戲裏面既亞Ben係一個窮家子弟, 想去Harvard  Med School但係冇錢, 老豆早死, 老母比錢佢又唔要, 所以就比學校教授睇中左搵佢加入MIT Team搵真銀.

真人Ben家境其實唔錯, 一定夠錢去讀自己想讀既野.  老豆健在, 老母冇比過支票佢.  21套戲首映禮佢仲帶晒成家人去睇添.  佢都有諗過去讀Harvard Med School, 但係最後冇去唔係因為冇錢, 係因為廿一點.  佢諗黎諗去都係覺得廿一點會好搵過做醫生.  佢加入MIT Team唔係因為敎授, 係因為朋友介紹, 果個朋友就係21套戲既另一個BP飛沙.

戲裏面既亞Ben面試申請獎學金既故仔從來冇發生過, 果段戲完全係為左講故仔至會有.  仲有搵戲黎做既係敎授說服佢加入MIT Team既事件; 其實係大學好朋友飛沙(飛沙係本書裏面既名黎, 戲裏面唔記得左叫乜)叫佢入隊, 佢亦都唔洗點說服, 好快趣就入左.  戲裏面既亞Ben要唔比身邊朋友同屋企人知佢做乜; 真實情形係好多時MIT Team隊員會積極叫身邊既朋友入隊, 個個都會知道佢地做乜.  試過有成員掉番轉叫左佢自己個敎授入隊玩添.

真人Ben係好醒目既人, 唔會好似戲裏面個亞Ben咁解釋完條數學問題都係得佢自己同個敎授明, 仲要低能到將咁Q多錢放係自己個房個天花板度.  佢而家全職攪自己既生意, 將美國體育波盤當股票咁炒.  真人Ben係21套戲既顧問; 唔止做顧問, 佢仲客串做左一個大茄哩啡添; 睇睇你認唔認得出邊個dealer係佢.

真人Ben冇玩過機械人比賽, 不過真係有好多MIT Team成員有玩過, 真人Kate(即係戲裏面亞Ben個女朋友)差D贏埋添; 佢個機械人最後關頭壞左, 唔夠時間整番, 勁慘.  雖然真實冇贏過機械人比賽, 但係就真係有好多MIT Team成員試過有機械人比賽既情形: 因為入左隊之後成日都要去Vegas, 所以本來同同學合作攪既project全部都冇時間參與, 比同學小到飛天.  有一個隊員個project真係係佢離開左之後贏左冠軍.

講起真人Kate, 真人Ben同真人Kate從來冇拍過拖, 更加冇攪過野.  事實係真人Ben招攬真人Kate同佢當時既男朋友入隊.  真人Kate同佢男朋友後來結左婚跟住又離左婚.  真人Kate後黎再婚既時候個婚禮都係係Vegas舉行.

真人Ben既至愛係疊球; 戲裏面既事件完左之後佢仲有返去MIT打疊球, 戲裏面呢班朋友果隊波, 真人Ben係隊長.  套戲好似一D疊球都冇.

戲裏面既飛沙係一個廢柴, 真既MIT Team點會有D咁既人做到BP呢?  真人飛沙唔止醒目, 佢招攬真人Ben入隊仲訓練埋佢添.  真人飛沙離開左MIT Team之後, 04年贏左一個世界性既廿一點比賽冠軍.

個賭場警察Cole係冇真人版本既.  唔係話真實冇賭場警察, 而係Cole呢個角色唔係base on 一個人.  正確黎講, 真實既Cole係一個組織; 但係套戲就做到好似全個Vegas得佢一個人識得捉識數牌既人咁樣.  因為Cole唔係真係base on 一個人, 呢個角色就過份得好緊要.  如果今時今日任何賭場有一個Cole咁樣做野既人既話, 呢個賭場已經好唔掂, 肯定比人告到佢甩褲.

套戲裏面, 個Surveillance manager知道Cole識得數牌好似好驚奇咁.  查實好多Pit Manager其實都某程度上知道數牌係乜野既一回事.  佢地未必自己識得數牌, 但係佢只要知道數牌既人點樣做野就已經可以, 特別係係Vegas做野既人.  一旦發現到有可疑既人, 佢地可以要求Surveillance Manager做一個skill check.  Skill check 係用電腦精確咁計算一下某一個客人佢過去既行為似唔似數緊牌, 同埋佢玩廿一點玩得如何.  MIT Team係識得用一D技術去掩飾佢地數牌既行為, 但係呢D行為係會降低佢地原本已經唔高既margin.

全世界既賭場都可以買一本書叫GI Book.  GI係一個專門打擊數牌同其他係賭場既罪行既機構黎.  真實既GI有一個綽號"銀狐"既偵探, 用左四五年既時間去跟MIT Team既所有行為, 係MIT Team事件後來廣為人知既功臣.  GI Book被賭場用左之後, 書裏面既人好多時仲可以入去賭場, 但係賭場就唔歡迎佢地玩廿一點, 玩第二D野就得.

