試下諗諗, 以下呢三個人有乜野共通點: 國際象棋女棋王, 花旗國前財爺格老, 我老板寄生蟲.

話說最近成日睇國家地理頻道一個節目叫神奇大腦.  個節目都幾受歡迎, 身邊有好幾個朋友仔都有睇過, 一連好多集講好多先天同後天既天才, 從科學角度研究佢地點解聰明絶頂, 同埋我地以後點樣可以整到人類或者自己D仔囡聰明D.  集集都有D唔同既研究對象, 例如有一個人大病完之後由白痴變左做天才, 同埋個節目既生招牌亞MARK, 幾歲就做左鋼琴大師, 仲要讀書讀到跳晒班, 簡直係眾多家長既偶像, 個個想睇下點樣可以訓練到自己個仔仔囡囡可以好似亞MARK咁Q勁.  有興趣既朋友自己上網或者留意個台既重播啦, 既然係招牌節目我諗會勁重播既. 天才講到明係天生既, 我反而興趣不大;  我睇得最有興趣既係講女棋王既一集.

女棋王唔係所謂既天才兒童, 佢係一個後天訓練出黎既產品.  女棋王既老豆深信天才係可以後天訓練出黎既, 於是乎就攞左自己個囡黎做實驗, 日日教佢睇棋譜等佢第日做一個女棋王.  女棋王係歷史上第一個能夠係大賽擊敗Grandmaster大師級棋王既女棋手, 個節目就請左佢黎講下佢點解會咁叻, 研究佢思考既方法, 睇下有D乜野可以學到.

果一集節目我好鍾意.  我印象最深刻既一幕係: 個女棋王係路邊咖啡座坐低左, 枱面有一個空既棋盤同埋一副棋.  節目安排左一架大貨車係路邊駛過, 個貨車車身貼左一個棋譜既中局出黎, 女棋王要係架車駛過果三秒鐘睇熟個棋譜, 然後係自己面前個空棋盤擺番頭先車身果個棋譜出黎.  普通人用三秒鐘記到幾隻棋既位置已經好叻, 女棋王望一望就可以將廿幾隻棋既位置背番晒出黎, 個個都睇到呆左, 簡直能人所不能.

最正既係呢個實驗既第二部份.  同一架貨車又由路既另一邊駛番轉頭; 原來個貨車另一邊既車身都貼左一個棋譜出黎, 不過呢一個唔係真正既棋譜; 平時女棋王日日睇既都係歷史上既經典棋局, 但係呢一次個節目就安排左一個唔識得捉棋既人將D棋亂咁放係個棋盤上面做成呢個棋譜(即係話其實真正捉棋係冇機會捉到呢一個棋譜出黎既).  棋既數目同頭先就一模一樣, 但係今次女棋王記得幾隻棋就投晒降.

睇到呢度, 我就諗起花旗國前財爺格老.

最近睇左格老退休後出既自傳; 有一次係碼頭行過鬼佬書局"第一頁", 想搵幾本關於賭既書但係搵唔到, 但係就買左格老本書黎睇.  好多年前幫人地手攪投資既時候, 行內好多人都當左格老係一個神, 能夠預知天下事, 個個都一日到黑想知道佢對未來既睇法.  我就唔係太關心呢D野, 反而想學下格老諗野既方法.

身邊既朋友仔, 個個都一定有一個忙碌既藉口; 唔緊要, 仲有時間睇書既朋友仔, 我鄭重推薦呢一本書; 好好睇.  好睇既唔係佢對未來祖國同世界經濟既走勢推測; 呢D野唔洗佢講我都大約知會點, 最好睇既係佢做財長前自己同拍擋開顧問公司果部份.  睇完就明白: 格老能夠預知未來既秘密就係: 冇秘密.  係本書度, 格老講左好多佢以前係唔足夠資料(lack of data)既情況下佢點樣去估一D野出黎(例如國家總共既用鋼鐵數量), 點樣佢既估計後來發現同真實數據出奇地吻合(佢未做財長前, 有好多數據都攞唔到, 好多野都係要從raw data開始做, 仲要果時未有互聯網).

我當然唔敢攞自己同格老相比, 但係格老寫呢D野又真係好似曾相識.  成十年前刨香港國際賽, 片又冇, 賽績又冇, 互聯網都冇, 馬會份野淨係話隻馬一級賽跑第幾; 今時今日大家就明白有D一級賽係超勁, 有D一級賽係超水既.  果時我就叫一個係歐洲果邊讀書既朋友仔買一本聖經咁厚既racing annual返黎, 刨一隻馬要用大半個鐘, 想明白佢跑果場馬勁唔勁, 要睇佢前前後後D馬乜野料, 又要每隻馬再做大半個鐘頭, 一晚得做得幾隻馬.  我仲記得同D年輕一D既朋友仔講過: 你地今時今日刨馬真係已經好幸福, 比D心機啦.

睇完格老本書, 我就諗起我老板.

