話說禮拜四晚同朋友食飯, 席間有人提出, 佢睇過我寫嘅野, 佢唔明白點解我地會買一D我地覺得會輸嘅馬.

我話: 我先問你一個問題: 你可唔可以答到我, 係賭場裏面, 點解絶大部份嘅賭客會輸錢?

佢睇過我寫嘅野, 都知佢會點答我: 水位.  賭客每賭一鋪, 賭場都會抽水, 所以賭客長線玩係必敗嘅.

佢嘅答案係啱嘅, 但係唔係我想提出嘅野.  如果賭客輸錢係因為抽水嘅話, 絶大部份嘅賭客都係可以攞番佢大部份嘅錢.  就以濠江賭場遊戲嘅水位為例:

廿一點普通人玩: 2-5% (完美基本策略: 0.16-0.32%)

百家樂: 1.06-1.24% (買對子: 14.36%)

骰寶 (大細同單雙): 2.78% (買其他格仔抽到亞媽都唔認得)

加勒比海: 5.225%

輪盤: 2.7%

即係話你玩百家樂, 你買一百蚊, 你係平均會攞番九十八個幾.  你玩一百次每次買一百(total 一萬), 你會攞番九千八百幾蚊, 輸百幾蚊.  但係你睇下有幾多人真係玩完一百鋪係輸百幾蚊? 

就等如賭馬, 一個新仔乜彩池都買吓, 平均抽水百份之二十.  即係話, 佢應該會攞番佢總投注額嘅百份之八十.  但係實際情況係: 好多人係會輸到清晒袋.

聰明仔即刻走出黎話: 呢個係因為佢將同一筆錢turnover左好多次, 所以佢嘅總投注額係大過佢荷包裏面錢嘅總數好多.

都仲係唔啱.  我玩廿一點, 成日隔離有條友坐低, 攞五百一千出黎玩, 幾鋪就輸晒.  點止抽水咁少呀?

我朋友終於開始明白我講乜.

係統計學上, 每一個distribution都有兩個measurement: 一個叫expected value/expectation, 我地用mean黎表逹呢樣野.  另一個叫variance, 我地用standard deviation黎表達呢樣野.

我上面講嘅水位同數字, 只係講緊你玩每個遊戲嘅expected value.

朋友仔早排過黎濠江玩.  佢同我講, 佢係水中寶玩廿一點, 一百蚊一手輸左四千, 慘敗.  呢個朋友仔, 我都叫做教過佢玩基本策略, 照計應該抽水千份之三.  點會輸得咁甘呢?

我聽到佢咁講, 我心裏嘅反應其實係: 輸四千其實好正常, 再多D我都輸過.

我唔係stat嘅專家, 容許我直接講答案: 如果你玩一百蚊一手廿一點完美基本策略, 當你玩一晚六個鐘頭, 百份之九十五嘅時間你會正負五十手.  即係話: 你贏或輸五千蚊係完全正常, 同你黑唔黑完全冇關.

正常一個職業廿一點賭客, 佢要準備好輸五至六倍呢個銀碼做自己嘅bankroll, 即係話佢要準備兩百五至三百手嘅本錢, 佢至可以開始玩廿一點.  亦即係話: 你諗住玩一百蚊一鋪廿一點嘅話, 你個荷包要至少有五千, 同埋銀行戶口要再有兩萬五可以輸.   你連呢三萬蚊都輸得晒, 咁就應該係你未攪掂個基本策略, 仲係錯漏百出, 又或者你係比正常嘅人黑.  五千同兩萬五呢兩個銀碼都係計出黎, 唔係我估或者作出黎; 呢D野係統計學裏面全部都係有得計嘅.

我隔離攞五百蚊出黎玩廿一點果條友, 佢其實要搵一張十蚊枱黎玩.  否則佢根本唔會頂得順個上上落落.  佢坐得落張一百蚊枱, 其實佢同將五百蚊送比賭場冇乜分別, 除非佢有驚人嘅運氣, 佢個浪只係會向上, 唔會向下.  佢唔會應付到呢個搏彩遊戲嘅variance.

講番馬, 答番我朋友個問題.

身邊好多朋友知道我做乜, 睇過我寫嘅野, 會以為我同我老板係兩個全職賭香港馬嘅友仔.  如果係咁, 我老板根本就唔洗開檔口做到上市, 自己一條友係屋企日賭夜賭就得.  事實當然唔係咁.

進一個層面.  我地係檔口, 我地會收好多飛, 如果D飛係我地鐘意嘅馬我地就打出去, D飛我地睇會輸嘅話我地就自己食左佢, 再加上自己賭馬.  事實當然亦都唔係咁.

再進一個層面.  我地用rating計馬, 出每一隻馬贏嘅機會率同值搏嘅賠率.  我地唔知邊隻馬會贏, 邊隻馬會輸, 但係我地買抵買嘅馬, 冷過我地計到嘅值搏賠率我地就買, 熱過頭唔抵買嘅馬我地就受.  事實依然唔係咁, 不過近左一D.

