話說禮拜六, 我同我東洋朋友肥田係我酒店會面, 中午出發去法蘭西馬場.

查實我禮拜五晚己經經沙漠到左法蘭西, 老板要我係年底前搵一日去佢倫敦寫字樓開會.  果邊班手足都算唔話得, 知道我開完會要趕過去法蘭西跑馬, 晨咁早七點半同我開會.  為左順利完成任務我真係趕到叉街, 但係有得現場睇法蘭西終極大賽真係辛苦D都值得, 好彩今年終極大賽撞到正祖國生日; 冇呢一日假期就唔會有呢個安排.  祖國萬歲.

香港去到法蘭西用左足足十七個鐘頭, 全程唯一嘅驚喜就係係沙漠機場免稅品店買左D沙漠盃嘅紀念品.  去睇法蘭西大賽但係帶住沙漠盃嘅戰利品返黎, 我真係一個好奇怪嘅人.

係法蘭西馬場附近嘅地鐵站一行出黎, 己經感受到東洋兵團強大嘅威力.

有大約二十幾個東洋兵企左係二四一號巴士站度等緊巴士, 二四一號係去馬場嘅.  以我極度有限公司嘅法文我知道個站上面個牌寫住呢個站今日暫停開放.  我又唔識講東洋話, 肥田又掛住搵路去馬場, 算啦, 我諗佢地最終一定會去到馬場嘅, 希望佢地原諒我冇幫佢地啦.

搵到一架去馬場嘅專車, 兩蚊歐羅唔係問題, 問題係個司機話車滿至會開車(查實我都唔知佢同我講乜, 但係我肯定佢嘅意思係咁), 但係車上面得兩個人, 肥田驚要等好耐, 死都唔肯上車.  又冇的士, 點算呢? 肥田話: 我知道係呢個方向, 行過去啦, 應該十五至二十分鐘會到.  我地就大踏步向前推進.

肥田好似行得好有信心, 但係我就好唔安心.  條路行緊嘅人全部都係東洋兵, 都冇法蘭西人, 唔係好可靠.  行左五分鐘, 頭先果架專車係身邊經過, 成車滿晒, 全部都係法蘭西人. 唉, 真係小你老鼠.

行左成半個鐘, 仲未到, 我己經好氣餒, 前面有成四五條路比我地揀, 條條都有東洋兵行過去; 肥田捉一個跑步經過嘅人問路, 都唔知佢講乜.  其實情況真係幾攪笑: 我覺得東洋兵團用左螞蟻嘅策略: 我見到好多迷失左嘅蟻係度亂咁行, 有好多可能會壯烈犧牲, 但係都有好多會最終去到目的地, 因為佢地數量多.

我冷靜落黎諗左一陣, 同肥田講: 肥田你信我, 應該係右面呢一條, 跟我黎.  條條路都有個牌話去馬場, 但係我留意到得右面一條係零零舍舍有法蘭西人行嘅.  好彩肥田信我, 行左五分鐘, 法蘭西馬場門口就係我地面前出現.

我決定聽日我會係酒店call的士去馬場, 唔准行路去.  貴一貴都比.

一入去馬場, 嘩, 東洋兵團真係勁到飛天, 周圍都係佢地嘅人, 勁.  馬會當局亦都好識做, D路牌己經加晒東洋文.  門口隔離果個精品店寫住” CARD受付”, 笑死我.  D東洋兵都好唔比面, 尤其是係價錢低D嘅紀念品, 打火機, 原子筆之類, 幾十個幾十個咁買, 我知聽日之前所有嘅精品都會品切.

今日唔係摶殺嘅一日, 我會做個普羅馬迷享受一日賽馬, 拎起相機就周圍去影相.  個馬場好靚, 感覺同香港, 獅城或者府中好唔同, 有濃烈嘅傳統氣息.  當然, 人地跑馬跑左N咁多年, 梗係有D heritage嘅.  我行出去公眾席廣場, 望一望個看台.  嘩, 係好靚, 但係………細唔細D呀?!?!?!  我諗起以前去過東洋嘅船橋競馬場, 應該差唔多大.  呢個看台, 應該得跑馬地看台三份之一咁大左右, 聽日會有五萬人係度.  我知道, 聽日早D黎霸位係一個key success factor.

全日有一場G1四場G2, 另外直播對面海有場G1太陽馬車錦標.  法蘭西場G1 Prix de la Foret, 我全日得呢場有錢收, 油王契仔騎到頂呱呱, Caradak有五倍其實好抵買, 中到呢場夠我玩全日, 反正買雞仔注冇乜所謂.  對面海果場G1得五隻馬跑, 比我買嘅話我要買第五次至中到贏果隻, 都唔知跑乜馬.

