話說有個朋友仔睇左我係小田個留言板既一個說話: "如果豆豆贏打甩比既話我會覺得好出奇", 佢問我, "如果你寫你個網頁七笠得金既貼士, 你係咪會貼老豆X2同竹星X2?”

哈, 呢位朋友仔真係了解我.  全中.

寫回馬槍唔係咁容易; 或者應該話, 寫好既回馬槍唔係咁容易.  回馬槍係寫已經發生左既事, 事情發生左其實係obvious左好多.  賭馬黎講, 件事發生左係冇乜意思, 你知我知大家都知.  賭馬個遊戲係要係事前估到會發生乜野事, 呢樣就要講功夫.  公仔箱裏面好多馬後跑既說話都好容易會令人討厭.  我唔係想寫D"亞媽係女人"咁樣既回馬槍; 要有意思既話就先講清楚disclaimer:

一,  兩場大賽跑出黎既野對我都係good result;

二,  今日總成績都係非常好.

所以我既回馬槍你要有所保留咁樣睇.  如果你睇得唔順氣既話, 請放心, 我下次輸到叉街既時候再寫回馬槍你可以再上黎睇跟住寫email插死我.

今期心水只係跑第四, 但係我琴晚同幫我手update七笠得金既學生哥話: 我今期心水唔係貼佢就係貼老豆.  我係好鐘意老豆.

七笠得金我兩個朋友仔, 無論香港仔同世界仔都係貼生雞X2.  我唔反對, 如果我係佢地師父既話我會覺得OK既, 但係香港仔就寫得一句:話生雞會再贏一場就算數.  佢好似當其他馬係死既, 我會要佢留堂同佢補習一下.  呢場馬唔係一場walkover.

如果你覺得呢場馬係一場no contest, 你可以咁樣寫.  我會想睇到好似世界仔咁樣寫法: 老豆係勁, 但係生雞係超勁, 所以生雞X2.

仲記得A仔問過我: 生雞會唔會勁得過大B?  我答佢: 未得.  係我心目中, 大B係超勁, 你可以寫一句話佢贏梗, 生雞唔得.  老實講, 生雞有幾勁, 我係有D保留.  我唔係做傳媒, 我知我如果係公仔箱咁樣講野會比人插死.  但係生雞1.6, 老豆3.4既話, 我就一定買老豆.

世界仔寫話佢覺得生雞路程唔係問題, 我完全同意, 我甚至乎覺得佢千六可能會勁過千二, 但係呢個唔係個point.  個point係: 生雞係一隻典型新鮮特佳既馬.  佢休息超過三十五日既話(唔好問點解係三十五日, 如果三十四日既話點算, 總之我老板教係超過三十五日就係新鮮), 佢跑乜路程都係超勁, 例如佢上年十一月果場馬, 完全係一隻外星馬既表現.

生雞一月輸果場, 我到而家都未聽過有人有一個合理既解釋, 但係事實上, 佢果場係落左好多.  果場馬如果冇生雞既話, 我跟本係會同千二王死過; 千二王跑直路賽真係衰到嚇死你, 但係生雞居然跑唔贏佢.  上個月係千二反勝番千二王, 但係佢只係跑贏一隻受傷既千二王, 跑完果場千二王就打左柴.

今晚SD問我點睇生雞, 我用左一個字黎形容生雞: queer.  呢隻馬, 奇奇怪怪, 古古惑惑, 我唔係好知佢有幾好.

佢贏果幾場係好得人驚, 唔洗講; 佢輸果幾場, 我未聽到有人比到一個合理解釋出黎.  今日佢輸, 唔洗問十萬條友仔會走出黎插Q死巫師佢, 我唔係話巫師冇錯, 但係我想講: 我會理解點解巫師會咁樣騎.  我係係度馬後跑, 但係衰D講, 我係預左佢咁樣騎.

你可以睇番生雞跑既每一場馬, 但係唔係睇每場馬最後果四百, 而係睇由開閘至到四百米果段, 到四百米就停左佢, 你估你會睇到D乜?

佢贏既每一場(初出果一兩場唔好計, 超晒班), 佢跑到四百米既時候其實都係係一個好牙煙既位, 跟住佢就會做一D天馬行空既動作出黎.  佢輸既每一場(唔計今日), 佢跑到四百米既時候其實都係係一個食糊位度, 你諗住食梗糊既時候佢就唔知點解冇野睇.  佢唔係咁Q勁既話, 我會叫呢D馬做”正衰馬”.  所以今日巫師走個咁既衰位, 我係預左, 因為佢贏既時候就係咁樣走架嘞, 之後既事, 唉, 佢都唔想.

SD 講既野, 我估大部份既人都會咁樣講, 生雞最後二百既走勢, 有位既話早就贏左.  呢樣野, 我唔係好sure: 生雞成大半條直路都冇用過, 一有位實衝得勁過平時架.  如果有位係咪又會咁勁呢?

可能我會錯, 唔緊要, 我錯既話下次生雞實會攪到我好痛苦.  但係事實上, 最近三次生雞跑, 我同我老板都係同生雞死過, 好好彩有兩次佢幫手, 生雞萬歲.

以前大B出黎跑, 我就會好似香港仔咁樣寫一句就算數, 因為真係贏叉梗, 但係個key係佢會比到你一份安心, 佢放到入直路我唔洗係度估佢會唔會推落去冇.  所以我覺得大B既1.2係抵過生雞既1.6.  我鐘意3.4既老豆, 因為我好清楚老豆會交乜野比我, 佢跑千六贏十二月同一月大賽, 香港跑千六根本就冇對手, 而家佢跑少二百米有3.4比我, 點解唔買?  如果冇生雞係度, 你話有冇馬會夠佢跑?

