先講笑話一則:

話說老板二仔上個禮拜係袋鼠國搭的士去機場準備坐飛機黎濠江同我一齊攪展覽.  佢坐左一陣, 發覺個的士司機一路揸車一路打電話去賭狗.  作為公司嘅業務發展亞頭, 二仔當然唔放過呢個爭取生意嘅機會.

二仔: 我地XYZ公司你有冇聽過呀?  上市公司好穏陣架, 賠率又好你諗諗佢啦………

司機: 乜野XYZ公司呀?  未聽過嘅?  上市咁犀利?

二仔:  唔係掛?  我地XYZ都未聽過?  我地好出名架喎, 你諗真D………

司機:  ………XYZ………咦, 係咪即係寄生蟲呀?

二仔:  係啦係啦, 咪就係我地囉, 我咪就係寄生蟲個仔囉………

司機:  我小你老鼠………原來就係你地!!!  我幾年前本來有三架的士唔洗做, 而家得番一架仲要自己揸埋, 就係因為你老豆………小你老鼠………

身邊有個朋友話好鐘意睇我寫野, 過獎了.  佢話睇過我寫嘅野, 諗左好耐, 越黎越發覺, 開檔口原來冇佢以前想像咁容易.  佢以前一路都覺得有牌開檔口就等於有牌去印銀紙.

幫我老板攪檔口攪左咁耐, 真係有苦自己知.

幾年前香港馬會開始攪波, 波波見到賭波會係新興玩意, 即刻同埋幾個老友一齊開檔新野攪波.  果時馬會仲未有亞洲盤, 波波就打正旗號行亞洲盤, 諗住一開始一定有好多stupid money黎送死.

Stupid money真係好多, 問題係多過頭.  波波發覺其實佢個個禮拜都係同紅魔鬼死過, 其實同自己重鎚紅魔鬼對面冇乜分別.  其他波根本投注額少得好可憐.  紅魔鬼連贏幾場, 波波同D拍擋覺得咁樣唔係好對路, 即刻開會諗辦法.

波波身邊有D同行攪波攪左一排, 即刻同佢地成立友好聯盟; 兩個同行互相打下飛, 波波諗住可以將多過頭嘅紅魔鬼打比對面, 又可以收一D自己冇乜飛嘅波黎做吓, 睇落應該掂嘞掛?

人地幫你要左D紅魔鬼幫你手, 到人地打番飛比你你點都要受掛?  平時好日都唔打黎, 一打D奇形怪狀嘅北歐波黎, 隊波個名點讀都唔識, 鬼死咁大注仲要冇得用馬會走; 果時馬會仲未有北歐波,波波又唔識英文唔識同鬼佬買走咁一D.

人地買乜中乜, 兩個幾月輸左八位數, 中晒人地嘅圈套.  今時今日你問番波波, 波波會話佢肯定波係百份百假嘅.  最後波波無條件投降, 將D股份送晒比D拍擋, 冇眼睇.  波波話, 果年開左好多波檔, 超過八成係季尾前都要摺埋.

波可以係假, 咁六合彩冇得做馬嘞掛?

波波做得呢行, 當然深明食水可以發逹呢個道理.  靠佢嘅國內網絡, 佢又同另外幾個拍擋開始攪六合彩.  當然係國內嘅玩法: 四十九個波裏面, 買中特別號碼賠四十一倍.

呢D遊戲, 你問隔離屋Cxwong嘅話, 佢實會話你知, 唔做莊就笨囉.

我咁寫法, 你都知跟住發生乜野事.

波波拍擋叫晒佢係國內玩開六合彩嘅客仔黎同波波買.  有個國內有錢亞毛, 次次買七位數, 分大細注圍三份之一嘅號碼.  亞毛同波波買左總共八個禮拜十六次, 有八次有錢收.  第十六次開中最重注嘅三十四號, 買四十蚊賠千六蚊.  波波再次搖白旗投降.

波波如果請Cxwong做顧問嘅話, 我諗Cxwong實會話條友唔會咁好彩嘅, 佢繼續咁買嘅話佢實輸番比你.  但係, 又如何?  唔通波波攞副身家出黎同你死過咩?

劉華個老友A仔問過我: 你除左幫自己檔口賭馬之外, 老板又開番一個戶口比你買馬落檔口度, 咁咪好奇怪?  係咪有D矛盾呢?

完全正確.  係唔解釋太多之下, 我只會講: 正常員工係唔可以同自己檔口買馬, 但係老板同我有個特別安排, 我可以有一個戶口比我落自己同老友記嘅飛, 仲係有優惠折扣嘅添.  我同老板講明會有我身邊一D買得較大嘅人用, 我老板一D問題都冇, 非常樂意.

我上個禮拜睇番個戶口嘅結餘, 原來淨係呢一季唔夠三個月, 我身邊嘅朋友仔己經贏左我老板啱啱一百蚊.  呢排我成日同身邊嘅朋友講: 原來你地全部都係賊仔黎.

