你估馬仔鍾意聽邊個香港歌星嘅歌?

話說禮拜日大賽日跑夜馬, 瞓到成十點幾至起身.  馬會架車成兩點幾至出發去馬場, 獅城又冇乜野做, 都費事出街, 諗住落去酒店個傳媒中心度做野八卦吹水同偷野食, 慳番一餐之餘仲可以睇下有冇香港行家係度.

落到傳媒中心度, D電腦比人覇晒, 我唯有同獅城馬會代表係度吹下水.  原來果邊馬會都唔知我係香港人, 咁又係, 我代表嘅傳媒又唔係香港機構, 唔怪得佢地.  今年雖然有一隻香港馬碌竹, 但係完全冇香港傳媒跟隻馬黎, 佢地好鬼失望.  我同佢地講, 而家多左一個亞洲一哩錦標巡迴賽, 攪到D香港馬好鬼鍾意去跑東洋果場六月大賽, 你地呢場同佢地果場咁近, 個乜鬼世界巡迴賽又食左蕉, 隻碌竹又唔似亞大B咁人氣, D傳媒當然留番下個月至飛啦.  獅城馬會好鬼羨慕香港有隻大B, 我諗佢地己經冇晒計點樣去宣傳賽馬, 唯有希望下一隻奧蘇利雲快D出現.

傾左一陣, Kenny仔同幾個東洋傳媒入左黎, 即刻同佢同佢D朋友仔打個招呼, 順便講下小宇宙嘅機會.  突然幾個歐洲鬼用完電腦加入戰團, 成個傳媒中心十幾條友一齊係度討論呢場馬.  班東洋記者當然係小宇宙嘅擁躉, 估唔到連幾個歐洲鬼都係最鍾意小宇宙.  佢地都係揸住場年尾大獎賽黎講: 小宇宙輸比隻東洋馬王大震蛋三個馬位, 佢跑得番呢個form係呢度應該可以橫掃.  Kenny仔問我嘅睇法, 我梗係死都話小宇宙好野啦, 佢地咁多人對我一條友, 未比人甲乙過咩.  歐洲鬼突然問點解我D鬼話咁流利嘅?  Kenny仔至同佢地講我嘅身份.  妖, 原來真係全場都當左我係東洋人.  歐洲鬼果時至講: 喂, 其實小宇宙之外我覺得有機會嘅就係碌竹, 你點睇?  我話: 如果我係一個普羅馬迷, 我會好鍾意呢隻馬, 碌竹無論大賽小賽幾衰嘅檔位, 佢點都跑得好比你睇; 但係如果你係一個賭仔, 你千祈唔好賭碌竹贏, 碌竹無論大賽小賽都好, 佢一定唔會衝出黎贏比你睇.  我冇估錯嘅話, 碌竹呢場又會跑一個好靚嘅第三第四返黎.  幾隻歐洲鬼即刻同我friend過打band.

同班友仔只係吹水, 我當然唔會將真心話講晒出黎.  碌竹會跑第三第四係一個感覺, 情意結上我梗係想佢跑得好啦, 佢係舊老細紳士度果陣時我己經好鍾意佢, 今次佢新老細嘉士伯亦都己經做足晒功夫.  其實係可以賭佢win, 但係一定要佢有賠率.  呢樣野我估有可能: 我估大熱會係油王隻亞星, 次熱會係小宇宙, 兩隻馬都係有問題嘅.  亞星根本就係一隻輸梗嘅馬; 佢大熱有兩大因素: 一, 佢上年係歐洲跑得好; 二, 油王.  但係佢冬季賣左比油王之後, 係沙漠跑兩次都係跑到一株菜咁.  唔單止輸, 仲要輸十九幾個馬位, 搶口搶到暈左, 入直路一比油係一滴都冇嘅.  油王手馬, 今季除左隻沙漠盃冠軍之外係全線冇野睇, 呢隻佢都打定輸數, 唔係點會派亞星黎跑呢D佢地眼中睇唔起嘅盃仔喎.  呢個亦都係點解我同老板講呢場馬我好有信心嘅原因.

小宇宙係一隻好有potential嘅馬, 佢跑番上年年尾個form當然係呢度贏得.  問題係: 小宇宙係一隻好唔穏定, 情緒有問題嘅馬, 跑完一場好之後第二場係可以走晒樣, 賭仔係好怕呢D馬嘅.  應付嘅方法只有一個: 有賠率至買.  或者你有辦法買走地嘅話就買佢: 你見佢跑到一半settle得好好就買佢, 佢一overrace就係咁lay佢囉.

