21套戲我覺得有一樣野應該要講得清楚好多:

數牌唔等於出千.  數牌係完全100%合法既.  唔止係我咁樣講, 美國內華逹州法庭都係咁講.  法庭話: 數牌係一個用技術同智慧去擊敗廿一點遊戲既方法.  賭場如果輸錢比聰明既人係自己攞黎, 個賭客係完全冇犯法.

就係呢個原因, 至會有MIT Team.  MIT Team唔係一D犯罪集團黎.

數牌可以話係(係呢一個好細個既圈子裏面)最成功同最普遍既廿一點技術.  你可以睇下我以下講數牌既做法, 同你係21裏面見到既做法有乜野唔同.

先講下點解數牌會贏到個莊.

正常一至六副牌, 你用完美基本策略, 你會係長線黎講輸比個莊唔夠一個百份點.  但係有一個情況, 你既贏面係會大過個莊家既:

如果你知道: 黎緊係會有好多大牌.  簡單黎講, 越多大牌, 個莊爆既機會越大.  我好多時十二點就唔會要牌, 但係個莊係一定十六點仲要搏牌, 佢冇得揀.

係數牌裏面, 大牌同細牌係有定義既.  23456係細牌, 10JQKA係大牌, 789係中性牌, 當佢冇到就得.  大牌同細牌每樣剛剛好有五款.  細牌我地比一個count佢+1, 你每見到出左一隻細牌就應該開心D.  大牌係-1, 少左一隻會幫你手既牌.  副牌洗完開始玩就係零, 你就開始係咁數, 例如第一鋪, 你玩兩門係J7同26莊係8, 個count 就係+1.  係套戲裏面, 亞Ben一日到黑係度數既就係呢樣野.

識得count都係唔足夠贏錢.  簡單黎講, 當個count係+15, 即係黎緊未出既牌, 大牌多過細牌15隻, 但係如果個shoe(shoe即係莊住D牌等個dealer易D派牌果舊野)得番25隻牌未出, 你都好肯定黎緊一兩鋪係會出大牌.  但係如果個shoe仲有成250隻牌未出, 咁出大牌既機會就冇咁大.

睇到呢度, 你應該明白到點解係濠江係數唔到牌, 如果唔加其他技術既話.

所以, 仲要計true count TC.  TC=count除以大約仲有幾多副牌未出.  例如如果你玩緊個賭場係用六副牌, 你見D牌總共用左一半左右, 即係得番三副未出, 咁TC就係count除以三.  你可以理解TC做"係未出既牌裏面, 平均每出一副牌大牌會多過細牌幾多隻”.  用番頭先個例子, 25隻牌係半副牌, 所以TC係15除以0.5, 等於30, 係世紀訓身好機會, 張枱個上限係幾多你開晒咁多門買晒落去啦.  但係250隻牌係五副牌, 所以TC係15除以5, 等於3, 仲係只係玩緊基本策略買最低投注額, 唔可以出擊住.

講下啫, 得番25隻牌個莊已經洗緊牌啦, 仲邊會有得玩.  但係你過年去人地屋企用一副牌玩就可能會有呢D黃金機會.

數牌已經講完.  數牌其實有好多種system, 上面講既HiLo係Level 1最簡單既一個.  但係唔好睇少佢, 好多專家都覺得咁多種system裏面, HiLo係最好用.  難度高D既system, 要數多好多野之餘, 個著數係細得好緊要, 唔係好值得.

賭場當然唔係低能仔, 你鋪鋪買一門最細注, 突然買幾門買到爆晒孔(孔即係個上限), 你仲唔係數緊牌?

所以, 就有你見到係21裏面呢個做法, 呢個係公認最成功既擊破賭場既方法.  一定要有多過一個人合作至做到.  就當係兩個人合作去做, 一個叫spotter SP, 另一個叫big player BP.

SP坐落是但一張枱度開始數牌, 買最細既注碼, 用基本策略.  BP就會周圍行, 等SP比手勢佢.  係套戲裏面, 如果MIT Team咁樣既一個隊伍, 好多時係會有一個BP幾個SP, 因為等某張枱個count上到十幾係要等運到既.

SP數到TC去到十幾覺得係出擊機會既話, 佢就會做一個手勢暗號, 個BP就會坐落黎開始玩.  SP同BP全程唔會有眼神既交流, 唔會好似套戲咁個SP會做完手勢跟住望下BP.

BP通常都係扮晒野, 扮係果D買到好大, 有好多錢掉落海既有錢仔, 又或者扮開完P飲多左兩杯走左黎玩兩鋪果D友仔.  記住, 只係扮.  BP係一定唔會真係飲酒開工既.

