話說禮拜三晚跑完夜馬, 行家約左我出黎飲野傾閒計.

行家係濠江本地人, 佢同佢老豆係濠江有頭有面既人, 屋企攪好多樣生意, 平時佢地兩仔爺都會跑馬既時候收下飛, 做一個中小型既檔口.  開檔口從來最大問題就係收數, 呢方面行家應該問題不大: 客仔全部都係佢地生意老相好或者係好信得過既人. 普通人可能會問: 咁咪係犯法架囉?  冇錯, 肯定係.  但係長久以黎濠江都係咁, 咁細既地方有勢力既人做好多野都會方便D.  其實個個地方同國家都係咁, 只係好似係濠江就特別多.  除左係一盤生意之外, 有時亦都可以當係一個大家互相搵D野賭下既渠道, 就同普通人走埋一齊打番幾圈一樣, 不過行家佢地打得大好Q多.

一路以黎, 馬會一直都覺得呢D檔口係佢地既死敵; 我亦都唔敢話呢個諗法係錯, 但係我係覺得D檔口死晒唔代表呢D飛就會去晒馬會架電算機, 唔止係去唔晒, 係得好少好少會去到.  D檔口死晒既話馬會生意只會好多小小, 甚至乎差左.  成個檔口市場既一個里程碑就係馬會幾年前既九折優惠.  呢個我夠膽講係呢幾年馬會最重要同偉大既新措施.  呢個新措施令到檔口界有一個結構性既轉變.

檔口相對馬會有兩大優勢: 折扣同賒數.  賒數馬會冇乜野可以做到, 我地將焦點放係折扣先.  波波以前係檔口市場既黃金時代既時候做八八折至九折.  馬會既Win披抽水八成二, 即係話如果D飛唔係特別惡既話, 波波有六至八點水位去走位.  客人開心之餘佢又可以袋袋平安; 只要有幾個可靠既同行佢可以出到飛去做風險既話, 佢搵到錢既機會係好大.  如果唔出飛同個客死過既話, 檔口多數都會贏.

馬會個九折優惠, 明眼人一睇就知唔係比普通人既著數啦; 你同我一齊入場賭馬, 有錢仔都唔會一條飛買到一萬銀.  個折扣有兩個意義: 第一, 檔口一定要大幅減價.  馬會做九折肯定有得賠, 檔口起碼要減多幾點至會有生意.  好多檔口即刻雞飛狗走, 做得近九折就冇晒生意, 但係做得近八二折就冇晒水位, 如果D飛係集團或者係幕後既惡飛既話, 多多錢都唔夠賠.  檔口生存空間細左好多.

第二(我覺得係比起第一點更加重要), 檔口可以打飛比馬會.  以前無論檔口收到幾惡既飛, 一定只係搵同行互打飛一齊同個客死過; 冇理由八八折收條飛返黎十足打比馬會掛, 差成十二點子, 冇同行要就搏一鋪.  有左馬會九折, 檔口有D閘前既八七八八折飛, 而家都可以打比馬會, 輸兩點子但係肯定乜飛都收唔洗走路喎.  呢個亦都係點解有D人話近年多左閘前有D馬瘋狂落飛既最主要原因.

前兩晚同A仔飲野提起呢樣, A仔即刻話: 嘩, 咁其實連出埋呢樣野馬會生意都只係咁, 其實馬會生意真係好差喎.  果然係半個同行, 一點就明.

我到而家都唔知係老板時來運到定係佢能知天下事, 係呢個改變既同時佢就開濠江寫字樓.  我地袋鼠國網頁都寫明我地歡迎買十蚊飛既散戶至到集團, 幕後以至檔口既高額投注者用我地.  透過波波既安排, 好多濠江檔口都由做檔口受客人既飛改為做一個agent, 將收到既飛打晒比我地賺差價.  水位實在太小, 打飛比我地既話唔洗頭痛計數又可以有覺好瞓.  行家係好朋友介紹既; 係一個特別既安排之下佢都有用我地既服務.

今季季初, 我同行家都試過搵一D加強合作既渠道. 同老板傾過之後, 試過以一個高過市場正常折扣做下行家生意, 行家亦都應承盡量比多D飛我地.  呢一步其實係有一定既風險; 季頭試過有一個檔口嘗試用超高折扣嘗試殺出一條血路.  果一日生意佢地就真係搶左好多, 但係只係做左一日, 第二個賽馬日就做番比正常低既折扣(即係叫客仔幫襯第二個), 大家都知道發生乜野事.  其實我地都好肯定我地比客人既公道價係大家最有利既價錢黎, 馬會折扣令到呢個折扣既郁動空間好有限.

做左一日, 我就同行家講: 唔好意思, 要做番正常折扣, 我諗下仲有D乜野可以幫到手啦, 真係好sorry.

行家D飛果日贏大錢, 但係呢個唔係個問題.  其實我地係好歡迎所有人打惡既飛比我地, 我地自然有辦法去應付.  問題係行家D飛既來源.

我地同行家咁樣既檔口有好多唔同, 其中一樣係出飛既渠道.  行家係冇牌既, 佢地同邊個打飛都得, 自由度比我地大好多.  我地係上市既合法公司, 我地只可以同有牌照既人出飛, 否則就解釋唔到D錢去左邊.  長久以黎, 我地既出飛渠道得兩個: 對面死對頭S記用市場折扣收我地飛, 最尾幾分鐘佢地唔收之後我地就比晒馬會.