我一早就同老友SD講過我隻心水馬係邊隻.  地中海練馬師自從唔玩香港返左去祖家之後, 隻旺財居然比佢攪番掂.  仲記得旺財係沙田初出果時, 我都比佢個款頭吸引左, 呢隻馬拎去選美就贏梗, 同以前老苗果隻你有愧有得揮.  地中海都好想有機會拎一隻馬返黎揚威香港, 不過而家仲未有彈藥贏香港個四月大賽.  旺財真係一隻啱晒跑獅城呢個五月大賽嘅馬: 條跑道啱晒佢發揮, 你比佢控制到步速嘅話佢嘅贏面係好高, 對手又唔會強.  最大嘅concern又係袋鼠國嘅特色: 佢贏得嘅話, D飛亦都會跟住黎埋, 預左架啦.

巴士上面, 成車D東洋記者圍住車上面一個好面善,成日戴住頂帽嘅東洋鄉下佬.  班歐洲鬼都唔知佢係邊個, 全部瞓晒覺.  好彩friend左幾個東洋記者, 佢地講返比我聽: 原來個鄉下佬就係小宇宙個練馬師唔知乜san.  八到兩樣野: 一, 唔知乜san對小宇宙充滿信心, 佢打算叫亞五十嵐騎手放返黎; 二, 預計同場會有五六隻馬都想放頭, 佢地放唔出就會守係二三位.  Hmmmm………

去到馬場, D馬簿少到連記者都要配給, 想拎多兩本比D東洋朋友仔都冇.  個馬會窮到連印馬簿都冇錢, 真係離晒譜.  今日比起琴日多人, 張張枱都有人坐, 搵到一張坐左一半滿嘅枱坐低.  坐係對面嘅四個人琴日未見過: 一個好醜樣嘅女人, 兩個好醜樣嘅男人, 同埋一個靚過香港小姐嘅囡囡.  打招呼派過咭片, 原來佢地四個係越南代表. 個醜樣女人係越南馬會賽馬事務司個助手, 越南啱啱開始攪純種馬, 同袋鼠國買左四十隻純種馬黎跑, 佢黎獅城見識下人地點樣攪賽馬.  兩個男人係越南兩大體育報紙嘅記者黎, 獅城馬會請埋佢地黎睇下野, 幫手宣傳下場大賽.  囡囡同賽馬毫無關係, 不知競賽為何物.  佢以前係越南做過part-time模特兒同拍過廣告同電影, 以前拍野識左其中一個記者, 而家一個女仔走左黎獅城留學讀酒店管理; 個記者叫佢今日黎埋玩下.  識講流利英文, 班歐洲鬼爭住同佢影相.  我同佢地四個交換晒email電話號碼, 把口就話大家記住保持聯絡, 個心就淨係想同其中一個保持聯絡………

馬場最忌女色, 我次次同靚女入場都係輸到瞓街嘅, 集中番情緒先.  用個免費長途電話打左比老板, 講左比佢聽早飛嘅形勢: 大熱亞星, 次熱居然係本地代表山雞, 第三熱係小宇宙, 第四熱仲難估: 居然係沙地代表駱駝.  邊個買駱駝架??  如果開跑時個飛都仲係咁, 我同我老板都會笑晒.  我同老板講: 應該可以照去, 我睇幾場馬跑成點然後打比你做最後決定.  老板話OK, 但係叫我唔好再用人地個電話打比佢, 用自己個電話啦, 費事有麻煩.  佢都講得啱嘅, 雖然我又唔係做唔見得光嘅事.

有個歐洲鬼, 坐埋一邊係度訪問一個死鬼佬, 後來至知佢係隻駱駝個練馬師.  原來有一個坡仔去過中東拜佢為師, 做左佢副手好多年.  而家個坡仔返左黎獅城開倉, 呢場大賽仲出一隻馬同師父一齊跑添.  佢唔講我真係唔知佢做乜帶隻駱駝黎跑.  講真, 佢隻駱駝同肥仔郭隻黑鬼都係冇機會嘅; 但係肥仔郭隻馬起碼係諗住賣過黎; 我曾經以為駱駝練馬師係冇睇報紙網頁, 唔知道冇左世界巡迴賽所以跑呢場………

跑左幾場馬, 每跑一場我個心就沉一沉, 場場馬都係清一色後上馬贏; 琴日唔係咁架喎, 點解條跑道唔係我認識果條嘅? 心裏面有一份好不安嘅感覺.  我好驚係我自己判斷錯誤, 我準備左咁耐嘅一場馬如果最後冇買走左寶我會後悔死, 但係呢份心裏面不安嘅感覺以前都試過有, 經驗同直覺話比我知: 我隻心水馬會輸, 呢場馬唔好賭.  唉, 好痛苦.  我send左個短訊比老板: 有問題, 比多三十分鐘我, 我會send最後決定比你.  老板話: OK, 冇問題.

