話說好朋友阿加汗睇完21套戲, 同我講話佢既感覺同我差唔多, 都係覺得Ocean's Eleven好睇好多.  阿加汗本身唔係數牌既人, 不過間唔中都會去賭場玩下.  佢用”誤導”兩個字黎形容套戲, 佢唔識數牌都知道呢套片有誤導既成份.

我同意佢既睇法, 最大問題就係我提過套戲既”識得數牌就等於識得印銀紙”感覺.  玩廿一點同玩poker一樣可以贏到錢, 英文叫grind.  贏到既錢係捱出黎既.  係套戲裏面, D錢黎得太容易lu.

作為一套有關廿一點既戲, 21實在太過唔廿一點.

套戲一開始就攪到我唔開胃; 套戲話:

“The objective of the game is to try to get as close to 21 as possible without getting over……”(遊戲既目的係盡量接近二十一點而唔好爆煲).

唔係掛?  個遊戲既目的係要比起個莊更接近二十一點而唔好爆煲.  兩樣野差好遠架喎.

關於套戲既時代背景, 唔同人會有唔同既睇法.  套戲取景自四間賭場: Red Rock, Hard Rock, Planet Hollywood 同Riviera; 我認得既就係呢四間, 唔知仲有冇漏.  你睇套戲既話, 基本上套戲既時代背景係而家, 雖然我知道實際事件發生係94年.  Red Rock我冇記錯係06年開, Hollywood就係上年; 當年MIT Team當然唔會係呢兩度玩過.

我冇記錯既話, 本書都有同樣的問題: 本書話主角第一次搭飛機去摶殺既時候, 從架飛機上面可以見到Stratosphere; Stratosphere係96年至開.  我94年大學畢業去過Vegas, 未有Stratosphere.  如果你既睇法係完全當套戲係假既, 唔需要同真實有任何關係, OK呢D野唔會影響你.  但係對我黎講就攪到一路睇一路條氣唔係好順.

例如: 主角第一次去到Vegas, 落機後見到佢地架車經過好多城內著名既賭場, 最後到逹Hard Rock.  實際上係: 唔單止D著名賭場既shot係亂晒籠, 仲要Hard Rock其實就係係機場旁邊.  要由機場坐車去Hard Rock根本就唔會經過市中心.  架車要兜鑊甘至會做到戲裏面主角架車行果條路.

我知, 有人會話我唔洗咁高要求掛,  但係我睇既時候真係覺得好好笑.  點解要借呢幾間酒店黎拍呢?  我冇估錯既話, MIT Team當年有份去玩既賭場應該全部都唔肯借比佢地拍野.

如果呢樣野我唔介意既話, 有一樣野我好介意.

佢地出發搭飛機既時候, 兩條囡係度傾計話: Splitting eights against ten is a sucker bet (對住莊家公仔面分一對八係傻仔至做).

唔係掛?

呢個係全套戲唯一一個同基本策略有關既位, 但係答案係錯既.

如果你攞一對八對住公仔面, 你要牌既話, sorry.

如果你攞一對八對住公仔面, 你唔要牌既話, sorry.

如果你攞一對八對住公仔面, 你投降既話, 都OK, 我當你唔識數牌既話, 起碼比起要牌或者唔要牌好.

如果你攞一對八對住公仔面, 你分門既話, well done.  特別係濠江玩, 莊家攞blackjack會比番分門同加注比你既話, 死都分.  我成日都咁做.  次次咁樣做隔離就會有D人用唔係好友善既目光望住我.  間唔中都會有人出聲: “喂, 個莊攞隻公你咪香晒囉, 仲分? 你識唔識玩架?”

睇下我鐘唔鐘意條友啦, 唔鐘意既話我通常都會答: “係呀, 我想比隻公個莊整死你嘛.”  激到條友仔彈起.  有時條友仔會慶到即刻起身唔玩, good, 終於可以自己一條友同個莊單挑, 想你起身好耐lu.

