話說尾場, 班伙記有D己經準備緊一跑完尾場就鬆人, 我就死諗爛諗, 諗緊點買同等緊老板回覆.

我當然唔係而家至開始刨, 場馬我諗住買乜一早就心裏有數.  全日心水擺左係度, 隻北方英雄係賭佢嘅最佳時機.  呢位練馬師我從來都冇好感, 但係呢次呢隻馬擺呢個騎師係極度make sense.  仲記得我老友劉華問做乜等佢輸幾次至呢次貼佢做心水, 我同佢講, 實力一D都唔擔心, 上幾次跑得唔係幾好, 唔知係咪隻馬有D事, 呢個練馬師雖然我唔鍾意, 但係佢係一個好down to earth嘅horseman, 隻馬有事佢應該會知道, 佢唔會偷懶睇漏野掛; 佢唔識賭唔關我嘅事.  輸咪叫SD拉倉囉, 但係佢今次會好難得地唔係大熱門.  死人山高一日到黑都提住佢國際賽日佢殺低乜野馬, 等佢冷番D都等左好耐.

劉華好早就比左飛我叫我幫佢買, 主要環繞住五六七八號四隻.  揀得都算OK, 但係我唔會賭七八呢兩隻.  亞蘇隻七我都仲係想等佢返去谷草至再睇佢; 逹哥隻八我有D驚佢仲會現場落D飛, 六倍幾我唔覺得好好value; 起碼大家差唔多賠率我死都要番六.  五號汗血寶馬就好好多, 我只係調查覺得佢唔值得做大熱門, 最尾幾分鐘睇下賠率至決定補唔補win; 五六Q我就一定會有.  劉華仲有隻十一永恆的龜.  呢隻跑出黎我切, 贏得嘅話轉過去亞東度嘅話佢海外制覇都有可能, 唔知憑乜野咁鬼熱.  唔係話佢唔好馬, 但係初出跑呢場對呢班對手, 點部署架?  你估你係龜王咩?

心水冷馬有兩隻.  亞東動態上唔似會跑隻十, 但係呢隻馬我睇過晨課同試閘, 應該唔會係屎馬, 睇佢幾時黎料.  最大問題係動態: 亞東自己都冇賭, 有賭又點會廿九幾倍呢?  隻天雞我都會買番D, 呢個馬房我唔會點諗佢衰野住, 新馬房跑得就會跑, 今年都靠過佢幾次, 唔錯.  唔夠跑就算, 但係冷都飛天, 我點睇都唔會落飛.  Win諗住六九十對碰, Q睇埋隻汗血寶馬D飛點樣.

睇過自己個exposure同埋客仔買乜, 似乎唔洗補好多北方英雄出去, very good.  我可以盡情賭佢.

呢度要講清楚一D.  我地作為trader, 除左自己幫公司賭之外, 有一個好重要嘅任務, 就係幫公司補飛.  公司會將公司所有主要嘅客分比每一個trader.  香港馬嘅trader唔係咁多, 連埋我同老板有四個.  我每一場馬要睇住一個monitor, 個mon就係顯示分左比我果D客佢地買左D乜, 我作為trader就要決定點處理佢地呢D飛(英文我地叫process the tickets), 有乜野飛我地會打番出去, 有乜野飛我地會食左佢.  每個trader可以幫自己手上嘅飛作出自己嘅決定, 唔洗問公司.  當然, 你補成點係會直接影響到你自己嘅成績.  所以就會有個情況, 個個trader補嘅野都會唔同, 因為個個trader係各自為政, 唔會理其他人會補乜.  第三者可能會覺得好奇怪, 係咪搵一條友中央處理會好一D呢?  而家咁樣做法, 如果個個補嘅野都唔同嘅話, 其實係會有好多wastage, 尤其是大家都補唔同嘅野嘅話, 其實大家都唔補, 公司就會賺多D, 風險又唔會加大左, 因為個個互相cover番對方.  但係又話分兩頭, 公司咁樣安排就教多左好多人點樣去做補飛呢個動作.  唔易架, 試過至明白個難度係邊.  起碼而家有一日, 老板叫我幫佢頂住一日我諗我都可以應付到.  補飛嘅野, 第日有機會再講多D.

