係21裏面, 米奇係MIT Team既主腦.  佢負責招攬新人, 訓練隊員以及處理成個隊伍既日常運作.  套戲臨尾佢仲有份自己玩埋一份添.

你可以話:

1. 真人米奇係三個人黎;
2. 真人米奇係一個人黎;
3. 真人米奇冇呢個人.

我覺得三個答案都係啱既.

套戲既背景係大約94年, 但係用呢種方法去數牌黎贏賭場錢, 其實早係80年左右己經有人咁樣做.  90年左右, 有人係MIT諗到用呢個方法大規模咁贏賭場錢; 佢寫好一份proposal搵投資者, 用大公司既管理方法去管理同經營呢一門生意, SI就係咁樣形成.  亦都係因為呢個原因, 有D人認為米奇就係攪SI呢一個人.  實質上既情形唔係咁簡單.

MIT Team係唔同既年代, 係有唔同既人去做個集團既主腦.  主腦既工作就好似21套戲咁樣形容: 安排隊員既出擊, 管理同訓練新隊員, 同投資者交代等等, 就同一間大公司的CEO差唔多.  係八十年代尾至九十年代初, 公認既MIT Team主腦其實主要有三個人, 上面講攪SI呢個人只係三個裏面既其中一個.  有一段時間係由兩個人一齊拍擋做主腦, 佢地叫co-manager.  所以, 亦都有人覺得真人米奇其實係三個人, 21裏面既米奇其實係呢三個人既混合體.

我自己就比較鐘意第三種睇法: 米奇係搵戲黎做, 現實係冇真人米奇呢個人.  主要原因係因為: 以上講過既呢三個人, 其實冇一個係一個教授.  其中一個, 雖然係做過MIT Team既主腦, 但係佢根本都唔係MIT既人黎, 佢黎自哈佛.  所以我既態度係: 套戲既編劇根本冇乜研究過集團主腦係點樣樣既一個人, 佢只係靠其他人(例如真人Ben)講下集團主腦大約會做D乜, 跟住就就住自己套戲既需要創造左米奇呢一個角色.

SI公司係成個MIT Team故仔裏面係好重要.  數牌技術八十年代己經有, 但係只係一D有識之士單人匹馬自己一個人同賭場死過.  SI係第一次有人有系統咁用數牌技術去打底賭場; 除左搵投資者出錢之外, 主腦同小部份既成員都試過有份做SI既投資者.  去到九十年代既時候, 最高峰既時候MIT Team有大約六十人, 分成五個小隊去狙擊賭場.  有舊成員講過, 21套戲講既MIT Team事件, 其實只係成個事件既冰山一角.

你可能會問: 咁會唔會幾個小隊一齊去同一個賭場玩?

簡單黎講, 個主腦梗係盡力唔好咁樣去安排啦, 幾個隊伍一齊係度等機會, 跟住機會一黎就一齊飛過去坐係同一張枱度玩, 你話個賭場會唔會唔知?

問題係: 用咁樣既技巧去贏賭場錢既, 並唔止得MIT Team一個組織.  MIT Team亦都要面對有同行爭食既問題, 當然亦都攪到佢地想做既野更加難.

MIT Team並唔係歷史上最搵錢既廿一點隊伍; MIT Team死左之後有另一支被喻為史上最勁既隊伍殺到花旗國既賭場一頸血; 佢地既事蹟成為左本書既作者之後寫既第二本書既藍本.  新書既野呢套戲就冇講過嘞, 你得閒既話就自己去搵番本書黎睇啦.

又有朋友仔問過: 咁點解佢地唔試下去Vegas以外既其他賭場搵下食呢?

全對.  因為有以上既問題, 真實既MIT Team後黎都發展到去花旗國唔同既城市同地方去搵食.  特別係一D新開既賭場同埋賭船, 好多時因為啱啱新開防守仲未做得好好, 再加上新開既著數吸引新客去試玩, 咁就比MIT Team殺到一頸血.  花旗國大大小小既賭場去過晒之後, MIT Team亦都試過去波多黎各同一D歐洲大D城市既賭場玩過.  效果只係一般: 歐洲好多時佢地個廿一點遊戲玩法會有少少唔同, 同埋始終D成員係學生, 禮拜一就要返學, 唔係好方便去好遠既地方.

係時間講下MIT Team最後死既原因:

第一, 己經提過, 數牌技術係比到賭客最多大約2%既優勢, 但係因為波浪理論既關係, 依然係可以有好大既上上落落, 黑起上黎都仲係會個個禮拜都輸, 連輸N咁多個禮拜.  投資者大把錢就冇所謂, 有份自己投資果D, 輸得咁上下都會有D痛.

