話說早兩個禮拜, 我安排左劉華同佢既朋友仔黎濠江玩左幾日.  劉華介紹左佢朋友老鼠仔同佢老婆老鼠婆比我識; 佢地真係好鬼死nice; 我知以後大家一定會保持聯絡, 一齊出黎玩.

長久以黎, 我做我既職業最困難既一個難題係: 我點樣同人地介紹我自己係做乜.  係中國人傳統社會觀念裏面, 賭博係偏門行業黎.  起碼我亞媽同人拜年既時候死都唔會同人地講話我老板係開檔口既, 都唔知點交代.  最近我有一個新既領悟: 我攪基金, 跑馬既野就攪左好多年, 但係今年係第一次我真係有一個職業賭仔既感覺.  唔知係好定係唔好, 但係果日同老鼠仔介紹我做乜既時候, 老鼠仔就對我既職業好有興趣, 同佢傾左好鬼耐.

我仲記得同老鼠仔講: 上個禮拜, 我有一日朝早起身就返去公司, 食左D野跟住就賭馬賭左一個下晏, 傍晚放左工就去賭場一路食晚飯一路賭, 賭到半夜返屋企買完波之後就一路係網上賭一路睇返自己呢一日賭成點, 發覺自己其實過往既四日除左瞓覺既時間之外, 全部時間都係係度賭緊………

唔單止係老鼠仔, 呢幾年其實不斷都會有人問我, 點樣至可以做到一個職業賭仔, 點至可以入到呢一行, 又或者點樣至可以長時間贏到錢(winner in the long run).  上個禮拜我至有人寫email黎1702呢度問過我呢個問題.  我既答案都仲係同一個: 千祈唔好做我呢一行, 諗都唔好諗.

我咁既答案, 唔係話我覺得自己好叻, 人地做唔到我做既野, 一D都唔係咁, 千祈唔好誤會.  我講呢一個答案, 其實都有少少賭博成份.  問我呢個問題既呢D人, 好多時我都唔知佢係乜水, 我唔知佢適唔適合做呢行.  但係我心中既估計, 一百個問我既人裏面, 有超過一半既人, 其實只係八卦, 想知多D我做乜, 真係有quality去係呢個行業成功既人, 應該一百個裏面唔夠一個, 所以我呢個答案中既機會會好大.

做一個全職既賭仔, 生命係痛苦既.  佢甘願為自己既理想放棄好多野.  呢種長期忍受痛苦既生活, 根本就唔適合絶大部份既人.

我今日寫呢一個題材, 其實係因為同A仔既一個對話.  有一晚, 同A仔同佢既朋友飲左幾杯之後, 我同佢係度拗緊我同佢邊個份工好D.  A仔係投資銀行做野, 佢買既係貨幣, 我買既係馬仔.  佢份工可能係係”正常”既行業裏面, 最接近我份工既行業.

A仔話: 藍生, 你份工好D.  我份工作既壓力, 唔係正常人可以理解同明白.  好成績既一年, 我可以有好多個禮拜唔洗做, 去玩, 去買自己既心頭好, 過自己理想既生活, 份bonus係正常人既好多個月既人工.  但係有苦自己知, 呢個世界冇免費午餐, 成績唔好既話就要講拜拜.  平時一份工, 衰D講你唔好行差踏錯既話, 一到放工時間就走人, 到月尾就自動有糧出.  我呢D友仔, 出年仲有冇工返都真係唔知, 搵到幾多搵住先.

我話: A仔, 你份工好D.  我同意我同你份工有好多好相似既地方, 但係有一個層面你份工係好過我份好多.  你份工係一份正當職業, 但係我就永遠只可以係社會黑暗既一角度生活.  A 仔你果個行業, 大把友仔係公仔箱亂講野害人都有人當佢地係神, 可以好風光咁行出黎社會見人, 我呢行唔得.  做你果行, 可以過一個正常人既生活.  做我呢行, 只可以過孤獨既人生.

其實以上呢兩條友仔都幾低能, 兩個都係過緊好多人夢想既生活.  吹脹.

我同A仔一把年紀都仲係單身, 呢個唔知係唔係巧合.  A 仔到底係鐘意自由自在既生活定係攪基我唔知亦都唔理, 但係我自己就好清楚自己諗乜.  我同身邊既人講, 我為左我自己既理想我放棄左好多好多野, 我唔覺得身邊既人會明白, 包括我屋企人.  世界仔一向都同我講對我呢個行業有興趣, 亦都唔排除會有一日想係呢一行發展, 今年暑假世界仔就要自己一個人去浸鹹水, 出黎食飯佢同我講: 我覺得我浸完鹹水, 轉行去做banking之類既野, 我屋企人, 女朋友同身邊朋友會容易接受一D.  我覺得佢既選擇係正確既.

