話說呢兩日, 我打電話聯絡各方好友, 通知佢地一個壞消息: 我地要加價lu, 好對唔住.  希望係幫到大家之餘, 大家依然可以多多支持.

金融風暴發生以黎, 世界各行各業無一倖免, 我老板經常同我聯絡, 問我呢邊生意既情況如何, 外面既環境有乜野改變.  我自己一早就己經作左一個好壞既打算; D老細個袋裏面少左咁多錢, 心情點都唔會好得去邊, 仲點會賭咁多呢?  奇怪既係: 由九月至到今年一月頭左右, 生意額一路都係維持番咁上下, 冇乜少到.  話雖如此, 我一路都唔肯鬆懈, 同波波密切留意外面既最新形勢.  一月中, 波波揾我同我開緊急會議.  金融風暴終於殺到黎我地呢度.

波波揾我傾既係: 由一月頭開始, 有好幾個大客開始冇錢找數比波波.

查實係濠江賭場既層面, 金融風暴好早就己經殺到黎.  咁啱亞爺又撞到正係九月頭開始收緊豉油行, 祖國好多老細唔可以好似以前咁free咁過黎濠江搏殺, 波波D賭廳就首當其衝.  波波好多客仔即刻人間蒸發.  最大鑊既係: 蒸發既係最大果D客, 情況就好似D大陸工廠咁樣, 金融風暴一出事既時候, 首先執笠既就係最大型既工廠.  中小型既工廠, 反而因為佢地既靈活性而頂得下.

九月頭馬季開鑼既時候, 我早就同身邊幾個朋友仔講過: 今個馬季可能會係好艱難既一年.  如果可以保持番上一年既業績我己經好開心.

波波同我開會, 簡單講過幾個出現問題既客仔既情況.  有幾個客仔係自動同波波報案, 話就黎要過年, 唔係好夠現金, 可唔可以過完年至再傾條數.  呢D己經係較為負責任既客仔.  其實咁樣既客仔, 佢都仲係有心賭既, 佢主動揾波波商量, 只係想過完年至找數.  波波幫到就幫啦.  波波自己都要過年, 有邊個過年唔洗洗錢喎.  波波都應承我老板, 佢自己頂到既話就盡頂啦, 大家都係為個生意好.

自動消失既幾個大客, 唔洗波波出聲我老板都有留意啦.  老板都知道乜野事, 叫我問下波波可唔可以揾番個客比佢繼續玩.  大佬, 真係揾著我黎攪.

我: 波波, 你唔好介意, 老板一定要我問問你, 你照答我就得, 我會照實講番比老板聽………

波波: 你同你老板解釋啦.  我做得呢行, 都預左有D數會收唔到, 通常都會有2-3%.  我keep到呢個percent己經係行內算勁(嘩, 突然波波講咁多英文, 証明佢真係好激動).  你知唔知我呢兩三個月, 賭廳有幾多條數係收唔到?  個場靜到咁, 你估我想架咩?  個客都冇錢找數, 我點再比數佢黎賭啫?  喂, 我應承你個老板包底, 我完全係冇條件架喎.  唔好話我冇為個生意出力, 你個老板己經咁著數, 如果個客唔見左, 我可唔可以同你老板講我收唔到條數唔找比佢?  呢幾個月, 個個客都係度玩只係因為有得賒數, 遲早有一日冇數找架啦, 而家要用錢咪現形囉.  你叫我再比佢玩咪即係叫我去死?  咁冇理由要我陪佢賭, 望佢會中掛?

無言以對.  因為佢講既野係啱晒.

最得意既一件事係: 金融風暴發生左以後, 我個濠江寫字樓無啦啦變左公司既#1 profit center.  咁正?

係.  靠晒澳元, 即係攪到中信泰富出事既原因.

好似係十月中, 我仲記得有一個禮拜, 澳元由大約七個七一野跌左落去四個七.  我個老板係我呢個寫字樓賺港紙, 拎番去就用澳紙出糧比伙記, 佢真係yeah晒.  所以係金融風暴發生既初期, 其實我個老板係著數左既.  唯一一樣野係: 我係全公司唯一一個用港紙出糧既員工, 攪到我好鬼驚, 如果有一日老板突然覺得點解我份人工好似貴左咁多架, 咁我就死得.

呢排答得最多既問題肯定係呢個: 點解既然生意唔好仲要加價? (係我地呢個行業黎講, 即係比少D折扣D客仔.)  唔係應該比多D折扣留住D客咩?

我同世界仔講左加價既事, 佢話: 你個老板好似諗緊好多方法去慳多D錢喎.  係呀.

老板想做到既野, 令我諗起評磅員上次問我既一個問題.  我同評磅員casino hopping, 周圍去睇下每個場既生意情況,

評磅員: 我唔明白點解會有咁多賭場唔比用泥碼玩廿一點.  我明白, 碰著你咁樣既客, 賭場輸錢比你既機會係好高.  但係我亦都留意到其實絶大部份既客係唔識得玩廿一點既.  佢唔識得玩既話, 佢輸比賭場既錢仲多過佢玩百家樂輸既錢.  點解賭場唔開多幾張廿一點枱, 比佢地用泥碼玩吸引佢地去輸多D錢呢?

答案唔係一兩句說話可以答到, 都係比佢自己睇到個答案好D.  我同評磅員去左係我寫字樓對面既一個中小型賭場度睇.  個場有兩層, 大約三十張枱都係玩緊百家樂, 大部份都有人玩緊, 買緊五十至兩百蚊左右.  買五百果個己經算係大客.  廿一點枱得三張, 有一張冇開.  得一個客玩緊, 佢用緊泥碼買緊三門每一門幾千蚊. 呢個場係濠江少數准用泥碼玩任何遊戲既場之一.

