話說最近接觸到三個好類似既個案, 攞出黎同大家分享一下我既睇法.

個案一:

袋鼠仔問我世界最大既交易平台必發網站既用法.  佢從來未用過呢種服務, 但係佢大約知道可以用交易平台去同自己睇淡既馬對賭.  袋鼠仔係黎緊場哩半大賽好唔鐘意大熱門週末狂熱既機會, 假設佢有7倍左右而同佢對賭既話, 佢想知道佢會大約贏幾多錢.

我答番袋鼠仔: 如果你用十蚊買一隻7倍馬, 佢輸你就輸十蚊, 佢贏你就收番七十蚊, 即係贏六十蚊.  所以如果你用交易平台受佢, 就係掉番轉, 佢輸你就贏十蚊, 佢贏你就輸六十蚊, 全部未計平台既抽水.  情況就等如你用左六十蚊去買一隻1.17倍既馬一樣, 用六十蚊去搏十蚊.

袋鼠仔明白晒, 但係話佢冇諗過原來只係會贏咁少.  佢永遠都唔會買D回報得咁少既野.

個案二:

菠蘿用一個地下既交易平台去賭濠江既狗.  佢對賭幾隻狗, 其中一隻八倍既狗佢受五蚊win披, 即係話佢跑出黎既話佢就輸三十五蚊win(披唔記得幾多), 起碼佢受果陣時係咁諗.  點知臨開跑時呢隻狗急速回飛去到三十倍, 隻狗贏左; 菠蘿就win披加埋輸左二百幾蚊.  呢個交易平台唔同必發, 必發係用fixed odds, 你受果時係幾多倍就係幾多倍.  係呢個平台度, 佢係同買馬會一樣係浮動賠率.

個案三:

行家透過佢相熟既賭場廳主朋友受人地百家樂.  行家見有朋友攞左三十蚊出黎受人地百家樂, 贏左八百蚊, 覺得應該係有得做既生意.  結果個客人黎賭左十幾次之後, 行家唔見左六十蚊.  佢食飯既時候開門見山問我既睇法.  照計個個濠江賭場日日殺百家樂殺得咁勁, 冇理由會有咁樣既結果架喎.

三個個案都同受人地注碼有關, 係繼續講落去之前我想先講清楚一樣野.  你做以上既動作既時候, 記住一定要係一個可以合法咁做呢個動作既地方至好做.  如果你係身在香港或者其他唔容許用交易平台呢D服務既地方既話, 我強烈建議你將我呢篇文章當係一個敎學練習黎睇就算數.  你賭得大既話, 你其實係一早就應該搬去一個可以合法咁做呢D野既地方去做; 你賭得細既話, 你既回報同風險跟本一D都唔成正比.

賭同埋受係相對既.  如果你有機會問我老板寄生蟲對賭同受既睇法, 佢會答你: 兩樣野只係一線之差.  兩個動作都係投注一個outcome會唔會發生.  所以你走上去必發賭既話, 根本冇話賭定係受著數D.

我有一個朋友有機會去到英國做野, 佢就親身用自己既時間心機同金錢去做呢個實驗.  佢係必發開左一個戶口, 晚晚用必發玩英國馬.  佢既理念好簡單: 乜都唔刨, 場場都受大熱門.  佢咁樣玩法玩左一個月幾百場馬.

結果: 輸少少.  輸得唔多但係點都係輸少少.

唔甘心既佢又做第二個實驗, 跟住既一個月佢又係咁樣玩法, 但係就買番對面: 場場都買大熱門贏.  因為交易平台唔係莊家, 賠率通常會好過正常既莊家一D(但係有其他風險, 例如你買既馬報名後退出, 正常莊家一定回水但係必發就冇).  如果我朋友既諗法冇錯既話, 佢呢個動作應該可以贏少少, 之後就可以加大注碼.

結果: 又係輸少少, 我朋友決定投降.  我冇話比我朋友聽既係: 如果你比我老板知道左你呢兩個月做乜, 佢會同你講: 你係一個低能仔.