我走左去搵馬會一個市場部經理, 同佢講左一個美麗的謊言: 我想出去跑道影幾幅相, 想要一件影相佬背心.  佢掉轉頭就比左我; 掂晒.  我著起件背心, 拎住我果部夜晚乜都影唔到嘅傻瓜機, 就自己一個人行出去跑道出面.

我一路由外欄行過去內欄, 懶係一路行一路影相, 其實一路feel緊腳下面塊地.  由外欄開始行, 頭三份一係完全正常嘅草地, 同跑馬地感覺一樣.  三份一開始, 隻腳開始會沉入D泥裏面, 一路行對鞋一路吱吱聲, 水份好多.  過左三份二, 吱吱聲都冇左, 成隻鞋己經入晒泥漿裏面, 幾乎行唔到路.  我行到去二百米牌, 由內欄行番出去外欄, 情況係一樣.  全程冇人理過我, 我自己一個人唔抹乾淨對鞋就行返去記者室出面嘅欄邊, 好失落, 好沮喪.  Send左個短訊比老板: 行過條track, 放頭唔得, 旺財應該會輸, 注碼取消.  老板覆返’OK’ 兩個字比我之後就冇再搵過我; 佢都知道乜野事.

我自己一個人望住個空嘅跑道成十分鐘, 由本來信心一擊變成而家買雞仔注, 好鬼down.  點知過左一陣, 有人後面拍我膊頭, 原來係越南囡囡.  佢見到我出去影相, 返黎自己一個人好唔開心, 以為我影唔到相冇得交差所以好唔開心, 佢就帶埋兩個記者出黎幫我影相等我有得交差.  兩個記者會返去越南email返比我.  個人照, 合照, 乜都影晒, 好開心.  Oh, I love Vietnam………

臨去沙圈前見到個歐洲鬼走去個角落頭度叫醒駱駝個練馬師叫佢去沙圈, 原來佢悶到瞓左覺.  再望一次賠率, 大熱門己經變左做旺財, 袋鼠國D財力真係勁.

落到沙圈, 見到地中海個前香港副手係度幫舊老細招呼馬主朋友, 真係唔話得.  但係所有人嘅焦點都放左落去隻小宇宙度.  隻馬真係好癲, 一行出黎沙圈就不斷係度嘶叫, 我唔知佢係真係好想跑定係做乜, 個個都睇到呆左; 呢隻乜野馬黎架?  一隻佢一隻亞星都係周身濕晒, 淨係睇沙圈都冇乜理由會鍾意呢兩隻, 但係我都仲係覺得小宇宙可能可以跑得好, 最緊要佢可以舒服咁跑.  隻隻都唔似可以贏, 諗諗下覺得可能係碌竹開齋嘅黃金機會添.  反正都係買雞仔注, 一於搏佢爆, 飛左亞星同所有本地馬, 串餐懵係度猛咁畫三重彩同四重彩, 睇下爆D乜.

場馬跑到一半, 見到小宇宙一D搶口嘅情況都冇就知佢贏得.  直路見到碌竹衝上黎挑戰小宇宙, 但係巫師走左入去裏面度衝, 死得.  臨尾有隻本地怪物衝上黎鏟爆晒我D三重彩四重彩.

同我一齊班東洋記者, 個個係沙圈嘅焦慮一掃而空, 騎師舉手振臂歡呼, 幾十個記者衝過去小宇宙代表團果度.  原來馬主自己要做生意冇黎到, 佢屋企人同代表我諗有成三十幾個手機一齊響起, 個個一人拎住幾個手機係咁係度arigato arigato arigato, 其實都幾攪笑.  話晒都係悲願逹成, 我都戥佢高興.  班記者要留夜D係記者室度寫稿寄相返東洋, Kenny仔係freelance writer唔洗留夜, 我同佢上番架車返去酒店.  臨上車前差D唔記得左去收錢.  原來我買左好多小宇宙嘅飛諗住送比東洋朋友做記念, 點知全部都收晒錢, 埋單贏左少少, 又OK喎.

最後上我地車嘅四個人, 兩個係南非黑鬼嘅馬伕, 另外兩個係騎完駱駝嘅馬仔同佢老婆.  原來佢地四個人係勁friend嘅, 全程係度細聲講, 大聲笑.  我就同Kenny仔係度吹水, 講講下佢問我有冇興趣去拉斯維加斯玩, 原來佢係勁爛賭嘅, 每兩個月都會過去果邊一次.  我話果邊我就好少去lu, 你下次諗下黎香港玩, 我帶你過去濠江玩下啦.  佢即刻問我果邊一舖最少要幾錢, 賭幾大可以入貴賓房等等, 似乎佢好有興趣.  得啦, 我地下個月六月大戰見面時再傾過.

突然, 馬仔個手機響, 個手機鈴聲係側田隻好人, 佢仲可以一路拎起個手機一路跟住哼兩句添.  正到爆.