話說有一日, 世界仔問我, 固定賠率(當然係win披果D, 唔係而家已經出左街既司機王)係咪會好快推出.  答案係肯定既.

成樣野, 由馬會同政府傾好交稅包底計劃開始, 其實已經係事在必行.  要推出之前既最後一個難題係: 搵操盤人.  搵到就出得街.  我同世界仔講, 啱啱係兩個月前, 馬會已經搵到佢地既操盤人.

我同四眼仔其實只係講過唔夠十句說話, 不過一向都有電郵聯絡, 都唔知咁樣算唔算認識.  四眼仔嚴格黎講佢根本就唔係一個trader.  我地檔口既trader全部都係係總公司個寫字樓做野; 四眼仔就一向係我地北區寫字樓做野.  佢平時根本就唔係負責賭馬, 佢只係一個香港馬部門既幫手.  四眼仔係地度北區人, 佢最重要既工作其實係睇住收飛.  我地係袋鼠國有牌, 但係個牌照係北區政府比我地既, 我地收飛就只可以係北區做, 出飛就係總公司, 濠江或者世界任何一個地方都得.

咁點解馬會會請左一個咁樣既人黎做操盤人?

答案都幾簡單: 因為過去三年, 四眼仔都係負責我地檔口既香港固定賠率.

有好多人都唔知, 我地檔口一向都有香港固定賠率.  世界仔由年幾前一日到黑係度搵我幫手買呢個彩池, 到而家我諗佢睇都冇睇過.  問題係乜?

我仲記得我見過四眼仔試過一隻電算機有3.1倍既馬, 佢夠膽死係我地個固定賠率開2.0倍.  搵鬼買咩?

你可能會問: 咁仲有人會買我地個固定賠率既?

完全正確, 係幾乎完全冇生意既.  固定賠率佔我地香港馬總生意額百份之一都唔夠, 可能千份之一都唔夠.  我同老板睇公司風險既時候, 係完全唔理固定賠率果邊點既.  根本就嘥氣.

老板唔係唔想將固定賠率攪好D, 而我地亦都有晒resource去攪呢樣野, 但係有一個好大既問題要解決.  你如果有機會當面問老板呢一樣野, 佢一定用手指指住一個門口同你講: “You need an exit”(你需要一個出口).

固唔固定唔係個問題, 問題係: 個產品你一定要有得走.  有得走就乜都做得, 冇得走就會死人.  你可以睇番愚弟上一篇劣作”超級個體”, 你試下收下個馴獸師D固定賠率飛, 人地就係咁同你買, 你就冇得同其他人買(全世界到而家得我地有呢個產品), 你睇下你會死得幾慘?

其實香港馬會攪固定賠率, 雖然係事在必行, 但係佢地要攪呢樣野就要冒一個幾大既風險.  方向我個人係百份百認同, 但係呢一個操盤手係勁難搵, 我估係世界上有能力應付到既人, 應該唔超過十個.  我係紳士國有個肥仔朋友, 幫我地主要死對頭公司S記攪spread betting, 佢簡單黎講可以話係spread betting既發明人, 馬會請到佢黎做既話, 我對馬會呢個新產品就會信心大好多.  肥仔幾個月前同我係濠江同我吹水時仲問過我知唔知呢邊有冇一D商機添.  人地都搵緊野攪, 但係馬會請果間獵頭公司就唔識得去搵肥仔.

好明顯, 獵頭公司搵到一個張履歷上面寫住有幾年攪香港馬固定賠率經驗既人, 佢地就唔諗其他野.

世界仔問: 咁四眼仔計唔計得掂架?

第一, 四眼仔起碼識得點計.

第二, 四眼仔攪我地個固定賠率時, 佢從來都唔洗自己計.  老板同D trader既rating 入晒落電腦後, 四眼仔只要決定自己想幾保守定幾進取, 其實個電腦會講得出每隻馬既固定賠率應該係幾多; 連最多可以受幾多, 受左幾多後D賠率要點樣調整都有埋.  點會仲用手計喎?  計錯邊個賠呀?

第三, 馬會會請人幫四眼仔計馬.

但係第四, 我估馬會請比四眼仔幫佢手既人數, 唔會超過兩三個.  我地檔口成間公司加埋得百五人, 但係有五十個人係負責睇帶同計馬既.

其實我冇估錯既話, 馬會唔擔心四眼仔計得唔好.  我上面講既風險唔係講緊呢樣.  馬會要冒既最大風險係: 無論馬會請四眼仔定係另一個人都好, 呢一個人一定係已經幫一個外國大檔口做緊野.  如果呢條友轉左工之後, 佢仲係同佢舊老板有路, 咁點算?

試下諗下: 如果我老板打個電話比四眼仔同佢講: “超級個體開高兩個位, 我比咁多你…..”  咁點算?

照計我諗呢D野應該唔會發生既.  馬會應該比左超高人工四眼仔, 同埋保安部會睇得佢好實.  而家要睇既係: 四眼仔呢份工佢攪唔攪得掂.  呢份工, 一D都唔易做.

四眼仔要攪好呢個產品, 佢一定要搵路走.  馬會一定唔會比佢同馬會自己個浮動賠率買, 否則四眼仔就可以控制到浮動賠率.  四眼仔要走貨, 同馬會攪波一樣, 一定係同外國檔口走.