必發交易平台體驗左Adam Smith既無形之手概念, 呢個市場真係超efficient, D pricing全部都係啱啱好, 你點買都係輸少少.  我個朋友仔做完呢個實驗發覺到, 原來無論佢點玩, 個交易平台都會係一個永遠既贏家.

好多人既諗法就係: 賭仔輸比莊家, 係因為我做閒佢做莊, 佢受緊我既注碼, 所以受果個會贏賭果個.  睇完以上既實驗, 我想講既係: 其實就算掉番轉, 係馬會做賭, 賭仔做受, 賭仔都係輸梗果個, 只要有一個情形冇變 --  馬會抽水.  面對住世界上所有既搏彩遊戲, 賭仔面對既終極敵人只係得一個 --  水位.  請睇番愚弟好多個世紀前既劣作”計得精彩中篇之我愛過關”.

如果你係愚弟既讀者, 你可以話呢樣野唔係一樣新野, 我好耐以前己經寫過.  啱, I know.  如果你睇我以上講我老板既睇法, 老板話賭同受係一樣既, 我亦都同意.  但係如果你係一個散客, 唔係真係一個靠賭搏黎搵食既人, 賭搏對你黎講係一個遊戲, 可能係好認真咁玩既遊戲但係唔係用賭搏黎開飯既話, 我既睇法係: 賭同受係你既情形之下唔係一樣既.  我會覺得你賭好過受.  原因係:

如果你賭, 你輸極都係輸晒你個賭本.  大部份人係知道點樣去控制自己個賭本既.

但係如果你係受, 你好容易失去左對你既風險評估既感覺, 你好容易會賭大左, 自己輸過左籠而你自己係完全唔知道.

個案二係一個好好既例子, 亦都好容易理解同明白.  你做賭果個既話, 就頂多好似好多馬迷買左一隻狂落飛既馬咁樣, 比人搶錢怨聲載道, 但係你既底線都仲係你既賭本.  正常人係唔會做一D野係攪到你賭突左既, 因為你好容易可以控制到你既賭本.  但係受既話, 失控既機會係大好多.

用番個案一既例子, 如果袋鼠仔真係用必發去受週末狂熱既話, 佢一定要個戶口有六十蚊係度至可以受對家既十蚊, 呢個就係必發比用家控制佢賭本既方法.  但係係真實世界裏面, 大部份既時間係冇咁樣既機制去幫助你去控制你既風險既, 因為冇呢個保護網而出事既例子, 係人類歷史多到爆, 連最叻最專業既人都會中招.  淨係係近呢幾個月我地見到既例子己經有唔少: 雷曼兄弟出事就係咁, 迷債苦主又係咁, 中信泰富出事都係咁.  你問番呢D當事人, 佢地賭呢鋪之前全部都係覺得出事既機會係零.

袋鼠仔一向鍾意買冷馬, 佢聽到對賭週末狂熱得1.17倍佢當然唔開胃, 呢樣野我好清楚.  但係係對賭呢個遊戲裏面, 其實呢個賠率己經唔錯, 起碼係呢場馬裏面, 對賭週末狂熱己經係最好分果隻, 因為佢係大熱門.  你是但對賭另一隻馬, 多數你只係得1.0x倍.  反而如果你問賭仔既話, 個個都會識得講: “得1.0x倍, 中梗都唔買啦”.  佢地又啱喎.

必發比到每個賭仔有一個防守機制, 有錢係戶口至可以受, 亦都保證到必發一定會袋袋平安.  用番我玩廿一點既例子, 我係愚弟既劣作”波浪理論”裏面提到, 我玩一鋪一門一百蚊, 我要有五千蚊係個袋裏面, 另外再要有兩萬五至三萬蚊係銀行戶口裏面, 我先至可以開始玩.  五千同兩萬五兩個數字係用統計學計出黎既, 唔係估估下.  好彩統計學D野係啱既: 如果我要有二百五十至三百手既錢至玩得廿一點既話, 我廿一點事業裏面歷史上最黑暗既一次: 試過係八日裏面輸左二百二十幾手.  原來係銀行裏面既不動產係真係會用到既.  呢個就係我玩廿一點既防守機制.