BP坐低左之後, 通常SP會即刻起身走離開, 今時今日扮聽電話之類就係最好既借口.  通常SP同BP唔會好似係21裏面咁坐埋係同一張枱度一齊玩.  兩個原因: 大牌係好寶貴既牌黎, 你唔會想個SP係度玩基本策略用咁一D牌, 同埋更重要既係個賭場成日見到呢兩條友仔坐係同一張枱度一齊玩既話, 就會好容易比個賭場發現你兩隻野係度攪乜鬼.

同套戲一樣, SP會用暗號話比BP聽個count係幾多.  通常個set暗號係會間唔中轉下去攪亂個賭場.  套戲裏面用果set暗號係真正MIT Team當年真係用過既:

+1  Tree  個一字好似一棵樹

+2  Switch  一個燈制得on off兩樣揀

+3  Stool  凳仔通常得三隻腳

+4  Car  四個輪

+5  Glove  手套有五隻手指

+6  Gun  一支槍有六粒子彈

+7  Craps  玩花旗骰最唔想擲七

+8  Pool  玩pool入八號波就贏

+9  Cat  一隻貓有九條命

+10  Bowling  十個瓶

+11  Football  踢波一隊十一個人

+12  Eggs  一盒雞蛋有十二隻

+13  Witch   十三不祥

+14  Ring   十四K戒指

+15  Paycheck  鬼佬公司好多時十五號出糧

+16  Sweet  甜蜜十六歲

+17  Magazine  年青人雜誌個名

+18  Voting Booth  十八歲可以投票

有陣時個BP係唔會自己數牌既, 咁SP會留係度繼續數牌, 比手勢佢叫佢幾時個count跌番落去要起身走人之類.

再講一次: 數牌唔難.  一個正常智慧既人係絶對可以數到牌既.  入得MIT既學生, 當然數牌難唔到佢地.  係賭場裏面數牌係難好多, 但係都唔係最難.  最難既係: 點樣唔比賭場知道你係數緊牌.  要學好基本策略同一套簡單既數牌方法, 大約四十至五十個鐘就可以.  MIT Team既成員要練熟數牌同通過到終極測試大約要練一百個鐘, 反而背好上面D暗號就可能十五分鐘就攪掂.

唔知點解, 套戲就啱啱好掉番轉, 數牌最重要既基本策略幾乎一D片段都冇, 但係就用左好多時間睇佢地練暗號.

其實, 如果數牌係我講到咁易, 呢個世界係咪有好多人識數牌呢?

究竟有幾多人識數牌, 呢D野當然冇官方既數字.  一黎係要睇下你點樣define乜野叫識數牌既人.  例如, 你而家睇完我上面寫既野算唔算識數牌呢?  有一D人係日日全職係賭場數牌搵食既, 以至到有D 人係逢星期六日就會去賭場練下數牌, 當係一個side income, 我都會叫佢地做識數牌既人.  你淨係睇完21或者睇完我上面寫既野既話, 我唔當你係識數牌既人.

如果好似我咁樣define既話, 我自己就識十幾個識數牌既人.  業內估計, 任何一個時間有係賭場數牌搵食既人, 全世界大約有二百至五百個.  應該唔會少過一百同大過一千.

有唔少人, 睇過一D書或者一套咁樣既戲就以為自己識得數牌.  你會出奇地發覺想學數牌既人係勁懶既.  好多時佢地真係睇一本書跟住就去同賭場死過, 買得大過自己應該買既注碼好多, 結果好快趣, 波浪理論會攪掂左佢地.

要做一個成功既數牌人, 一定要有好好既bankroll management.  識得數牌只係比多大約2%既著數比個閒, 其實任何一晚既功夫, 運氣係個決定性既因素.  要經過好長既時間, 技術層面至會有成績.  呢樣野英文叫discipline.

我一早就講左, 數牌唔難, 有正常智慧既人都可以學識數牌.  但係有discipline就唔係咁容易.  其實, 我見到有discipline既人通常本身都已經係幾聰明, 所以我至話聰唔聰明其實唔係咁緊要.  跑馬咪一樣?!?!

頭先話過, 濠江D賭場用晒蝸牛機, 咪唔可以數牌囉?

答案係: 啱, 以上既數牌方法唔可以係濠江用, 呢個亦都係點解大賭場一定會用蝸牛機既原因之一.  防止數牌係蝸牛機既第二大用途.  第一大用途係: 用左蝸牛機賭場就唔洗隔一陣就停低洗下牌, 阻住進度.  越玩得多幾鋪個賭場就會越贏得多錢.

最後講一樣野:

數牌唔係唯一一個100%合法擊敗廿一點遊戲既方法.  今時今日都仲係有人唔洗數牌, 鋪鋪平注而係可以長期擊敗到廿一點遊戲既.