金融風暴之下, 濠江大小賭場生意都一落千丈.  大場估然少左好多客.  大家都可以想像到, 中小型場既生意有幾好.  佢地為左要生存, 都諗盡辦法吸引多一D客去玩.  就算唔賺錢既野都做, 起碼多D客玩緊, 睇落都冇咁冷清.  呢個場就用買泥碼比回佣做賣點去吸引D客黎玩.

要答評磅員既問題, 可以用幾個層面:

第一, 客仔唔可以一刀切.  簡單黎講, 你可以分所有客仔做專業同散客.  係呢個場裏面, 如果有一個客仔係專業既賭仔, 你話係邊個?

第二, 散客by definition係要輸錢既.  個個賭場同檔口都想盡量揾多D散客.  呢個場個老板都好想水中寶同永利好D客仔走晒黎呢度玩.  呢樣係得個”想”字.  佢其實係要諗: 點解係個場玩緊呢幾條友仔唔走過去水中寶玩?  佢地繼續留係度玩, 個場應該比好多著數佢地至啱.

第三, 你比個散客用埋泥碼玩廿一點, 佢係咪會玩多D廿一點呢?  答案係否定既.  個散客係輸錢比你, 但係佢唔係低能仔.  佢就算係輸佢都要揾一個輸得最慢既遊戲黎同你玩, 同埋反正都係玩, 買得有咁細得咁細.  佢得一百蚊賭本佢都要”唱”兩個五十蚊至肯同你玩.

第四, 專業果條友仔點解係度玩廿一點?  佢一個買得仲大過人地成枱既錢加埋.  梗係: 你比人用泥碼玩廿一點, 如果佢係識玩既, 佢知道同你玩長途賽既話佢贏面係比你高.  唔係點解佢唔走去水中寶住間靚好多既房喎?  佢點解買得咁大?  你話呢?

第五, 個場可唔可以唔比佢玩?  得, 唔比用泥碼玩廿一點既話, 條友保証即刻消失.  喂, 又係你話想要人流, 用回佣吸引多D人黎玩既?

以前讀屎片教你做生意果D科目, 上堂教既野有幾多係真實世界會啱用大家心照啦; 但係讀市場學有一樣野係好啱用既, 果樣野叫market segmentation.  你能唔能夠正確咁做好你既market segmentation, 係會直接影響到你既分析會唔會啱.

其實, 我身邊幫襯我老板賭馬既人都可以用黎做同樣既分析.

亞毛, SD, 黑柴, 佢地好多時明知同我老板買會有折扣佢地都係幫襯馬會.  佢地買得(相對黎講)細; 有時佢會同我講, 我買得咁少, 唔好意思比飛你地啦.  佢地唔一定係輸錢, 但係起碼佢地輸既錢唔會痛.  最重要既一點: 因為佢地買得細, 你加價係唔會點樣影響到佢地既投注.  我老板好想佢地買多D, 問題係就算比多D著數佢地, 佢地都未必黎同我老板買.

行家, 阿加汗, 劉華, 我同佢地講加價既消息, 佢地個個都牙痛咁聲.  佢地係靠呢樣野揾食既, 每一個百份點都係佢既錢.  佢地拉勻贏我老板錢, 我老板唔介意, 但係如果我地淨係得佢地幾個買既話, 我地老早就收左檔.  我以前都寫過, 行家比我地既生意係好大, 但係我地從佢身上冇錢賺既機會係好高既.  事實上, 佢比我地既飛, 絶大部份既時間係要掉頭就打番晒出去, 輸水都要咁樣做.

我地加價, 其實就等於暫時唔比用泥碼玩廿一點一樣, 希望呢位專業既賭仔明白, 我地唔係唔想做佢生意, 但係經濟不景, 真係唔夠散客, 麻煩你暫時去第二個場度揾食.  有朝一日我地好想比你返黎玩番, 做番你既生意.

我地既客仔, 以及我一D朋友仔, 當然唔高興我地加價.  我同行家講, 歡迎佢先同第二個好D價錢既檔口買左先, 有淨既飛至比我地, 唔洗比面我, 我明白既.  事實上, 我地想做到既效果就係咁樣樣.

我地加價當日, 有一D地下檔口, 生意突然之間好左好多; 佢地以為終於有好日子過.  唔夠兩個禮拜, 己經有幾個客仔走黎我地度求救, 問我地可唔可以減番價比佢地.  點解會咁?

咪就係有個賭場, 突然多左好多人一齊黎玩廿一點, 仲要個個玩得好大囉.  人又多左生意又好左呀, 仲唔係好消息?  但係………

我地加價初步既成效己經見到.  生意額跌左好多, 但係錢係比以前仲要賺多左少少.  可能係唔洗處理D惡既飛, 我地可以專心咁賭馬.  呢個其實係我老板既終極計劃: 我地少D受, 多D賭.  我地估計, 係馬季下半季, 如果我地賭得好既話, 濠江有一部份既地下檔口會支持唔住.  到時經濟穏定左之後, 我地就可以爭取到一個比之前更加大既市場佔有率.

呢個時間會係幾時?  唔知, 但係我點睇都唔會係黎緊既一年.  係呢個時間, 我會建議大家用一個穏守突擊既戰術.  郭家明套野有用架, 只係要揾適當既時候去用.  今年我完全唔敢諗點樣去揾多D錢, 呢個唔係適當既時間去爭取入球.  如果我自己同公司可以保持揾番上年揾到既錢, 我己經係非常滿意.  黎緊既一兩年會有好好既機會, 但係而家千祈唔好心急.  係呢個層面上, 我同我老板既諗法係一樣既.