馬會有陣時做野真係好矛盾: 佢唔比任何人同外國檔口買野, 但係佢自己就同外國檔口買好多野; 佢send晒信比我地同其他攪香港馬既檔口, 但係佢自己又要同我地買香港馬.  咁我地攪好定唔攪好呢?  如果馬會係一個人既話, 呢個人已經患有嚴重思覺失調同精神分裂.

最近開始攪既司機王彩池, 有人問過我點睇.  我既回覆係: 冇乜點睇.  要黎測試系統用既野, 講真就算得幾蚊投注額都冇乜所謂.  反正都係得D雞仔注會買, 勁高水位又如何?

其實由司機王彩池亦都可以睇到馬會將來想點樣攪固定賠率.  馬會咁保守既機構, 我諗佢一開始唔會場場都攪固定賠率, 佢只會係大賽開, 睇定D至算.  一出果陣時一定有好多傳媒會出黎鏟四眼仔, 話佢開得唔好, 果隻馬做乜咁鬼冷之類.  我亦都估有好多馬經會出一D好似財經分析咁樣既野, 對比番固定同浮動賠率既走勢.  D 粉樣見固定賠率熱D就話四睇仔睇好既馬一定要留意, 浮動賠率熱D就話有幕後信心支持一定要跟.  大家睇財經新聞有冇睇過D大鱷點樣出口術上下其手?

我唔介意大家當睇期指咁樣去睇固定賠率, 我只係想講, 尤其是D大熱門馬, 你睇馬會既固定賠率時就要好小心.  如果四眼仔係車仔既話, 佢會擺左五六個泰利係自己龍門口面前.  佢唔介意場場波都係0-0, 但係佢死都唔想失波.  我冇估錯既話, 佢D熱門馬既固定賠率會係超級咁保守.

四眼仔同我地個固定賠率有一個好大既唔同, 我地有一個武器四眼仔係冇既: 我地可以用馬會浮動賠率去做套戥, 佢唔得.  佢一定要先打D飛比我地, 由我地去打落去浮動賠率度.  換句話講: 我地可以係某程度上控制到市場, 四眼仔唔得.

四眼仔有兩大絶招去死守佢既龍門.  第一個係封盤, 呢招同咸蛋超人個死光一樣, 諗清諗楚至好用, 只可以用一次用左就冇, 唔可以成日用.  大佬, 次次固定賠率有著數時佢就封盤既話你仲會唔會同佢買呢?  第二個絶招就係勁高水位.  驚死就只可以咁, 同馬會呢幾年攪波一樣, 反正咁高水位都會有人買, 水位高過頭攪到D客走晒去檔口度時就頼檔口, 四眼仔唔洗上身.

試下用一個例子講下兩種賠率可以有乜野變化.

老豆出黎跑平磅千六, 我亞媽都知會熱到爆.  你係四眼仔既話, 你可以點開呢?  我當你計到佢值1.5倍, 但係你一定唔可以開1.5, 死梗.  寧可開1.2-1.3比人小死都唔好冒風險, 因為你要盡量減低由浮動賠率走過黎既飛既數量.  我老板只要唔係用好多錢, 就可以隔夜打到老豆浮動得1.0或者1.1.  換句話講, 我老板可以控制到D普羅打飛落邊個彩池.

D老豆飛入晒去固定賠率度, 四眼仔一定要走咁D; 佢唔係要估老豆到時贏定輸, 四眼仔唔會低能到咁樣去冒呢個風險.  四眼仔一定要同我老板走貨, 問題係: 四眼仔唔同我地走既話, 佢仲有冇第二D選擇呢?  衰D講, 我老板開1.4, 1.3, 或者1.25, 可能佢都係要買, 中晒我老板計.

你可能會問, 咁我老板收晒D老豆固定賠率飛黎做乜?  老豆贏左佢咪又係要賠?

我老板有飛在手, 佢可以做既野有好多.  佢可以打落去浮動賠率度搵食, 佢可以買番其他馬既固定賠率.  個point係, 你比到佢有飛在手, 佢就可以靠trading搵到食.  固定賠率同浮動賠率最大既唔同係: 固定賠率係可以靠trading搵食, 你只要係適當既賠率買到你要既馬, 係有可能場馬都未跑你就已經贏到錢.  要做到呢樣野, 老板一定要有飛在手.  頭先既例子裏面, 老板係可以利用四眼仔幫佢手收飛, 佢根本唔洗同四眼仔有路.

馬會唔係唔知道呢一樣野, 其實呢次可能係馬會第一次同檔口搵到一個win win situation.  馬會都係想要投注額啫, 攪得好既話, 總投注額應該一定會上升.  檔口又多一個遊戲去玩, 大家happy.

對普羅黎講, 我只係得一個建議: 唔好睇得太重傳媒講既固定賠率分析, 佢地唔會知道自己講緊乜.  Keep the game simple, 想買既馬賠率好就買, 唔好就唔買.  最近有幾個朋友仔話睇住我地既賠率去賭馬都有D成績, 睇到我地有乜野馬想受, 有乜野馬唔想要, 呢個方法我都覺得唔錯.  本錢有限既話就唔好嘗試做我老板果D”未跑先贏”既動作, 唔值得.  合法用開我地檔口既人又可以考慮試番我地既固定賠率, 到時D水位會比起而家好好多.

拭目以待.