話說有一日係屋企, 幾個屋企人係度談論緊最近既城中熱門話題; 我做教書既二嫂拎住份報紙係度狂小亞蕉, 話佢教壞細路.

我心裏面既感覺其實係: 我同情亞蕉, 我亦都同情愛廸生同其他有關人等.  佢地真係好慘, 好可憐.

我其實諗黎諗去都諗唔到成件事亞蕉做錯左D乜.

先講清楚: 我唔係偏幫亞蕉; 我一向都鍾意佢拍擋多D; 想問下亞蕉粉絲感受既話請你搵亞毛.

我覺得有好多人平時唔係咁鍾意亞蕉既人乘機走晒出黎乘人之危, 人地而家毫無還擊之力既時候狂揪佢, 揪得好過癮.  我想講既係: 我好欣賞佢係前幾日係記者招待會既表現.  好多人小佢, 話佢做乜講咁少野, 一句天真與傻就交待晒所有野.  其實我唔係好知呢D人想睇乜.

我眼中既亞蕉, 係呢兩分幾鐘既表現, 已經超額完成, 做好晒成件事之前既部署.  讀晒成份聲明出黎, 千祈唔好喊, 讀完入去後面喊到豬頭咁都得, 但係死都唔好喊.  Well done.

我想所有人先諗一諗: 如果你要將你可能係人生中最醜既事, 係幾百個記者同電視現場直播既時候同所有人交代, 你估你既表現會係點.  連電台天之驕子出黎玩撞見記者都要係隻雞後面出醜, 難得既係亞蕉可以面帶笑容完成任務.  記住, 係要你講關於你人生中最醜既一件事.

小田提過呢個係公關部門既失策, 我唔係好同意, 比著我係公關我都會而家咁樣做.

第一, 死都唔好認, 但係亦都唔好否認.

第二, 提一提就算, 講得越少越好.

今次亞蕉做到既應該已經係佢既極限; 佢講多一兩分鐘應該已經頂唔順會breakdown.  唔通要佢真情剖白, 講下佢同愛廸生既感情咩?  有人好想睇但係呢樣係冇可能.  有公關專家出黎話: 呢個係反面教材, 亞蕉應該代表女人身份講下自己感受, 幫女人出下頭, 唔好下下都攪到女人做受害者.  喂, 講呢樣野既人有冇諗過亞蕉做唔做到呢樣野?

底線係, 呢個係一盤生意, 亞蕉自己既感情生活, 佢公司可以唔關心唔理, 但係呢一步一定要做, 因為亞蕉都要繼續生活, 有好多人都要靠佢開飯.

亞蕉係一個藝人, 佢要做好佢既工作.  我睇唔到佢有乜野做錯.  我同情佢, 就好似我同情掃把頭賣廿三條, 或者以前既董伯伯咁樣, 要做一份冇乜可能會做得好既工, 但係佢地已經盡力去做好.  明知比人小都盡力做到最好.

有人會話咁樣好虛偽; 我會話: 你同我出黎打工都會做虛偽既野, 講假既說話.  可能動作同說話係假, 但係我想做好呢份工既熱誠係真心既.  我啱啱拜年既時候都講過好多虛假既說話, 但係絶大部份既時候我都係好真心既. 

我好同情愛廸生.  我寫呢篇野既時候, 佢差唔多返到黎香港, 之後會點我都估唔到.  佢點樣去交代呢件事情, 大家會有唔同意見, 但係起碼佢係相裏面做既野, 一D問題都冇.  佢點樣同D囡玩, 關你乜叉事?  佢段拉登片係唔負責任, 但係如果都冇做錯野, 佢又點解要負責任道歉呢?  佢而家大鑊在得罪晒班囡囡後面既後台, 令佢地唔見左好多錢, 同埋因為呢單野警方要麻煩左好多江湖中人, 所以好多人要佢死.  道德上唔係錯, 講到尾又係人地飯碗問題.

作為一個藝人, 我一向唔鍾意愛廸生, 但係好老實講, 我覺得愛廸生係好多男人既榜樣: 師父教落: 男人做所有野既終極目的, 其實得兩個: 錢, 同埋囡.  愛廸生兩樣都有好多, 仲要年青同靚仔.  我係囡我都會幾鍾意同佢玩.

其實, 當個個係度小愛廸生既時候, 當中有幾多個人係羡慕同妒忌愛廸生呢?

其實我唔覺得最慘既係亞蕉同愛廸生; 我覺得最慘既係亞蕉公司個經理人.

都唔知係咪佢黑仔, 唔知點解佢D artist連做慈善都可以甩左條褲; 露呢度露果度已經係好少事, 今次仲整單咁既野, 我諗佢連點樣報警落口供都做都熟晒.  喂, 又唔見其他公司既artist咁多呢D野既?