戲裏面Cole將亞Ben打鑊甘既事件, 係70至80年代初既賭場係時有所聞; MIT Team就未試過比人咁樣打法, 但係今時今日係落後一D既地方都仲係會有咁樣既事件.  被賭場捉到數牌既人通常會比賭場幾粗暴咁對待, 影晒相同搜身, 只係唔會丙佢.  一捉到被懷疑數牌既人, 賭場會比呢個人機會去搵律師同警察.  如果呢個人有充份準備既話, 佢一早就知道要搵邊個律師.  呢類型既case唔係普通律師可以應付到, 係花旗國係有專門做呢D case既gaming attorney既.  千祈唔好靠警察, 報警係嘥氣既; 警方通常都係會幫個賭場, 盡量唔會理你, 當冇事發生過就算.  賭場放人之前會警告呢條友以後唔可以再黎佢地賭場玩廿一點, 甚至以後唔可以再行入佢地賭場.  有一個賭場將你既資料放左入GI Book之後, 所有賭場對你既待遇會係一樣.

有一個MIT Team既成員試過離開左隊伍好耐之後, 去左一間新賭場度陪人地玩廿一點.  佢玩左一鋪買左十蚊美金, 就有個保安走過黎叫佢起身唔好再玩, 手上面有一張傳真有佢個樣.  記著係十蚊美金.

GI早幾年已經破左產; 可能係其中一個玩廿一點最勁既人JG多年前告佢地同賭場賠左幾十萬比佢, JG呢鑊仲好搵過真係落場玩廿一點.  GI雖然破左產但係到而家都仲有運作.

之前提過, 真人Ben既黃皮膚係當年點解MIT Team睇中佢既其中一個理由; 90年代賭場裏面數牌既人多數係白鬼黎.  戲裏面呢一隊MIT Team, 其實主要係以黃皮膚既人組成.

本書裏面提過將錢放係身上甚至乎底褲裏面既事係真既.  呢樣野反而就係94年會做到; 今時今日911之後既花旗國機場就好難比你咁樣運到咁多錢上飛機.  本書裏面仲有講其他既收錢方法, 包括空心既雨遮, 空心既電腦袋等等, MIT Team都冇用過, 又係老作既.

仲有一個勁有趣既人物就係個敎授真人米奇.  但係一講起佢就要講好多MIT Team既真實運作情況, 留番下一期至講.  用餘下既空間答番兩個讀者來信.

有人問我: 佢真係冇時間搵番本書黎睇, 可以可以簡單講下本書同套戲有乜野唔同, 同本書有乜野係真同假既.

簡單黎講, 本書有真實事件既一半左右, 21套戲又再有本書既一半左右.  套戲有講個賭場轉晒D籌碼之後, 主角同敎授搵D囡囡幫手去將D籌碼換番做現金, 呢樣係抄書既.  真實係: 完全冇咁既事.  事實上, MIT Team其實係Vegas係有一個籌碼既儲備, 佢地唔會次次將籌碼換番做現金, 唔係就會好煩.  戲裏面咁樣用囡囡排大隊換籌碼其實現實係做唔到.  花旗國既賭場如果你想換多少少籌碼做現金, 個賭場已經要你出示身份証明文件(因為你贏錢既話可能要交稅), 同埋佢可以要你証明你D籌碼係點樣贏番黎.  你完全冇玩過而有好多籌碼既話, 賭場係可以查你.

本書同真實情況最唔同就係個結局: 係本書裏面, 賭場派人去搵番D成員, 一個一個咁去恐嚇佢地: 主角個好朋友比賭場既人逼佢吞左一個籌碼落肚; 之後主角返到屋企見到屋企枱面有人放左一個籌碼係度, 佢就退出江湖.  完全冇咁樣既事發生過; MIT Team點解會解散………下期至講.

有人問我: 既然MIT Team既成員識得數牌可以膁錢, 點解佢地仲要做其他既野?  如果我識數牌既話, 點解我仲要賭馬?  點解世界裏面既人唔個個走晒去數牌?

有D野以前講過, 又有D野以後會講.  我淨係答番佢最後果個問題啦.  雖然大約提過但係再組織一次好D.

數牌係可以做到長期贏賭場錢, 但係普通人唔會去學數牌, 主要原因有四個:

第一, 普羅通常會覺得數牌好難.  佢未試過未練過就已經放棄左.  簡單黎講, 有正常智慧既人應該都可以學識數牌, 幾十個鐘頭就應該可以學好.

第二, 懶惰.  唔洗解釋掛?

第三, 悶.  我識得唔止幾個聰明絶頂既人, 學完或者睇完點樣數牌之後就放棄左.  職業廿一點賭客既生活其實係好Q悶既, 為左生活賺錢而不停去做同一個動作.  好多成員做左一陣就唔玩都係因為呢個原因.  套戲裏面就講到D成員既生活好精彩.  梗係, 劇情需要嘛, 拍D好悶既野出黎搵鬼睇咩?

第四, 亦都係最重要既一點: 搵唔到錢.  應該話: 考慮到放入去既時間同心機之後, 搵到既錢太少.  數牌係可以搵到錢, 但係個優勢比起個賭場仲係好微, 要好長線至可以睇到個成果, 同埋要頂到中間個波浪.  簡單黎講, 你要有大約兩萬五蚊左右, 就可以做到長線贏廿蚊一個鐘.  對好多人黎講, 如果佢有兩萬五蚊既話, 佢已經有其他辦法去搵廿蚊一個鐘.  廿一點唔係佢唯一一個賺錢既辦法, 佢只係要決定點樣去搵佢想要既錢.

MIT Team既成員搵到既錢, 其實比起好多人想像中少好多.  其實搵到最多錢既隊伍唔係佢地; 數牌既隊伍亦都唔止佢地一隊.