第二, 一直至到套戲既年代左右, 呢一班成員都可以話係精英中既精英, 玩得好之餘又會幫下手搵下教下新既成員, 個個都好Q投入, 仲投入過自己返學讀書.  呢一個黃金時代過左去之後, 新既一班攪手同成員, 佢地己經冇呢班人咁勁同咁投入, 成績己經冇佢地咁好.  有時呢D野, 除左為左搵食之外, 你係真係要愛上你既工作至得.

第三, 一D核心成員同主腦, 搵到一D錢之後就開始諗攪第二D野.  其中一個主腦94年離開左MIT Team之後大攪地產生意勁掂.

第四, 當數牌技術越黎越成熟之後, 越黎越多人數牌, 賭場亦都越黎越清楚佢地係度做緊乜.  加上GI做既野既幫助, 好多賭場都對呢種集團式既玩法多左留意.  特別係MIT Team呢一種BP玩法, 係開局幾條友仔買最細注, 突然係中局有一條友走過黎買到盡晒個上限, 好多有規模既賭場都會即刻睇下係咪又係果幾條友黎.  有時佢冇唔比你玩之下, 一買得大就有經理加上保安企係你左右兩邊睇實你玩比壓力你, 佢冇唔比你玩之餘你自己都識得知難而退.  真人Ben果D MVP就連去到亞洲一D新開同從來未去過既賭場, 都係佢一行入去就有保安行過黎請佢走.

真人Ben係大部份既賭場唔比佢玩之後就離開左個隊伍, 之後MIT Team亦都冇以前咁有名, 但係一路直至踏入二千年都仲係有人用呢個技術去玩廿一點.  到左今時今日, 用晒蝸牛機之後, 都仲係有人周圍去, 用一D全新既技術去打敗呢個遊戲.  但係呢樣野己經離開左個話題, 我唔想再講太多.  就用以上呢幾篇文章去比一個角度比大家去睇呢個我至愛既賭場遊戲.

寫左呢幾篇野, 有讀者寫過email黎懷疑過我係咪係度老作緊, 點可能會知道MIT Team咁多野; 又有讀者問過我係咪曾經做過MIT Team既成員, 或者同一D成員好老友.

我係有係濠江經常玩廿一點, 但係唔係用套戲講果種數牌技術; 濠江既賭場清一色己經用晒蝸牛機, 你根本唔會可以數到一個count出黎.  我唔係亦都未試過係MIT Team 既成員. 

我咁樣答呢兩個問題啦: 身邊我既好朋友都會知道, 我九十年代頭去左加拿大讀大學.  因為移民既問題, 我老豆當年每逢暑假同聖誕都會飛去加拿大入一入境, 果時我地都會係LA探下親戚, 跟住老豆就會同一個uncle租一架車, 由LA開車去Vegas玩幾日.  我中學最好個同學, 同一時間就係MIT讀建築, 我都有去探過佢.

其他野你自己諗啦.

MIT Team成員當賭場唔再比佢地玩廿一點之後, 佢地係咪就咁退出江湖呢?

有時一個人爛賭真係冇得救架, 點都係要有得賭至會舒服.  今年WSOP World Series of Poker, 有一個event(唔係main event)既final table, 果九個參賽者裏面, 居然有三個係MIT Team既舊成員.

每個人人生都會有唔同既人生交叉點; 你係個交叉點揀左一條唔同既路既話, 你以後既人生就會唔同晒.  我人生中可能以前有過一D交叉點, 我揀左另一條路既話我己經係一個職業既廿一點手.  但係我而家, 同埋以後可見既將來都會係職業賭馬.

世界上有另一個人, 好早就環遊世界以數牌為生, 搵到佢以為好多既錢.  點知係路途上遇上一D賭仔, 大家一拍即合, 佢地幾個就黎左香港開始以賭香港馬為生, 二十年黎係香港呼風喚雨, 比馬會唔比佢賭跟住又開番個戶口比佢, 同舊拍擋分開左之後, 自己賭到被喻為世界上其中一個最成功最有錢既賭馬人.  佢同我老板戰鬥多年, 到我係濠江幫老板手之後, 都居然同呢個歷史人物交手過幾次.  雖然從來未認識呢個真人, 但係都叫做見過佢既足跡.  呢個人叫做老虎仔.

呢個世界真係好細.