再講打甩比大賽; 講番點解一個月前我會寫"如果豆豆贏打甩比既話我會覺得好出奇”.  因為打甩比既冠軍係有一個profile, 係有款睇既.  豆豆唔係打甩比冠軍馬果個款.  我做既動作其實得一個: 我諗番以前贏到打甩比既馬係乜野馬, 跟住睇番今年有乜野馬係差唔多款.

贏打甩比既馬, 有一D係超勁既馬, 例如鯪魚球.  但係有D年係比一隻唔係好叻既馬贏到打甩比(例如上年冠軍).  所以贏到打甩比既馬, 其實唔洗好叻, 但係有一個條件佢一定要fulfill 到, 贏打甩比既馬一定要做到呢個requirement, 唔可以靠好彩.

贏打甩比既馬, 一定要能夠rise to the occasion.  中文可以解做能夠做到天時地利人和, 樣樣野配合得啱啱好.  冇一隻打甩比馬係唔覺意贏左既. 有D年份係真係要一個天衣無縫既計劃至贏到打甩比既, 仲記唔記得多年前東方快車點樣輸形勢而贏打甩比?  仲記唔記得老苗隻打甩比馬點樣用紅到爆既騎師力退世外高人隻掌門人?

贏打甩比既馬, 係要有D destiny 既feel, 係要有D時勢做英雄既feel, 係要有D註定係你贏既feel.  每年有好多隻馬都係想做打甩比, 但係就係頭頭碰著黑, 點做都係唔順利.  咁樣既馬係唔可能贏到打甩比既冠軍既.  你有睇我既劣作”神奇大腦”既話, 可能呢D就係我睇到既pattern.

豆豆冇我睇到一隻打甩比冠軍馬既款.  佢贏得打甩比既話, 佢唔會早前咁緊要既時候發燒停課, 要趕功夫黎跑打甩比.  我甚至乎覺得駝背佬練馬師只係見今年打甩比唔係咁強, 順便跑埋睇下好唔好彩.  呢條友仔對呢D大賽既諗法同做法我自問都好清楚.

當年老苗隻冠軍都係趕功夫趕到叉街, 但係比佢趕到喎; 佢要連贏三場至夠分跑打甩比, 但係到佢清風送爽咁贏第三場既時候, 仲要個form 可以hold 到去打甩比, 你就知佢有機會, 連個天都幫佢.  隻馬以後一生都冇馬贏又如何?

今年有乜野馬有呢個profile, 似係打甩比冠軍馬個款?  得一隻.  竹星咁遲至做功夫, 居然可以一野就settle到係香港, 連練馬師都係試下試下, 七成馬都唔知有冇之下可以咁樣贏頭關, 仲唔係你?  年年都有四五隻馬樣樣都未攪掂都照跑一鋪搏下, 又唔見佢地搏到?

竹星係大熱門, 貼到佢一D都唔叻, 但係諗佢唔得既人我覺得係睇低左竹星贏頭關個form.  佢贏得果場馬真係超勁, 註定佢係係香港跑平磅賽既中堅份子.  跑讓磅賽同跑平磅賽係完全兩回事, 似乎世界仔深明呢個道理.

如果仲要諗仲有乜野馬有打甩比款, 應該不離嘉士伯果幾隻.  你睇睇以下呢一個pattern:

三冠馬頭關: 亞東同嘉士伯加埋出五隻, 有四隻跑第一第二第四同第六.

三冠馬次關: 亞東同嘉士伯加埋出七隻, 有六隻跑第一第二第三第四第五同第六.

就好似N年前個AE咭廣告咁講: 其實, 你仲需要諗D乜野啫?  仲諗豆豆或者唔睇後面既人, 我覺得要今晚”攝”高個枕頭諗清楚.  竹星今日呢隻馬贏得不易, 場馬跑到咁, 都預左嘉士伯D馬會衝上黎挑戰, 我以為竹星會有危機, 佢仲可以力頂住隻喜叉寶.  你睇下跟係竹星差唔多位既馬後尾跑左去邊?  靚仔蘇如果贏到呢場馬我肯定係今年佢騎得最精彩既一場馬, 可惜隻馬唔夠人地黎.  喜叉寶咁好形勢都贏唔到竹星, 呢一世都睇怕唔可以係竹星前面過終點.  老豆, 生雞同竹星應該係當今武林三大高手, 竹星到底有冇鯪魚球咁勁, 定係只係今年四歲馬屎?  信既就請係四月大賽瞓落一隻應該幾熱既竹星度; 唔信就圍D似樣既外隊馬啦.

老友馬神卓揀左一隻我都好鍾意既心水冷馬, 終於跑上二千而冷到飛天, 買Win披而咁樣輸少少跑第四, 馬神卓暈左.

好彩佢唔係暈好耐就醒番, 冇錯過買尾場.  尾場我又買勁將軍Win, 拖幾隻冷野買雙Q, 力戰輸比馬神卓真係無話可說.  我輸Win中雙Q但係佢就Win Q中晒.  馬神卓大戰寄生蟲真係個個回合都咁精彩, 就黎可以好似黃飛鴻同鐵金剛咁拍一個系列.  馬神卓再度戰勝寄生蟲, 真係可喜可賀, 恭喜恭喜.