話說尾場, 仲有十六分鐘開跑, 我SEND左一個短訊比所有友好朋友: “9會落飛”.

成晚算係成績幾好, 但係老板諗住大賭一隻馬, 同佢講左幾句呢場會點做, 我安排左一個以前從來都未做過既動作.  我叫左兩個後生仔過黎, 睇住老虎仔戶口既變動.  老虎仔如果有九號馬既win同Q飛黎, 全數踢晒出去, 一毫子都唔要.  我要保証到開跑既時候, 我地機裏面係要完全冇九號馬既任何exposure, 所以揀人做呢個動作我都諗左一陣; 個動作唔難做, 但係呢兩條友要醒醒目目.  幫左我老板咁耐, 專門搵人去凍結我地頭號敵人我都係第一次做.  之前老虎仔果單消息出左報紙既時候, 都有幾個朋友仔問過我佢組織既野, 同埋對我地有冇影響.  我知道既其實比報紙佬唔係多好多; 佢走左之後果幾個賽馬日, 個市係靜左少少, 除此之後, life goes on.  老虎仔人就係走左, 但係好明顯佢靈魂仍然尚在人間, 識得睇飛既朋友仔應該唔洗我講都見到.

我呢句"9會落飛", 只係想通知一下有心想買九號既朋友仔要有個心理準備, 唔好見到佢落咁多飛時有好大既打擊.  你唔係買佢既話, 你知佢會落飛既話你應該係好高興至真.  我自己其實唔係最鐘意九, 我呢場隻心水其實係大鋪頭; 大鋪頭贏我會贏得最多, 但係超級個體贏我都OK; 反正老板諗住大賭呢隻馬, 我賭唔賭佢冇乜所謂, 有時幫佢打下氣反而仲好.

朋友仔有好多都回覆番我既短訊: ic, ok, thank u之類, 得SD有個咁既回覆: "呢隻我死都唔信".  後來至知道, 跟到既朋友, 據我所知得一個.  劉華至唔好彩, 佢後尾話比我知, 佢收到我個短訊既話佢肯定會跟, 但係啱啱呢場佢有馬出, 佢入左場我冇SEND短訊比佢.

我同老板研究左好耐一個問題: 幾時出飛好.  我地都好肯定老虎仔會有飛黎, 問題係唔知幾時, 亦即係唔知會有幾大.  佢既飛越遲黎, 我地出飛就會越黎越難, 唔通真係一野打晒比馬會咩?  老板話想我地早D出飛.  我話: 當然做到, 問題係: 咁早出飛, 我已經好難做到煙幕, 無論點出都好, 人地一定會跟到.  咁多時間比人跟, 會落飛落得好勁.  講左一陣, 老板最後決定照去.  所以我個短訊其實係咁既意思: 我唔肯定九號會唔會贏, 但係我肯定九號會勁落飛.

六分鐘, 老虎仔出擊, 手足做好晒準備去應付, 唔洗煩到我.  同一時間我個手機響, 劉華有飛比我, 佢世伯有大飛比我老板: 大熱門做膽拖三隻問我呢邊要唔要.

早係食完晏既時候, 係屋企同劉華講過呢場馬.  同佢有關係既兩隻馬, 細冧把果隻機會就好微; 佢問我鐘唔鐘意大冧把果隻既機會, 我話good.  佢同我講佢既策騎指示, 我既回覆係: 如果你叫佢唔好放, 基本上你係拉馬, 我係董事我實捉你去問話.  個地有D難講, 唔知會幫佢定害佢, 但係大冧把既機會完全係睇佢出閘出得好唔好, 放到出黎就會有機.  我同佢講過我最鐘意大鋪頭, 但係就冇提過超級個體.