開得檔口, 一定要有個心理準備, 唔知會有幾多輸錢比你嘅友仔會幫襯, 但係第一件會發生嘅事就係會引晒D勁高水準嘅飛黎偷你嘅錢.  講到明係高水準嘅飛, 人地做得職業或者係半職業, D飛肯定係惡到暈.  人地如果玩完一季係輸嘅話又點會做到職業呢?  你開得檔口, 你第一件事唔係諗可以贏幾多錢, 而係諗點樣去應付呢D想你死嘅友仔.

波波以前嘅經驗就係: 一開始真係乜都唔洗做就會贏.  但係慢慢D輸比你嘅友仔就會越買越少直至人間蒸發, 贏你錢嘅友仔就會越買越大.

事情嘅發展其實好順理成章啫, 咪叫D贏錢嘅友仔死開囉.

話咁容易咩?  你唔比佢買唔係問題.  問題係: 之後開新戶口嘅友仔, 你點知邊個其實又係佢返黎想整死你?  其實好難怪個職業賭客; 佢都係做生意啫, 對佢黎講當然每一個百份點嘅回報都好重要.  呢D友仔可以同檔口買嘅話, 佢又點會走番去同馬會買呢?

馬會一向都覺得佢地生意唔好係因為有檔口.  事實係: 檔口主要嘅目標客戶同馬會嘅主要目標客戶根本就唔同.  同檔口買開嘅客戶根本就唔會同馬會買, 通常都係兩個原因: 一係就係個客根本就唔係身在香港, 想開個馬會戶口都開唔到; 一係就係個客係買得好大或者係職業客, 要一個好嘅折頭.  冇晒檔口嘅話, 個職業客係咪會走番去馬會度買呢?  其實好有可能當冇左個折頭嘅時候, 盤生意己經係無利可圖, 個客根本就唔會玩落去.  當年大B所向無敵嘅年代, 七隻馬平磅跑直路, 我老板D客買副身家落去大B跑披, 為左乜?  冇左我老板頂硬上硬食一野, 個客會唔會走去馬會買副身家落去大B披度呢?  你話呢?

我唔係係檔口做野至幫檔口講好說話, 但係事實上有檔口幫手做套戥, 呢D客嘅飛至有一部份可以落番去個電算機度, 等大家都有得玩.  馬會同檔口嘅角色唔係對立嘅, 其實係互相幫助.

公仔箱或者報紙佬成日都係度鬧馬會, 話賽事唔公平攪到馬迷失去信心唔再玩.  其實聰明仔就會明白, 賽馬由頭到尾都係唔公平嘅.  就係因為個遊戲唔公平, 馬迷至會有機會贏到錢.  明唔明?

如果賽馬黎個翻天覆地嘅大改革, 唔好理點改但係總之攪到個遊戲係對D參賽馬好公平, 好多正路馬會贏出黎, 但係隻隻都會係熱過紅魔鬼主勝, 咁馬迷仲會唔會賭馬呢?  而家係有好多唔係實力最好果隻馬贏嘅賽事, 但係佢有賠率比番你喎.  馬會嘅角色, 唔係要令到個賽事公平, 而係要令到馬迷覺得個賽事公平.  睇清楚兩句有乜野唔同: 第二句多左”覺得”兩個字.  多兩個字差好遠架.

一級方程式賽車就係一個真係好公平嘅遊戲, 你知唔知幾年前有幾多人投訢話D車唔好睇因為車神勁過頭?  係咪公平就係最好呢?  係咪有得賭賽車嘅話, 大家就會好放心咁買好多車神獨贏呢?

你有冇聽過人地話而家D馬越黎越難賭?  就等如D人話而家D年青人真係一代不如一代.  幾十年前係咁講, 我睇幾十年後一樣又係會咁講.  馬迷會繼續鬧馬會, 馬會會繼續頼檔口.  買得細嘅繼續買馬會(因為檔口唔受十蚊飛), 買得大嘅繼續買檔口.  呢個三角關係其實係好微妙, 互相唔鍾意對方但係又互相要依賴對方.  係呢個三角關係裏面, 冇一個有絶對優勢嘅角色.  個個都會覺得人地好著數自己好鬼慘, 其實幾十年黎呢個關係從來都冇變過, 以後都應該繼續會係咁.  查實家家有本難唸的經.

最後又講笑話一則:

我老板係袋鼠國都一向有養馬.  佢有一隻廢柴, 跑左十幾次都係披都冇.  直至上個禮拜, 係完全冇人睇好之下, 六十一倍破處女身, 贏得清脆脷落.  我同老板講電話嘅時候, 順便恭喜下佢.

我: 恭喜晒喎, 終於贏番一場.  中得多唔多呀?

呢D咁感人嘅故事, 真係聞者心酸.