兩年前左右既今日, 我幫cxwong既新書寫review; 當年仲未有1702, 我果時係係小田個留言版度發表既.  估唔到兩年後既今日, 我會幫一套關於我係馬仔以外既另一個至愛既影片寫review.

要寫決勝廿一點(以後就咁寫21就算), 就一定要先睇埋一本書: Bringing Down the House by Ben Mezrich.  本書八年前(希望冇記錯年份)既時候我記得我係企係鬼佬書局”第一頁”睇晒佢, 果時唔想用錢買黎睇.  本書成為暢銷書之後, 好似係有人送左一張coupon比我, 都係走左去買左本書返黎, 但係冇再睇過.  今時今日要寫呢一個影評, 本書有用既時候就啱啱屋企裝修D野pack晒入箱, 搵唔番本書出黎.  所以之後寫關於本書既野係完全靠八年前睇本書既記憶黎寫, 有記錯少少細節請大家見諒.

如果你對呢套戲真係好有興趣, 我強烈建議你搵番呢本書黎睇, 上次係機場個書局仲見到有得賣; 套戲啱啱上畫, 加印都要攞番出黎賣啦.  21套戲係完全用本書黎做藍本去拍成既.  同樣地, 八年前Ben Mezrich亦都係用94年麻省理工廿一點隊MIT Team既事蹟黎做藍本去寫成既.

我咁樣寫法, 你都應該明白我想講乜.  件事完左六年就寫成左一本書, 本書出左八年就再用本書黎拍成一套戲; 你話套戲得番原本件真實事件既幾多成呢?  如果21話自己係"based on a true story", 我覺得佢話自己係 "inspired by a true story"會好D.

我睇完套戲, 好老實講係失望.

失望, 唔係因為套戲同原本件事相差好Q遠.  我早就估到會係咁, 但係套戲荷里活化左之後應該係要令到廿一點係好玩, 令人睇得開心既.  但係套戲作為一套荷里活既戲, 真係唔好睇.  套戲只係用廿一點做一個題材, 再用其他荷里活大片既橋段抄黎抄去, 做左一套同廿一點有關既片出黎.  我覺得Ocean’s eleven好睇好Q多.

套戲既後半部份, 由個男主角亞Ben發神經輸左廿萬攪到同主腦米奇反左面之後, 個劇本已經都當本書冇到, 為左有一個荷里活式既結局而亂作野, 真實發生既野同呢個結局係完全唔同既.

Cxwong兩年前本書, 佢係做到一個使命: 當年冇一本中文書講得出佢本書講既野, 讀者未必睇完本書會賭馬叻左, 同埋大部份既人根本唔明本書既野講乜.  唔緊要, 起碼本書比讀者睇到用數學去睇賽馬(包括世界首席既電腦奇才)係乜野既一回事, 都叫做學左一D啱既野.

21呢套戲, 我知道佢唔係一套紀錄片, 唔係話佢拍番晒當年發生過既事就會好睇(其實真係咁樣做既話套戲應該會悶到抽筋), 但係我希望佢會拍得出玩廿一點既人既思維係點, 玩廿一點當做生意既話點解會好玩又贏到錢, 日日玩好Q耐廿一點既感覺如何, 同埋可以幫到多D人去正確咁認識廿一點呢個遊戲.

21 做到一樣野: MIT Team既成員, 逢禮拜一至五就係清貧大學生, 一到禮拜六日就搖身一變變左做華麗大賭場既貴賓大豪客, 真係有D似變身做超人咁既feel.  呢樣由低點上到高峰再跌番落低點既感覺, 我覺得21係做得啱啱好, 個感覺係好真.

但係, 就係做到咁多, 其他我想睇到既野全部都冇. 特別係我上面提過既最後一點.

“…同埋可以幫到多D人去正確咁認識廿一點呢個遊戲.”

你如果冇玩過廿一點, 又或者你玩過廿一點但係未接觸過數牌既話, 你睇完套戲就可能會以為識得數牌就等如識得印銀紙一樣, 只要數到副牌true count (以後叫TC) +16以上, 就會鋪鋪你攞兩隻公仔或者起碼A9, 莊家就會15定16再攞隻公.

我又真係上過去一D留言版, 睇到有人真係話睇完套戲, 覺得自己數牌都OK, 想過去濠江贏幾千萬返黎.  唉, 佢連蝸牛機係乜都唔知, 唔係去送死係乜?  唔洗驚, 之後有一期我會係呢度教你數牌, 唔止咁, 我仲會話比你聽點解我敎埋你數牌你都唔會真係去賭場試下數牌.

講到呢度, 我又諗起當年第一次出一本關於廿一點既書時既情況.

係套戲裏面, 亞Ben係上堂定搭緊飛機睇果本書, 書名叫Beat the Dealer, 作者叫Ed Thorp, 1962年出第一版.  呢本書唔係史上第一本關於廿一點既書, 但係佢係第一本講點樣可以係廿一點裏面可以長期贏到錢既書, 同埋最勁既係:

呢本書裏面講既野係完全正確既.

Ed Thorp既基本策略表係用最原始既IBM第一代電腦計出黎, 今時今日用而家既電腦計出黎既野, 都仲係同佢果時計到既結果一樣.  到今時今日, Beat the Dealer都仲係廿一點既天書, 要學識贏個遊戲就一定要先讀熟呢一本書.

本書一出, 好快趣就成為左暢銷書榜首, D賭場仲唔死?  原來廿一點係可以被擊敗既遊戲黎.

當年D賭場真係有好多即刻收起晒D廿一點枱, 又或者改晒D例攪到個遊戲對個閒勁唔著數(例如得11點可以加注之類).  有一排真係冇晒人玩廿一點.  但係D賭場又唔係好高興, 因為一向以黎, 廿一點係一個幾好搵既遊戲黎, 唔識玩廿一點既客, 抽水係可以高過5%, 賭場又點會放棄呢件肥豬肉呢?

漸漸, 有一兩個賭場慢慢開番D廿一點枱, 或者改番用舊例去吸引番D賭客黎玩.  第二D賭場見人地開番, 自己又試下開一兩張, 睇下會唔會比人黎炸.

結果, D賭場史無前例地好生意, D廿一點枱殺到D賭客片甲不留.  乜D賭客唔係應該讀熟晒本書架咩?

原來, 要贏廿一點就一定要識數牌.  數牌唔難, 但係要係賭場環境裏面數到牌, 同係自己屋企裏面數到牌係兩回事.  仲有, 數牌唔係一D理論性既野黎.  個理論唔難, 但係一定要好熟練至會可以幫到你提高勝算.  頭先提過睇完套戲就去濠江搏殺條友, 就好似一個第一次去海灘游水既人, 佢搭緊車去海灘既時候至開始睇一本教人點樣游水既書一樣.  你話呢條友仔唔浸Q死佢已經好出奇.

仲有好重要既一點: 其實賭場比人既印象係一個玩既地方黎.  絶大部份既人係去娛樂, 玩賭場遊戲係去碰運氣.  根本就得好少人係去賭場做一D正經事, 去好認真咁對待賭場遊戲.  絶大部份既人根本冇諗過賭場遊戲原來係有可能去擊敗, 就算本書教埋佢點做, 佢都唔信唔去做.

21呢套戲, 做唔到我既要求.  但係我諗對鐘意玩廿一點或者賭場遊戲既人黎講, 套戲佢地會滿意既, 起碼套戲仲比到佢地一個”賭錢可以發逹”既希望同幻想.

要繼續講套戲, 就一定要講數牌係乜野一回事.