劉華問過我大熱門點睇; 我好老實同佢講我既睇法.  計死數贏晒, 計客觀條件輸晒.  跑馬冇贏梗亦都冇輸梗, 但係佢一定唔值呢個賠率, 我好多身邊玩左馬好耐既朋友仔都一定同意呢個睇法.  駝背佬係一個問題; 佢一跑呢個場我就一定已經減佢分.  我印象中既佢係一個計數王, 冇把握既野佢唔會做; 明明跑大場贏梗既馬點解要拎過黎跑細場?  佢唔洗拉馬都可以輸得, 一句第一次唔習慣你就咬佢唔食.  呢隻已經唔係佢第一隻咁樣拎過黎跑既馬, 前面果D都冇乜好既結果.  我以前已經同唔知劉華定A仔講過: 駝背佬拎得黎細場贏既馬, 一定係佢冇辦法係大場贏, 佢至會拎黎呢邊, 仲要唔係試下試下, 佢係要好有把握至會係細場贏一鋪.  佢呢D經典例子: 咖啡, 田少; 兩隻我都狂中.  隻田少仲要佢出多一隻馬幫手做煙幕, 果鋪我好多朋友仔都中招.

我同劉華講: 咁樣拎黎細場跑既例子有好多, 當年連牛仔走過黎跑都係輸, 披士都冇.  你呢場買得隻大熱門, 你就一定要先解答左呢個問題: 佢點解唔留係大場度跑先?  劉華指出我既錯誤: 呢場係一場盃賽黎.  OK, 多番一個理據, 但係我睇都係唔夠.  佢有心機既話, 一定係大場可以搵到一隻盃比個馬主捧, 唔洗走黎呢度跑.

小田係佢個版度出呢條題目, 黑柴走出黎答話大熱門多數三甲不入.  答得好, 呢D就叫做經驗.

劉華都好醒目, 平時佢呢D世伯既大飛, 佢唔問我都好多時自動幫我擋晒, 佢明知我老板唔會要, 咁遲黎一定走唔到.  呢條佢就比我, 佢都知道我地可能會吞左佢落肚.  老板諗都唔諗就話要, OK晒.

講番超級個體, 我老板賭佢我唔覺得出奇.  先講一樣野: 超級個體初出跑細場果次, 我係貼佢做全日心水, 我身邊既朋友應該全部都知道, 唔止一個人問過我關於呢隻馬.  SD果時已經同我講: 佢對超級個體有bias, 佢唔鐘意呢隻馬.  我答佢, 我當初揀呢隻馬, 有三個原因: 佢評分有利, 佢跑細場特佳, 佢初出特佳.  果場隻馬跑尾二定尾三.

隻馬到底有冇分在手, 個個人睇法都可能唔同.  我老板同SD都係有留意袋鼠國跑馬, 對呢隻馬會幾清楚.  睇法唔同冇問題, 我地做野會用番公司既universal rating, 個分會話比我地知呢隻馬係呢邊會唔會夠跑, 老板當然會信自己既野.  劉華同我講話呢隻馬完全冇form, 我唔同意, 我叫佢睇番佢上一場條片, 佢其實跑得好好.  劉華後來同我講番, 呢D就係我地同普羅馬迷既分別, 我地有時間去睇呢D細微既野.  紙上賽績根本反映唔到佢上場跑得幾好.

後來有兩個人, 一個係SD, 一個係卓卓, 都同我講話佢係上一場係跑得好左好多, 但係佢地都係覺得隻馬會跑埋呢場跟住係泥地度黎料, 諗頭好好, 雖然唔中但係証明兩個都係有料之人.

跑完上一場, 隻馬操練做足晒, 試晒閘, 換番大師父上去, 馴獸師做足晒佢應該做既野; 今次如果跑得好, 其實我唔覺得奇怪.  換著你係個馴獸師你都會咁樣做.  隻馬水土好番, 根本可以同之前果隻馬完全唔同.  贏唔贏得唔知, 但係唔係三十倍馬.  我老板對佢既信心大過我好Q多, 但係係呢D層面, 我地既睇法係一致既: 隻馬只要跑番之前係袋鼠國既水準既話, 佢係呢度係夠贏既.

一分鐘, 個賠率比我地想像中低. 冇計, 雪球效應, 個個都要補飛落佢度, 最後都係要打D飛去馬會.  我地係呢隻馬個position已經係大得好Q驚人, 基本上佢唔跑入頭兩名, 我地就已經會呢場輸錢, 包括埋吞晒落肚既大熱門都仲係要輸, 但係老板好似仲係好勇猛喎.  我等睇戲.