仲記得老板比我讀秘笈時, 佢同我講: 咁Q大本書, 你會有好多野唔明, 你隨時可以問我, 但係好老實果句, 好多野唔係三言兩語可以講得明.  唔明都好, 你要逼自己睇, 我想你做到一樣野: 睇pattern.  你不斷咁睇我每一場馬做既筆記, 有好多野你唔會明白我果時點解會咁寫咁諗, 你問我都可能冇用, 我老lu, 唔係一定記得以前既野.  但係你對番我寫既野同跑出黎既結果, 我失敗既例子你唔好睇, 你淨係睇我成功既例子, 慢慢你就會睇得出一D pattern出黎.  我想你學呢一D pattern; 跑馬其實好簡單, 發生過既野你一定要記住, 因為佢地係會係將來不斷咁重覆再發生既.  馬係出奇地老實既野黎.

“我失敗既例子你唔好睇, 你淨係睇我成功既例子”

好彩佢同我講左呢句, 慳番我好多時間, 唔係就行多好多寃枉路.

女棋王, 格老, 我老板, 佢地個腦係咪特別神奇, 我唔知.  但係我知道: 佢地三個都係睇pattern既專家.  Pattern係以往發生過既野重覆咁再發生, 人地睇唔出既pattern佢地睇得出, 呢D叫經驗.  經驗係唔可以買番黎既.  個女棋王節目最正果樣野就係: 呢D天才既經驗比到佢地一個感覺, 佢地平時做野就係用感覺黎做野, 唔係用計算.

呢度就要非常小心, 佢地既呢個感覺, 同普通人既所謂感覺, 完全唔同.  普通人既所謂感覺, 大家應該會明白, 例如: "我感覺到車仔就黎入波”, 或者”我感覺到今日會係賭場贏大錢”.  呢D感覺, 大家都知道有冇用.

女棋王自己係Grandmaster, 但係節目裏面有映到佢最擅長既遊戲: 一分鐘國際象棋.  兩個人捉棋, 除左棋之外仲有一個捉棋用既鐘, 每人都係得一分鐘去諗全局棋(講清楚: 唔係一分鐘一步棋, 係全局棋自己咁多步加埋唔可以用超過一分鐘), 所以好多步根本係用半秒鐘都冇, 快過打針.  呢個遊戲, 世界上冇人打得贏女棋王.  點解會咁?

女棋王個對手要用時間去諗, 但係女棋王自己就唔洗諗.  佢行每一步都係憑感覺, 佢感覺到對手黎緊會打算點行, 佢點行佢就點樣去應付, 個對手會點樣諗佢, 佢自己應該點樣去老點個對手等等.  佢有呢個感覺人地冇.  女棋王個感覺勁到點?  佢可以面前冇棋盤, 打電話同有個棋盤係面前既你捉棋, 佢都贏硬你.  佢個棋盤係………在心中.

當個波傳緊比舒夫真高既時候, 舒夫已經完全知道佢應該要點樣做.  佢唔單止知道佢要點樣做, 佢連個後衞會有乜野反應, 個龍門會唔會救到, 個波會點樣入網, 唔入既話佢可以點樣補中, 舒夫通通都知道晒.  佢仲可以話比你知佢未射球波出去之前, 佢已經係個腦裏面或者係個心裏面睇到個波點樣入網.  個波飛到去舒夫面前, 應該得一秒鐘都冇, 唔通佢仲要去計下佢每一個可能做到既動作裏面, 邊一個動作最著數咩?  舒夫踢波全部都係靠感覺.  但係老老實實, 我點睇都唔覺得舒夫有一個神奇大腦.  我當佢係西伯利亞奇人, 咁朗尼呢?  呢條友唔係識踢波既話, 佢個款似足一日到黑都係酒吧飲醉酒攪事果D廢柴, 佢個大腦又有幾神奇呀?

明白呢個道理既人就會明白而家公仔箱裏面講馬D友仔講既野係幾咁費.  一日到黑都係度話如果佢係呢度走入去又會點, 佢係呢度走出面又會點.  就等如你播番舒夫射唔入波果幾條片比舒夫自己睇, 同佢講: 嗱, 你呢度應該射近柱唔好射遠柱, 呢度就應該用左腳唔應該用右腳………你話個教練咁樣教舒夫既話會唔會有用?  呢D野你話有冇得咁樣計架呢?

我自問計馬一D都唔叻, 身邊有D天才球員刨到既馬, 我都唔Q知佢地點樣刨到出黎.  但係今時今日我好自豪既一樣野係: 老板話過, 我睇片仲多過公司全職睇片果班分析員.  分析員係有目的咁樣去睇片, 做好晒野就會放工鬆人, 但係老板話我係近乎一個無時無刻都係度睇緊片既人黎.  而家公司有乜野袋鼠國以外既片要搵, 上上下下所有人都會搵我, 我冇既話果段片多數都係勁難搵.  無論任何時候, 我身上或者袋裏面既電腦, PSP或者手機都一定有我仲未睇既片, 等我一有空檔時間就可以睇跑馬.  呢D片, 我燒晒比身邊既朋友仔睇, 但係我估冇人睇片睇得比我多.  睇完神奇大腦呢個節目, 我知道我身邊呢堆我亞媽認定係垃圾既錄影帶, DVD同書本雜誌, 其實就係我最寶貴既財產.

大腦其實一D都唔神奇, 同馬房果隻同主馬細腦我覺得神奇好多.