個案三裏面, 如果行家係有一個適當既防守機制既話, 行家個生意應該係可行既.  問題係: 行家比我既資料太少, 好難講得出佢要有幾多錢至頂到.  個客每次玩幾耐? 每一鋪平均買幾大?  總共轉左幾多錢碼?  有晒呢D資料就好計好多.  行家個朋友攞左三十蚊出黎贏左八百蚊, 果三十蚊根本係冇意思既.  個客輸既話, 你一亳子都唔攞出黎都得.

係冇呢D資料之下, 受百家樂唔係一個咁吸引既生意.  百家樂個水位係有利個莊, 但係個水位其實係好細.  好多人以為百家樂個水位係2.5%, 因為閒贏唔抽莊贏抽5%, 莊閒大約一半一半.  又請睇番”波浪理論”睇下百家樂既水位係幾多.  中國人己經係好聰明, 反正都要賭既話, 佢地就鐘意賭抽水最少既一個遊戲.  賭場殺百家樂殺得勁, 最主要既原因係因為枱夠多, 七日廿四小時係度係咁殺, 同一個工廠一樣, 做個量(仲有一個唔同係: 賭場理論上係無限金錢, 因為佢可以發無限既籌碼, 行家唔係).  行家個客如果賭一百蚊一鋪但係賭好Q多鋪, 行家贏面應該會好高.  但係如果個客賭到好大, 減少佢賭既次數, 行家其實係攞個心口頂住同佢死過, 佢同個客只係玩緊一次擲亳.  除非行家同好多好多個廳主合作, 不停咁都有人係度同佢對賭緊, 咁行家既發逹機會就會大大提高.  但係行家只可以同廳主合作, 個客黎賭就要有人睇住, 記低每一鋪個客既贏輸, 客一多既話就好難execute到.  最根本既問題係: 個客黎得十幾次, 太少lu.  我冇用統計學去計, 但係直覺上, 如果有計既話, 三百次以上就可以有個significant既優勢.  但係行家要等到個客黎幾百次, 幾年加埋都唔知有冇咁多.

個案二裏面, 當事人既防守機制應該係: 唔好再玩濠江狗.  濠江狗同濠江馬有一個結構性既問題: 彩池太細, 容易比人操縱.  電算機比人操縱左既話, 大戶係比起細戶有一個絶對性既優勢, 因為佢地控制左個派彩.  諗到最壞既一個層面, 當事人可能係跌左入人地既圈套: 其實佢受邊一隻狗都會輸.  有關人等見到當事人受邊隻狗, 大戶就會係電算機買熱另外果D狗.  只要受害既當事人夠多, 大戶殺所有當事人既錢就會大過大戶係電算機輸既錢.  情況就好似股市既期指市場一樣, 散戶係一定唔夠大鱷玩既.  如果你見到一D賭搏遊戲, 唔知點解D賠率最後一分鐘會多左好多投注額, D賠率最尾會變得好勁既話, 果個遊戲多數都係類似以上既騙局.  警訊裏面都有唔少呢D例子, 各位市民記住要提高警惕.

受人地既注碼好容易令人有一個錯覺, 以為好容易贏到錢.  一場馬十四隻, 你受十三隻都會贏, 得一隻要賠.  問題係: 你輸果一次可唔可以頂到你贏果十幾次.  你如果係賭場見過D人點樣係輪盤枱鋪籌碼你應該會明白我講緊乜.  就等如有D賭仔自認玩百家樂有七成甚至八成既勝率, 冇花冇假.  問題係: 要做到咁樣既勝率, 個賭仔就一定要賭纜, 輸就買大D去追番.  贏既次數多左, 但係輸既時間就會輸得甘好多.

唔係話逢有抽水既遊戲都唔玩得, 而係要諗辦法點樣去打敗個水位.  係三個個案裏面, 個案三係positive expectation既遊戲, 行家只要計好盤數, 佢贏面係高既.  隔離屋Cxwong既一連串文章, “最強的纜”, “差賭戲的最佳策略”, 強烈建議大家睇番黎温故知新一下.