係每個賽馬日之前一晚, 佢就會問我邊隻馬受唔受得過, 我覺得邊隻馬穏唔穏陣之類.

我好禮貌咁覆番佢: 多謝你既電郵, 但係呢種咁樣既來信問題我係唔會作答既, 希望你明白, 唔係話我收收埋埋唔比料你.

仲記得SD同我提過: 你係1702寫野, 好似越黎越多唔係寫一D關於馬既野喎.  佢講得啱; 某程度上, 我係唔係好想1702變左做一個貼馬或者係評馬既地方, 呢個唔係我攪1702既原因.  反正如果係好似SD咁樣既好朋友, 我都經常會係MSN同佢傾下馬仔.  但係更重要既係: 就咁通過1702咁樣既一個網頁, 其實係做唔到我心目中想做到既一個互動.

仲記得早幾個禮拜既生果日報, 有一日阿加汗話比我聽, 生果日報出左一篇文.  原文又係唔記得左係點, 但係大意係: 琴日既賽事又有大戶搶錢, 唔知邊隻馬去到閘前大幅落飛, 果然飛到馬到.  馬會又話有專人睇住係咪有大戶係度玩弄個彩池, 但係好明顯係馬會完全冇做到野, 又或者馬會係無能為力.  普羅馬迷再度買中都比人搶錢, 情況同股市差唔多.  睇開公仔箱或者一D網上既賽馬留言版, 有唔少人都話而家買馬都唔洗點刨, 最緊要係睇最後幾分鐘邊隻馬有飛.  如果有馬變啡燈就即刻跟, 多數都有斬獲.

生果日報呢一篇文我覺得好有問題:

第一, 我唔係好知個作者其實想點.  佢係想馬會唔比某D人賭得大?  定係想幫普羅馬迷出一口氣?  寫呢篇野有乜野作用呢?  其實有馬落飛係好正常既一件事, 有乜野問題?  唔知個作者有冇玩過濠江馬仔或者狗仔; 如果香港馬呢個情況係嚴重, 咁果D點計呀?  我好多時見阿加汗買一隻馬(佢自己買好少, 但係係好冷既一隻馬), 臨門隻馬落飛落左好多, 我問番佢有冇唔開心, 佢會答: 冇, 都預左架啦, 咁隻馬係唔應該咁冷嘛, 我睇到人地都睇到, 有乜咁奇.  咪自己買果陣時預番佢會落飛囉, 當然最好唔好落咁多啦.  落得太多反而攪到我唔係好想買佢.

第二, 落飛果隻馬既賠率係越黎越唔抵買既, 你買既時候既賠率, 多數開跑時都會冇咁多.  係值搏率既角度黎講, 你係長期買緊一D唔抵買既野, 情況就好似上面提過果個用交易平台受馬既讀者咁樣.  你長線用咁樣既策略去贏錢係有好大既困難.

第三, 亦都係我最唔鐘意同唔鼓勵人地跟著個啡燈黎買既原因: 你跟住個啡燈買, 漸漸地就會失去左對馬實力既評估.  你唔會再比心機諗下呢場馬邊一隻馬其實實力最好, 邊隻馬賠率係抵買, 只係一日到黑掛住睇燈.  就好似上面個讀者咁樣, 諗左好多古靈精怪既理論出黎去解釋點解佢鐘意既馬係個平台上面係冇人想買, 點解某個練馬師或者騎師既馬係個平台上面個個都想受, 結果自己都唔知自己想點.

波波以前自己開檔口既時候, 就係一日都黑係度跟自己D客既飛賭馬.  見到邊個客係咁中, 就認定果個客既飛一定係賭馬集團既飛或者係同個練馬師有路有D幕後堅料, 自己都跟埋一份.  當然佢一跟個客就開始唔中啦.  跟跟下, 佢個仔仔就話見到馬會網頁個速勢榜連中幾條冷Q, 就即刻叫個伙記每期速勢榜既馬全部買WQ, 話馬會梗係見投注額唔掂, 比D堅料出黎挽救投注額喎.  你睇到呢度你都識得笑啦, 但係又真係有好多人係咁樣做.

唔係叫波波唔好跟飛, 但係跟要跟得聰明一D.  成個馬場咁大, 無論跑乜野馬出黎, 馬場裏面實有幾條友仔係贏到開巷架啦.  你果時就認定佢地係馬神, 跟佢地買, 你話會唔會贏呢?

要跟既話, 你就應該記低晒成個馬場裏面, 每一個人每一場買乜, 睇下經過幾個月之後, 有邊個仲係拉勻贏緊錢既, 同埋分析一下贏果D人係點樣買法, 佢地點樣可以做到長線係贏錢.  但係試問波波會唔會識得咁樣做?  連公仔箱所謂既最受歡迎馬評人都要見到自己鐘意既馬有飛落至夠膽貼出黎, 究竟佢係度評乜鬼馬?

係愚弟既劣作”波浪理論”裏面, 我提過odds theory係一個好困難既話題黎.  飛數既變動係我同我老板經常要接觸同應付既一樣野黎, 好難係呢度詳細深入講, 但係就係落飛著燈呢個話題上, 如果你係有心擺心機落去研究既話, 我提議你做一個練習:

以後你見到有一隻馬落飛落到啡燈既時候, 先唔好跟落去, 但係記低佢落飛既情況(落左幾多錢, 開閘前幾多分鐘落, 係一次過落晒定係分幾次落, 最好你較定錄影機錄低個現場直播, 可以之後慢慢睇番).  夜晚睇番之後, 問自己兩個問題:

一, 你覺得呢隻馬落飛, 買呢D飛既人係想隻馬贏定係輸?

係”波浪理論”文中, 我提過點解我地會買一D想佢輸既馬.  話雖如此, 大部份落飛既馬, 個飛係真係想隻馬贏既, 始終係真金白銀.  如果你第一題既答案係”想贏”既話, 問埋自己第二題:

二, 你覺得點解會有人夠膽賭咁大落一隻普羅冇乜留意既馬度?

你如果有比心機做以上呢個練習既話, 我保証你既努力係唔會白費.  我就比幾個例子你做開始, 我唔係好肯定係咪呢幾隻馬係著啡燈定乜野燈, 但係幾隻馬都係臨門落飛既:

案例A:  上年既超級個體.  詳見另文既”超級個體”, 唔再重覆.  睇番隻馬得手之前幾場隻馬點跑, 隻馬贏之前既準確功夫同以前有乜野唔同.

案例B:  森美仔跑谷草大長途.  幕後點解等呢場谷草低班大長途黎搏, 呢隻馬係乜野性能既馬, 佢點樣準備跑呢場馬.

案例C:  中國星輸完場四歲大賽出黎生吞明星馬長買, 但係比人擒左跑第二.  點解佢會夠膽同長買死過?  佢點解會有信心同有機會跑得贏長買?  長買其實係一隻有幾高既馬?

案例D:  啱啱上個禮拜隻冇事神.  自己諗啦.  做乜有人會賭WPQ賭得咁大?  佢地睇到乜野係普羅睇唔到既?

呢D己經係我就咁諗到落飛落得幾緊要既例子, 好老實講我記得係因為我地有份賭佢地, 但係個key係明白點解我老板會睇好一隻冷馬.  呢D己經係落飛落得嚴重既例子, 如果計埋我地一注得手既例子, 遠有SD隻馬生擒生雞, 近有上個禮拜靚仔蘇勇挫魔王隻不敗之師, 其實呢D係好值得研究既課題黎.