仲有九分鐘, 我自己要賭同補嘅北方英雄, 假設佢唔係點落飛嘅話我要買五十蚊左右, 為左保障自己, 我send 個message去公司問老板佢想我點.

公司冇要求我咁做, 呢個係我為老板設想至做嘅動作.  原因得一個: 我冇估錯嘅話, 老板都會買北方英雄, 我要知道老板想佢幾多倍開跑.

唔好以為我地真係可以控制到賠率; 你估呢個世界得我地玩香港馬咩? 但係我地賭一隻五六倍嘅馬, 老板要買嘅話佢可以令到佢落飛.  落唔落到佢心中佢想要嘅賠率我就唔知, 但係我知我想賭佢賭果隻馬果陣時, 記住記住記住開聲話比佢知, 越早開聲越好, 唔係比老板問候自己屋企人就唔係幾好.  老板絶大部份時間都唔會有問題.  七分鐘, 佢叫我照去, 但係唔好再買多D, 佢都會買多少, 如果真係仲要補嘅話最好話聲比佢聽, 否則就會攪到一鑊熟.  我當然識做.  我做好準備, 幫老友隻馬打氣.

五分鐘, 班伙記個個攞起電話幫手出飛.  個個trader要出嘅飛入晒落電腦, 班伙記就跟住電腦上面嘅野出, 今時今日通常都唔會麻煩到我.  我就密切留意住飛數嘅變化, 睇下洗唔洗最後補一D飛.  通常我同老板都會一路買飛買到D馬出閘, 出飛嘅伙記都可以幫我地攪掂; 呢個係佢地嘅工作.

三分鐘, 伙記同我講, 頭位嘅幾條Q都出唔到, 洗唔洗打晒比馬會, 叫我問一問老板.

我地出飛嘅渠道當然唔止一個, 其實絶大部份嘅時間係唔會打比馬會.  我地相熟嘅大檔, 全部都會受我地嘅飛.  佢地有D有做retail香港馬, 有D冇; 呢個只係retail, 如果有大客要買香港馬, 冇做retail嘅檔都一定會受.  你可能會問: 如果佢地唔做retail, 佢點會受得起?  得幾個大客買, 冇得做套戥, 個客中左咁點算?  真實個答案我都唔知.  我諗有D就真係全部都打番晒出去; 做得大檔, 同對面檔口買一定有好折扣, 全部打晒比對面通常己經攪掂.  有D可能會受一D, 打一D出去, 尤其是個客通常都係輸嘅話, 死人都受佢.  又再講一次disclaimer: 我地係上市公司, 我地打去嘅檔口全部都係合法有牌嘅, 佢地自己再打比D乜野人就唔關我地事, 我地唔會理.

咁邊個會受我地?  我地嘅飛佢地受黎做乜?  未死過咩?  我諗最有可能嘅答案係: 對面好多時想知我地買乜.

老板冇即刻答我嘅問題, 我叫左兩個伙記準備好, 可能要打去馬會; 查實有兩個伙記係每場專門負責買馬會度, 但係如果要買馬會嘅飛太多, 可能佢地兩個都會出飛出唔切; 買馬會最衰果樣野係: 一定要馬會條友仔覆實至可以買下一條, 所以出馬會係咁多條渠道中最慢果條, 又要條條最好買夠一蚊, 唔係就冇折.  我再睇一次個mon, 再收多一條三六單Q兩蚊, 我開始有D擔心.  頭幾位都係三號Q.  連獨贏都係三號擺頭位.  我再問一次出飛果邊, 對面幾檔全部都唔要三號Q咩?  我條囡話: 呢幾條Q係佢地比我地嘅.

同一時間, 老板send message比我: 三號係老虎仔黎, 全部唔要.  得番一分鐘都唔夠, 大鑊.

老虎仔係邊個, 係香港職業賭馬集團行內無人不知.  八十年代佢伙拍電腦奇才組成嘅集團當年嘅風光事蹟, 近年連坊間書籍都會有講.  佢同電腦奇才反晒面分家, 電腦奇才返左去花旗國退出江湖, 老虎仔就一直玩香港馬玩到而家, 聽講而家佢基地係賓賓國.  老板同老虎仔可以話係呢一行嘅死對頭, 一個開檔一個做閒, 一攻一守打仗打左十幾年.  我老板話過: 我一睇D飛就可以見到老虎仔嘅足蹟係上面(these tickets have his footprints all over them), 熟到咁都得.