再進多一步, 用Kelly.  Kelly計出呢場馬對我地有幾有利, 建議一個我地投注嘅數目; 場馬對我地越有利, 我地就越買多D.  又再近左D, 但係事實都唔係咁.

我地係有Kelly, 我地亦都會有攞黎做參考, 但係好老實講, 唔會點用Kelly.  Kelly係冇錯嘅, 但係實際上要執行係有好大嘅困難.  其中一個原因係我地係檔口, 每秒鐘都收緊飛, 所以自己個實際position係會變得好快.  如果真係用Kelly買, 有時我地係要買好Q多飛, 買到近乎成架電算機都係我地黎.  當然, 我地可以隨機應變, 或者用一D變種嘅Kelly.  上面呢一句: 場馬對我地越有利, 我地就越買多D, 基本上係啱嘅, 我地亦都盡量咁樣去做, 但係你可以話: 我地實際執行時係只會用人手去做大約Kelly會做嘅野.

如果我地用任何一個Kelly, 只要我地一出飛, 人地就好容易知道我地盤數係點.  你可以話, 其實完全唔關Kelly事, 你唔係用Kelly, 人地如果估到你盤數嘅話, 你都係一樣咁大鑊.  啱, 但係無可否認, 我地D主要對手, 尤其是好想我地死嘅友仔, 佢地全部都有Kelly.  有一D飛一黎到我地度, 我地一睇就知道呢條友仔係用Kelly.  我地睇得出嘅話, 人地都可以睇得出.

我老板玩香港馬有兩個主要嘅幫手, 一個係我老豆, 一個係我.  好老實, 我覺得我老豆玩香港馬完全唔係我果皮.  但係老豆有一樣野強過我好多: 佢知道乜野係風險.  佢有時幫公司買Q, 我真係想同佢講我想受左佢.  冇錯我係完全受唔起, 但係我真係好肯定佢買呢幾條Q一定一定一定唔會跑出黎.  我嘅睇法, 百份之九十九嘅時間係冇錯嘅.  但係另外果百份之一嘅時間, 佢就救左公司.

公司都有做過統計, 呢D我地睇死Q梗嘅飛, 全年拉勻我地係輸嘅.  我地全部都唔買嘅話, 我地係賺多左錢嘅.  我老板開檔口開左超過三十年, 我老豆跟左佢做野十八年, 點解可以做到今時今日?  佢地知道風險管理嘅重要性, 佢地寧可公司賺少一D, 但係佢地唔會比自己有清袋嘅機會.  就係咁我地至有今時今日.  佢地係願意用錢去換取一個波覆細D嘅浪.

呢D要黎管理風險嘅飛, 我地想唔想佢跑出黎?  當然唔想.  佢唔跑出黎我地一定賺多D.  最攪笑嘅就係: 有人會睇到我地買, 以為我地好有信心, 佢就跟住我地買.

我地買飛, 當然唔想人地跟.  戰場上嘅策略當然就係: 出一D假嘅飛.  外面跟左我地呢D假嘅飛, 輸得甘甘地, 個盼望就係佢地輸多幾次就唔好再跟, 咁我地真係要出好多飛嘅時候就會方便好多.  呢D蕉皮我地想唔想佢跑出黎? 你話呢?

跑馬係人都知冇真係贏梗嘅馬, 但係香港地跑馬, 間唔中就會有一兩隻一點幾倍, 但係橫睇掂睇都冇乜理由會有得輸嘅馬出黎跑.  諗都諗到, 呢D馬我地會收好多飛返黎, 尤其是大客, 貪我地有折扣, 乜Q都過晒落呢D馬果度.  面對住咁多飛, 隻馬係好熱但係我地又真係覺得冇得輸, 我地打番晒比馬會都會蝕水蝕死.  點算呢?  我地會將適當嘅份量嘅飛打落去馬會, 將賠率控制係某個位.  實際想做到嘅係: 減少要賠比客嘅錢, 同阻止客仔繼續買呢隻馬, 因為隻馬越熱就會越少人買.  呢D飛我地想唔想佢中?  你話呢?

Odds theory呢個科目, 好老實講我覺得好難.  呢個係我同我老板最重要嘅工作之一, 明白賠率走勢同賽果嘅關係.  老板請我其中一個原因就係因為佢睇得起我係呢方面嘅功夫; 幫左佢手之後就越黎越覺得自己仲有不足嘅地方.  睇飛唔係普通人可以明白同體會嘅野黎.  你睇到有飛, 你要明白隻馬點解會有呢個飛, 點解會有人買, 邊個買, 點解買呢個錢, 點解呢個時間買呢注飛, 所以我最近成日同人講, 我幫公司做嘅野, 己經係近乎冇人明白.  盲目見有飛落就跟, 只係死路一條.  落飛就得回飛就唔得, 我都想係咁; 係咁容易就好囉.

最後講清楚一個disclaimer: 以上提過嘅技巧, 係受過專人訓練, 大家係屋企千祈唔好亂學.  檔口同賭仔嘅身份係唔同嘅, 你唔好無啦啦開始走去買D你唔想佢跑出黎嘅馬, 輸Q死你嘅話唔關我事架.