有時一個人唔應該太過自私, 要多D考慮身邊既人既感受.  我太過任性了, 呢個可能係我人生中既遺憾.

有一次, 我係濠江招呼SD老婆愛美麗同佢個妹係度玩.  係架車度, 愛美麗同我傾起我既終身大事問題.  我唔知愛美麗佢係唔係以為我鐘意仔仔唔鐘意囡囡(唔係掛!?!?!?), 可能佢又係見我一把年紀, 唔知係專心工作定係乜野原因, 定係呢個行業好難識到囡囡.  愛美麗同佢個妹開始係度諗可唔可以安排佢身邊邊個未嫁得出既老友同我相睇.

我同愛美麗講: 其實, 我真係唔係好適合結緍.  我係一個職業賭仔, 我冇估錯既話, 我餘下既人生都會做呢樣野.  我好彩既話, 我會搵到足夠我洗既錢, 但係無論機會幾細都好, 係有一個機會可能有一日我會輸晒我所有既野.  如果真係咁我唔會後悔亦都唔會怪任何人. 但係, 我唔想有人跟住我要同我捱.  我係比唔到安全感我身邊既人既.

愛美麗: 咁……..你都係唔好結緍好D………

車, 冇得相睇, 望下都好呀.

我同愛美麗講: 我係好難會搵到身邊人, 但係如果有一日, 係我最失意, 失去晒所有野既時候, 有個女仔仲係死都要跟住我, 同我一齊捱, 呢個就應該係我既身邊人.  我只不過係覺得, 到時唔知會唔會有個咁既人跟住我.  冇我都冇所謂, 預左架嘞.

有一次同卓卓MSN, 同佢講起唔記得左係佢定係我手風好順利, 波馬賭場都係買乜贏乜.  我講左一句: 日日係咁就好囉.  佢即刻reply: 放落去既時間, 心機好多架………

幾個字完全講晒我既心情.  馬神卓睇黎都係注定行呢條路, 同我一樣, 冇得救.

有陣時睇D網上既討論區, 周時都有人對我呢個行業有D好美麗既幻想; 我諗呢D人睇周潤發同周星馳睇得太多.  愛美麗同佢個妹坐係賭場度個幾鐘睇我賭錢, 同我講: 嘩, 你賭錢真係好冷靜.  其實我唔覺得我真係好冷靜, 我只係想同佢講: 如果我好似幾他人咁係度嗌吹嗌頂就會吹到頂到, 我都會係度搏命嗌, 嗌到至得架?  如果你好似我賭左咁Q耐, 你都會乜野所謂冇可能發生既野都會見過, 到時你都會好似我咁冷靜.

佢個妹問我: 咁你咁樣玩一個禮拜玩幾多日?

我: 上個月平均一個禮拜玩三十八個鐘, 同一個正常人返工差唔多.

佢地兩個靜晒.

唔好以為好過癮, 就係因為一路都輸緊所以至玩左咁多個鐘.  捱打既滋味唔係好好受.  我一路捱打一路都問自己點解要過D咁既生活, 好似正常人咁咪好好地囉. 又係見到果四個字: 上天註定.

我唔想人諗入我呢一行, 其實有一個原因.  一份正常既職業, 除左出糧之外, 通常都仲係會有其他既equity, 通常都係會幫到社會既人.  教書既會教好細路仔, 做警察可以捉晒D壞人, 就算掃街都係有意義既工作.  做我呢行係冇既, 完全係為左profit.  衰D講, 你要逹到你既目的, 通常你都係要想辦法攪到有D其他既人死既.  冇辦法, 係我呢個世界唔係你死就係我亡, A仔個世界都係咁.  人地要走既時間, 佢地睇返轉頭, 佢地可以話自己點樣貢獻過呢個社會呢個世界, 個世界因為有佢地所以好左少少, 我走既時候就唔可以咁樣同自己講.  我人生既推動力其實好簡單: 我唔怕死, 但係我好怕浪費左我呢一個人生.  有D宗教信有afterlife, 我唔知信唔信好.  萬一死左之後至知原來冇咁點算?  所以我好珍惜而家我既所有, 我想盡量utilise我係呢個世界上既時間, 等我有一日走既時候回頭一望, 我會同自己講: good job, you did well.  反正得一次, 我想過一個特別一D既人生.  我覺得我打一份普通既工既話我既生活會舒服好多, 但係我驚我走既時候我會後悔.

細個睇書話一代賭神葉漢死係一份馬經上面, 我覺得咁樣死都幾有型.  有時我會諗究竟死係一份新報馬簿上面好D定係死係一張廿一點枱上面好D.  有幾次問D相熟既dealer: 喂, 你有冇試過你派派下牌突然個客死左?  攪到佢地果排好鬼驚我添.