D馬一出閘, 超級個體應聲彈出, 有個伙記話: 嘩, 唔通老板真係知道既?  D馬一過終點, SD第一個SEND短訊比我, 得一個字: 勁.

後來問番佢, 佢話D馬一出閘, 佢就即刻同佢老婆講: SHXT!!! 藍生比果隻馬贏得!!!

黑柴跟住SEND短訊黎: 得八十八皮@_@.  我心諗: 唉, 中果D都冇乜邊個係好開心, 尤其是個馴獸師.  全世界都跟到, 嘥晒.

我覺得劉華講得幾好: 跑馬你先唔好諗衰野先, 個訓獸師要做好一隻馬, 我老板要大賭一隻馬, 其實都係要死好多細胞, 要落好多功夫.  普羅馬迷好容易有一個錯覺, 場馬好假, 大熱門死, 落飛馬贏, 其實後面既flow of money係好緊要, 係呢個圈唔係好多人明白係乜野一回事.  公眾by definition係要輸既: 佢地唔可能有我地咁樣既resource去搵到超級個體咁樣既馬.  劉華自己都同意, 佢比心機落去刨呢隻馬既話, 佢冇理由會係幾十倍.  你有冇膽好似我老板咁夠膽大賭呢隻馬就係另外一回事.

如果我地相對公眾有一個絶對既優勢, 就係我地睇到好似老虎仔咁樣既人既飛, 有佢既飛既話當然係信心度上係有所幫助.  但係又係果句: 千祈千祈千祈唔好亂咁跟飛.  呢位馴獸師試過好多次大賭一隻馬都係輸多過贏既, 剩係一隻紅統領已經差唔多輸死佢, 我地到而家都仲未買過呢隻馬.

超級個體係一個個別事件, 呢D咁樣落飛既情況唔會成日發生.  你信唔信都好, 我地係盡力想香港賽馬健康成長, 成日有D咁樣既事件既話, 對普羅馬迷係有負面影響; 但係我同老板既睇法係一致: 整體上, 而家既情況係健康既.  我地係搵到食同唔大幅落飛呢兩個極端之下係搵到一個平衡, 普羅只要做足功課之下, 係有可能贏到錢既.  我唔想有心人諗到我地好似隻手遮天, 我地賭一隻馬輸到叉街既日子都唔少.  我亦都唔想有心人係傳媒度吹超級個體呢個事件, 其實每一日都有好多落飛馬輸到冇晒影, 你隻隻落飛馬都買既話根本唔可能贏到錢.  仲有D情況, 例如有一隻馬全世界都睇好, 淨係得我地覺得佢唔抵買, 同全世界死過, 隻馬比我地生吞落肚, 隻馬個飛唔跌反升既例子其實都唔少.  隻馬個飛完全冇落過, 其實就係因為有我地幫手, 普羅馬迷都唔會知道有呢D事件發生過, 查實我地係係度幫緊佢地, 等佢地想買果隻馬既賠率好番D.  我老板既金石良言: We are providing a service to the industry; we correct the odds so that they truly reflect the chance of the horses (我地係提供緊一個服務比大家, 我地將賠率調節去適當既水平, 等佢地正確咁反映D馬既真正機會).  我地贏既只係呢個服務既一個服務費, 個profit margin其實比好多人想像中少好多.

尾場計好晒數, 個數係電腦度一出, 班伙記一齊: "嘩...........".  大家都好開心今日咁好成績, 呢個尾場係公司今季單場贏最多既一場馬, 值得慶祝.  如果香港歷史有六四事件, 香港賽馬歷史都應該有四二事件.  呢場馬要放入歷史度, 唔係因為我地贏幾多, 係因為呢場馬係一個教材, 有乜野馬應該賭, 有乜野馬唔應該賭, 有心學跑馬既人應該好好研究一下.

老板話: 發生過既事係會不斷咁重覆再發生既.  睇下下一隻超級個體幾時出現.