三號勁將軍, 我諗都冇諗過.  唔係覺得佢全無機會, 問題係呢個馬房D馬如果得嘅話, 連我屋企樓下個飛髮佬都知佢D飛應該係點樣.  我老板一直都同我講, 呢位練馬師同老虎仔應該係有路嘅, 唔係佢D馬冇理由會有咁多飛.

大佬, 勁將軍成六十幾倍, 佢如果真係得嘅話……….

我己經唔記得左我本來諗住做乜, 乜都唔Q做, 即刻同伙記講: 三號Q全部走晒佢, 唔好理其他飛.  我再睇一次部mon, 頭七位嘅Q都係三.  今次中晒計.

我: 你走三五, 你三六, 你兩個快D打電話去馬會, 你三七, 你三八, 快D!!!

有個死仔仲幫老板出其他嘅飛, 比我小佢小到飛左上天花板.  我: 你, 幫我走三號win.  佢: 幾多?  我: 部機有幾多呀, 走晒佢啦!!!

有個伙記: 三六走晒, 咁而家走乜?  我啱啱想講三十, 又見到有兩蚊三六入黎.  我: 再打去, 三六, 快D!!!

後面嗌: 入緊閘, 入左三隻!!!

我地通常入剩四隻就會熄機停止受注.  我: 而家熄機, 快D!!!  唔受嘞!!!

入剩兩隻, 我同伙記講: 打去對面, 三拖五六七八十每兩蚊, 三號獨贏三蚊.

D馬出左閘, 馬會停左, 通常對面仲會受五至十秒左右.  班伙記識得點做, 係咁出一直至到冇得出為止.  個個一路擺低電話一路同我報告: 三七ok, 三八ok, 三五一蚊, 三六一蚊…..

出馬會條友: 最尾一注三號win唔知出唔出到……..  我好Q想小死佢, 但係我知唔關佢事, 同馬會買嘅最後幾注好多時好難講, 有時得有時唔得.  叫佢地覆一次就一定清楚, 但係我地同馬會一個電話平均買四十幾條飛, 點覆呀?  我問條友: 最後果注係乜?  佢: 三號獨贏四蚊.  佢問我要唔要條飛, 我話要.  我地每出左一條飛, 就可以係部機度delete左條飛, 咁老板就會睇到條飛出左.  我話要, 即係話比老板聽條飛出唔到.  老板肯定會小我, 但係呢個唔係最大嘅問題, 最緊要係好現實嘅一件事: 千祈唔好跑出黎.  D 馬轉彎入直路, 我睇左一睇賠率, 北方英雄得番三十幾蚊, 勁將軍五十幾倍, 我知最後果注飛好大機會出唔到, 出得晒嘅話, 三號應該得三十幾四十倍.  北方英雄個位超靚; 勁將軍包尾飛左出去, 衰到爆.

北方英雄一出頭我知掂晒, 隻馬有D內閃但係汗血寶馬都係得咁多, 見到天雞一衝上黎, 我睇得好興奮.

突然聽到山高把聲: 大外檔仲有勁將軍衝緊上黎!!!

有個伙記: 嘩真係三六呀……….死嘞………

D馬一齊衝過終點.  有個話三號贏, 有個話六號贏.  我腳都軟埋, 頭有D暈.  我知可能好大鑊, 但係我肉眼睇冇錯嘅話, 好似係六.  但係我唔敢講.  我再問一次出飛果邊, 三六出唔出到?  佢地話ok, 最後兩蚊比左對面; 呵呵, 對面己經衰到貼晒地.  三號win出唔出到, 佢地話而家打去馬會check飛, 應該唔得.  條Q保得住, 問題係獨贏.

全個寫字樓淨係得覆飛條友一個人把聲, 靜到叉街, 冇人夠胆出聲.

突然有人大嗌: 六呀!!!!!!!  十幾條友一齊: 嘩, 嚇叉死………

埋單淨係呢場輸少少, 但係我自己大勝, 公司拉勻全日都贏.  老板唔會小死我掛?

放工, 我走出寫字樓望下個天, 真係夕陽無限好.  外表同平時普通嘅一日完全冇分別, 心裏邊諗都唔敢諗, 頭先呢個鼻值幾多錢.