我明白點解亞嫂咁慶, 佢係教育工作者, 佢覺得呢件事攪到佢既工作好難做.  我唔係教育工作者, 我唔識.  但係如果我要教仔囡, 我唔會靠傳媒.  有人問呢件事呢D相比仔囡睇到點算好?  我會話: 咪比佢睇囉, 早D學比遲D學好.  我呢個亞嫂自己夠話唔想佢一歲大既囡囡咁快學賭, 但係佢囡囡過年係我屋企玩, 有兩枱麻雀同埋電視播緊跑馬.  佢淨係識講單字但係已經識得講”白板”同”紅中”.

亞嫂問我: 如果屎塔肥有相, 你會唔會好傷心?

唔係掛?  屎塔肥同邊個攪關我叉事?

以前睇過D人講話香港個娛樂圏點點點唔Q掂.  我既睇法係: 我覺得香港個娛樂圏都算OK.  大家點樣define娛樂圏可能唔係好同.  以前家駒話: 香港只係有娛樂圏, 冇樂壇.  啱, 我同意.  我唔識音樂, 唱K都仲可以.  玩音樂既人會唔順娛樂圏既風氣, 我會明白, 但係市場既情形係點?  其實有幾多人係要你既產品?

社會裏面好多人需要娛樂同埋茶餘飯後既話題, 你問我既話, 娛樂圏就係提供娛樂既一個industry.  呢單野夠晒娛樂性嘞掛?   我上個禮拜公司食開年飯, 當上鮑魚既時候, 個個都互相係度問: 喂, 你果隻係亞蕉定寶寶黎?  笑Q死.

好多人心裏面唔滿意既係, 佢地而家眼前見到既一個人, 同佢地一向以黎呢個人係佢地心裏面既形象, 原來係完全兩回事.

比個機會等我講下屎塔肥呢個人.  兩歲老豆就走左去, 老母一個人養大自己, 屋企乜野環境大家心照.  好彩天生個樣引死好多人, 佢用自己個樣用到盡, 冇浪費時間去溝仔, 十二三歲就開始做model, 用個樣搵食.  佢好有遠見, 知道賣樣好難講可以賣到幾多年, 老蟹都盡快搵夠先, 其他乜野都唔諗, 搵夠先算.

你可唔可以話以上呢個人好虛偽呢?  但係呢個就係原原本本既屎塔肥, 珍珠都冇咁真.  你問我既話, 呢個人一D都唔假.

我鍾意屎塔肥, 其實係鍾意一個形象, 一個感覺.  人係願意比錢去買一個好既感覺既, 你同我都會, 呢樣野一D都冇錯.  我個東洋朋友青頭仔個老婆, 早兩個月去左廸士尼同米妮慶祝米妮既生日.  佢唔係鍾意份感覺既話佢鍾意D乜?  唔通佢唔知米妮係人扮既?  唔通佢知道原來米妮係人扮既話佢會好傷心好失望? 有一日米妮背著米奇係出面同高飛狗攪野佢係咪要跳樓死左佢?

扮米妮既人, 同亞蕉, 屎塔肥既工作其實都係一樣. 只係亞蕉, 屎塔肥有錢過佢好多.

我仲記得小田事發果日MSN我呢件事, 我第一個反應係: “其實有呢D相, 有乜咁奇?”  呢間公司好多年前已經有artist唔想陪老細攪到冇得玩, 我睇如果得呢幾條友有呢D相, 咁就真係出奇.  娛樂圈唔係今時今日至有亂晒龍既野: 多年前有龍之子, 後台強勁既獎門人同校長班友仔都係出左名既大滾友, 唔通仲有D天真既人唔知道?

開年飯仲八到原來亞蕉個同事蘿記愛徒係濠江出過事: 當年愛徒過去濠江唱歌, 唱完歌當然係直落陪一直以黎最支持自己既老細, 點知玩玩下出左事要入醫院, 醫生係愛徒下面攞番一條春卷出黎.  史上稱之為”春卷事件”.

我唔識亞蕉, 但係亞蕉都係同特首一樣, 只係想做好呢份工.  如果有人問點解亞蕉係一個人唔係一個神, 天真既係邊個?

亞蕉同愛廸生冇做錯, 只係唔小心.  愛廸生唔會只係留番D相比自己睇, 佢D老友一定會有copy, 只係呢次d相去得太遠出左事.  有衞道之士走出黎話呢件事教壞人, 唉, 我攪完野拍下片關你乜事?  我冇話會比你睇喎.  早幾日亞蕉出返黎上電視唱歌, 居然唔少人打電視去投訢.  其實佢地想投訢乜?  天真既係邊個?

報紙雜誌講過咁多野, 乜野角度都有, 我唔係有D新既諗法, 只係想用呢度記綠低自己少少既感受.  最後要講一個聲明: 邊個有屎塔肥既相, 記著即刻寄比我.  我都係人黎, 我都有需要架.  大家係朋友黎, OK?