如果你仲要問: "乜咁樣分一對八, 唔係輸既機會好高咩?" 係呀, 都仲係輸架, 不過已經係上面你可以做既四個選擇裏面輸得最少既一個.  有時個dealer都會話: “嘩, 邊有人咁樣分一對八架?”  咪就係得我同另外幾條友囉.

有樣好細微既野, 唔會好多人留意到.

主角亞Ben去左唐人街一個地下賭場做終極測試(呢樣係抄本書既, 實際係本書個作者老作, 真實係冇呢個地下賭場), 亞Ben數到+17, 跟住比人笠住左, 係咁問佢而家係幾多, 佢答話係+18.  我第一次睇既時候, 感覺係: +9定+10至係掛, +17 之後係咁出大牌喎?

算啦, 當係其實都有好多細牌出左佢冇影到.

但係有樣影到既野真係好唔妥.

亞Ben第一次係Vegas玩既時候, 佢想分一對牌, 佢就自己用手去分開佢地.

你試下去濠江用手去掂下D牌你睇下會點.  唔好話掂D牌, 局牌開始左之後, 你想掂下你個籌碼都唔得.  小心個super攞把菜刀出黎軌斷你隻手佢.

亞Ben係自己個房裏面對住塊鏡, 一路扮晒野一路話: “今晚鐘意就買半mil一鋪……”  同樣有好幾次影亞Ben玩緊個幾門D籌碼既close up shot, 好似係兩千蚊一粒, 三門每門都買左十幾粒.

有去開濠江既朋友仔, 你搵到濠江有一張廿一點枱你可以買到半mil美金一鋪我話你叻.  套戲裏面提過既銀碼, 大約比起真實情形大左起碼五至六倍.  MIT Team多數買兩千蚊一鋪, 有時一千.  你上去永利寶頂樓有個貴賓房叫Sky可以買到咁大; 我上次有機會上去見到條友買十二萬港紙一鋪, 個條友個老豆係永利寶個老板個friend, 佢有份借錢比老板起永利寶既.

我當MIT Team肯買咁大, 你話MIT Team會唔會上去貴賓房比個賭場十幾條友望住你一個人係度數牌?

亞Ben仲要有時玩完比貼士個dealer.

MIT Team永世都唔會比貼士個dealer.  講過好多次, 個margin已經係好低, 你其實係唔夠錢去比貼士; 同埋比貼士其實根本唔會有任何好處, 個dealer唔會因為你比貼士而有好處比你, 佢只係打一份工.

我睇套戲既時候, 其實我已經知道, 套戲搵左真人Ben(男主角個角色既94年原裝正版真人)黎做顧問.  我一睇完套戲既時候, 我真係諗左好耐點解會有咁多錯誤.   真人Ben點攪架?

真人Ben係一個絶頂聰明既人, 呢D錯誤唔會係佢眼中走得甩.

我而家既諗法係: 真人Ben只係一個顧問, 套戲既人問佢乜佢就答乜, 但係佢唔係真係拍呢套戲出黎既人.  拍戲既人始終有一套佢地做野既方式, 佢地想拍乜出黎, 唔洗亦都唔會問真人Ben.  所以, 我其實唔應該太過認真.  真人Ben拍一套關於廿一點既戲既話一定唔會攪到咁.

我甚至乎覺得: 一對八分門果個對話係佢地特登放係果個位.  都係唔好咁多人分一對八好D.

網上有網友唔滿意戲裏面個亞Ben唔夠真人Ben勁, 幾乎要抗議同罷睇套戲咁滯.  連真人Ben都要走出黎同人話: 唔緊要, 我又冇話過要亞發哥定邊個做番我個角色, 而家咁幾好呀.  網友其中一樣好唔滿意既野係: 係套戲裏面, 亞Ben變左一個鬼仔.

其實, 真人Ben係黃皮膚既,  佢既黃皮膚係當年點解MIT Team睇中佢既其中一個理由.