你有睇開S記網頁既話, 你都知道佢地係冇做香港馬retail生意既.  佢點解會收我地既飛呢? 未死過咩?  我地既估計係: 佢地想跟飛.

跟飛都唔係一個大問題, 我地都預左, 同埋我地自然有辦法去應付.  但係我地未勁到知道埋S記後面仲有D乜野人, 同佢地係度做緊D乜.

我唔懷疑行家係同S記有路, 呢個機會好微.  但係做左呢一日就己經好明顯, 我地出左既飛, 同行家打過黎既飛, 時間同大細, 要賭既馬都出奇地吻合.  我地既估計係: 行家收既大飛應該係一個至多個濠江檔口跟我地飛打比行家, 行家就再用折頭價打番比我地.  結果, 我用左手一路出緊既飛既同時, 呢D飛就係我右手一路走番番黎.  呢D飛咁樣走一個圈行家賺一個點子, 行家當然高興, 但係我地實在唔可能長遠咁樣幫佢做落去, 唔再安排過既話, 咁樣既飛只會越黎越多. 查實我地連邊個檔口打飛比佢地我地大約都知道.  行家如果好心水清既話, 佢會留意到佢打比我地而最後跑左出黎果D飛, 絶大部份係開跑前係會大幅落飛既.  心水清既你睇左呢篇野應該會明白點解會有呢一個現象.

做唔到呢D生意但係又唔可以解釋得咁詳細, 都叫做搵到個中間位繼續幫佢地, 但係真係好唔好意思.  事實上, 做行家既生意都好大機會冇錢賺, 只係想多一D生意, 希望第日有第二D可以合作既空間.

同行家飲野, 佢講左一句說話我絶對唔能夠認同.  佢話: 我覺得開檔口唔刨比起刨好.  好多時刨左馬就會個人主觀左, 攪到自己賭埋一份, 明明贏都變左做輸.

我地讀書讀做生意時會提過一個概念叫key success factor KSF.  好多生意你研究過晒佢點解會賺錢之後, 其實佢成功之道只係得一個.  個決策者要好清楚佢自己個生意既KSF係乜.  簡單黎講, 個生意有一日冇左個KSF既話佢就會攪唔掂.

我老板呢盤生意, 比著一個做開濠江檔口既人, 佢一定會話: 嘩, 你用市場價收飛但係用馬會九折出, 差成幾個點子死叉梗啦.

我地公司, 計馬刨馬既人加埋大約五十個.  我地以我地對賽馬既知識而自豪.  我地既KSF就係刨馬.  我老板其實好唔明點解濠江咁多個檔口都唔搵一個識馬既人幫手.  同樣地, 我老板亦都唔明點解行家既檔口如果係收打比我地呢D飛既話, 點解行家可以生存到.  估佢地係打呢D惡既飛出黎而收其他飛掛.  我同行家係好朋友但係呢D野我都唔會問佢, 我諗問佢佢都唔會答.

有朋友仔可能會問: 既然你地刨馬賭馬叻, 咁點解你老板仲要開檔口?  自己係屋企日賭夜賭咪得囉?

問得好.  其中一個事實係: 冇錯, 如果我地將收飛同出飛兩個生意既錢分開既話, 我地出飛係賺得多過收飛既; 即係話我地賭係好過受.  事實上, 我地覺得任何檔口如果佢可以用市場折扣價出飛同收飛, 一定係賭著數過受. 

但係另一個事實係: 我地收飛係可以幫助到我地賭馬.  如果我地唔係有收飛既話, 我地賭馬唔會賺得而家咁多.  收飛有幾個好處: 我地可以睇到人地買緊乜, 了解市場既flow of money,  仲可以賺到人地買一D輸Q梗既馬既錢.  高層次D就開始要講控制飛既penetration(簡單黎講, 我越多飛在手我就越容易控制到個賠率).  要講呢樣野就開始離題, 唔講咁多; A仔一句說話講晒呢個概念既精髓: 如果世界上所有既人都同我買飛既話, 我就必定穏操勝劵.

我有好多香港既朋友仔都有睇我寫野.  我自己其實唔主張一個人身在香港境做一D犯法既野, 包括同檔口買折扣飛甚至乎自己收下飛做下檔口仔.  你問我既話, 個風險同回報根本完全唔值得去冒呢一個風險.  我係唔鼓勵你犯法之下, 我覺得你如果能夠搵到係香港境外朋友仔幫你手落注既話, 咁就心安理得好多.  如果你能夠搵到方法身在境外投注, 我就鄭重建議你一定要搵方法買折扣貨.  有折扣係會比到自己一個大好多既贏面.  有D時候如果我地公司冇得買折扣貨既話我地都要輸.  其實係外國人地賭馬幾十年黎都有句說話叫shop for price.  你盡量行晒咁多個檔口搵一個最好既價錢去買你想買既野.  只不過係我地係香港長大一直以黎都係得一個檔口冇得揀.

希望馬會唔好太唔鐘意我講以上既說話.  我而家己經好少身在香港我又唔怕講呢一個事實, 只係香港馬會唔係好想太多人明白呢一個道理啫.