其實以玩雞仔注黎講我己經玩得好好, 場場買一至兩隻馬, 我中左Caradak但係有四場我買果隻跑第二.  第六場Prix Daniel Wildenstein G2馬女跑千六, 日本金童子騎隻東洋馬女Picaresque Coat, 大震蛋件綵衣, 難得冇比東洋兵團買到熱晒, 有成十一倍全場第二冷, 梗係買番D支持一下.  行出去看台撞到肥田問佢有冇買, 原來佢都唔知有隻東洋馬今日出場.  問佢呢隻馬係祖家算唔算勁, 佢話佢聽都未聽過有呢一隻馬, 似係一隻陪大震蛋黎法蘭西嘅馬女多D, 等大震蛋搭飛機唔會咁悶.  唉, 心都涼埋.  好彩金童子冇令我失望, 一開閘應聲彈出, 放得有聲有色, 入直路一彈彈開, 到我以為收錢之際, 契仔隻兩倍大熱門Echo of Light一路外閃一路衝上黎, 過去終點之後隻馬貼住條外欄收慢停低.  D東洋兵團全部鼓掌話金童子騎得好, 心諗連呢隻二打六都可以G2跑二着, 聽日隻主角仲唔贏?!?!

跑完第七場, 我買隻Manduro衝上黎追唔到Soldier Hollow跑第二輸一條頸, 條氣有D唔係好順.  同肥田話我唔玩尾場lu, 留返D彈藥聽日同佢死過.  全日騎到著晒火嘅係油王契仔; 東洋金童子同靚仔蘇都騎得相當之唔錯; 飯易燶就唔係好掂.  跑馬果陣時鬼打都冇咁精神, 跑完馬出去市中心同肥田食晚飯我真係想死.  肥田話跑馬比到動力比我, 如果世界上再冇馬跑嘅話可能我會生存唔到.  佢都講得幾啱.

臨散前我同肥田講話聽日我會同香港朋友準時十一點去到馬場, 馬會話比我知聽日馬簿會嚴重短缺, 要拎嘅話一定要盡早去.  肥田約左佢自己嘅東洋朋友十一點半酒店等, 佢地自己遲D黎.

返到酒店, 較好鬧鐘, 暈左.

鬧鐘六點三叫醒我, 鬼打都冇咁精神.  香港十場東洋一場法蘭西八場, 加埋十九場馬, 朝早六點幾起身跑馬個感覺都幾特別.  老板其實放左我一日假, 職責上今日我係唔洗玩香港馬, 但係我要玩都可以玩, 我頭果大半都會玩到, 尾果幾場就應該唔得.  場短途我交左功課比老板, 佢話佢會自己攪得掂, 當然法蘭西場終極大賽我一早就做好左比佢.  點知老細話我D賠率做錯晒, 佢而家要玩香港馬唔得閒小我但係遲D會小我一輪; 唉, 死火.  佢email左佢盤數同公司個position比我睇, 真係佢啱我錯, 終極大賽八隻馬跑, 是但一隻跑出黎公司都贏, 老板不慚為老板, 服晒.

香港馬第一場呢邊晨早六點九開跑, 我賭完呢場至落酒店大堂食早餐;早餐七點鐘開, 同埋我全日心水就係係呢場.  一過終點, 老友send短訊話唔好意思, 可能佢又搭沉我隻船.  唉, 點會呢?  我從來都唔信呢D野; 可能係我搭沉亞東隻船呢?  又諗番起琴日D第二, 近兩個賽馬日嘅心水馬, 一隻幸運冰冰, 一隻太好馬, 真係輸得好慘.  如果真係我黑, 今日隻大震蛋就真係有排震lu.

食完早餐返黎等玩短途, 講真我呢場冇乜心水.  我睇得三隻馬贏得: 袋鼠, 藤正同岳禮華.  東洋馬我鍾意岳禮華多D; 藤正上一場贏得靚但係呢場馬我真係睇得唔高; 佢有機會贏只係因為東洋馬屎.  級數應該係岳禮華最高, 但係佢跑呢個場一向屎到爆.  袋鼠跑得番佢係自己本國嘅水準嘅話一定橫掃, 但係最慘我睇左佢上一場點跑; 雖然頂磅係藉口但係臨尾佢力弱得好快.  大B跑得近嘅話我切.

點知睇直播, 岳禮華休息四個月仲可以輕左咁多, 瘦晒, 啊好野瓜得.  真係冇晒心水.  唔怪之得連肥田都對場短途全無興趣; 可能大震蛋真係勁過頭, 東洋D一哩同短途比外國㩒住搶, 難得嘅係佢地唔會好似香港人嘅諗法話比人黎提款, 仲好努力去參戰.  如果呢D情況係香港出現D口痕友又唔知會講乜lu.  場馬連大B都可以跑到個咁近嘅第四, 袋鼠贏到開巷一D都唔奇, 四隻海外馬全部入晒頭七名, 東洋馬攪乜鬼架?  有個老友講得啱, 如果勝利煎堆有份跑應該會跑得好近.  嘩, 好彩冇人知我會切啫.  老板用最原始嘅方法玩: 買袋鼠補藤正, 大勝.

之後嘅香港賽事我己經唔係好關心, 睇完電視直播車神戰勝死敵之後, 我就全副武裝出發去我香港朋友酒店同佢滙合, 心情極度興奮.