話說星期五晚, 我行出獅城機場, 見到有條友攞住個白板上面寫住我個名.  好野, 有免費車坐, 仲係Benz黎添.  我唔係貪坐靚車, 查實就算冇車接我, 老板都會出錢比我飛的去酒店, 不過話晒係獅城馬會出車同酒店, 接呼點都會好D.  架車好靚, 但係我完全唔關心, 我個心淨係掛住個天: 全程一滴雨都冇.  同個司機八卦左一陣, 知道成個禮拜獅城都係落狗屎.  我個心諗: 就算黎緊兩日冇雨落, 個地應該唔會好得去邊.

仲記得早兩個禮拜係馬場比SD寸: 亞藍生, 聽講你又話上年之後唔會再去獅城跑馬喎, 做乜今年又去呀?  妖, 真係樣衰.  唉, 有D張國榮feel添, 話過唔唱但係又死死氣唱番.  除左簡尼贏馬果年我狂勝之外, 我次次去獅城都係輸錢返黎; 呢度係我既傷心地.  之不過, 早兩個月前檔主問我想點果陣時, 我諗都唔洗諗就話我想再黎; 我同檔主講: 唔係吹水, 我今年好有信心, 我係呢邊會勁有用, 你信我啦.  好野, 有一個香港賽馬日可以休息, 雖然我知道其實我係獅城都會一樣賭香港馬既.

我地檔係唯一一檔有晒獅城咁多場馬賭既檔, 個個都知.  講就係咁講, 咁耐以黎, 街外人有幾多條友幫襯我地賭獅城馬, 真係十隻手指可以數得晒.  我地係有獅城馬既database, 亦都有我同我老豆叫做負責呢邊既野, 但係心照啦, 呢邊既馬仔有冇得大攪大家都知.  我同我老豆負責四個國家, 查實淨係係度玩緊香港馬, 同埋積極睇緊可唔可以玩到東洋馬.  獅城同濠江真係你玩埋我份.  檔主個心就好想攪埋呢邊, 但係有D野真係唔急得黎.  套戥係一個問題: 全世界得我地玩, 根本D風險係冇得走, 得自己同自己賭, 做得好係有錢贏, 但係辛苦過香港好多, 仲要同呢邊馬會打工, 抽水咁鬼高, 點玩呀?  仲未計呢邊D古靈精怪野喎.  如果有一日檔主要我長期玩獅城馬就叉街囉.  好彩, 呢樣野應該有排都唔會發生.

去到酒店已經係九點幾, 其實早成個禮拜馬會已經叫我今晚去食晚飯, 好彩餐飯八點鐘食, 真係好, 大條道理唔洗去, 我最討厭食呢D應酬飯.  馬會對我都算好好, 但係可能佢地唔知我係天生畏高既, 比左間係五十五樓既房比我, 我完全唔敢行出去露台.  睇晒獅城馬會準備比我既資料, 冇乜特別.  第二日會入場睇獅城既一級賽獅城盃, 但係完全冇諗過會大賭呢場馬, 檔主今晚又唔洗我做野, 決定自己一個人走出去玩.

獅城近年積極發展旅遊業, 基本上佢地面對既問題同香港係一樣.  但係對我黎講獅城比起香港悶好Q多, 冇計, 政府死都要積極干預每一樣野就一定會係咁, 點會好似香港咁過癮.  不過佢地近年都知死, 好多野都會漸漸地開放, 我果晚就一條友走左去癲馬睇show.  Crazy Horse係歐洲都算好出名, 係呢度跳舞既女仔係professional dancer, 唔係賣弄色情.  坡紙八十五蚊包一杯野飲, 個門口就好鬼靚, 好似去睇phantom咁, 我仲問門口條友我會唔會太過casual添.  我睇子夜場, 入面比我想像中細好多, 我果場得三十個人睇都冇.  至於好唔好睇, 我會咁樣答你: 你如果係同屋企人用遊客身份黎睇風土人情, 咁我覺得個show係OK既, 但係你如果想睇精彩既topless show我就覺得好悶.  唔係因為冇第三第四點睇, 但係我覺得我成個show都係度睇好多激光同視覺效果.  靚就係幾靚, 但係你係一個topless show, 你就應該係sex呢個主題上面玩, 係唔露下面既情況下刺激觀眾既腦海, 等佢睇唔到sex但係有sex既興奮感覺.  成個show好高竇, 高到我覺得佢地露唔露點其實個效果會係差唔多.  咁我做乜唔係屋企睇冰火台喎?  都係得兩點睇啫.  都叫做睇過, 但係我應該唔會再返黎, 下次死都行多兩分鐘去河邊間Hooters坐係bar枱飲野.  雖然一點都冇得睇但係平好多而我又會睇得過癮, 起碼我知我黎左呢度係為左睇乜.

禮拜六係跑日馬, 馬會有專車接送去馬場, 唔洗搭地鐵.  出發前落左去酒店個傳媒中心度用電腦, 成個房都係東洋黎既記者, 仲有幾件歐洲鬼, 香港人一個都冇, 唔通佢地今晚跑完馬先飛過黎?  Send左一個message比老豆同檔主: 今日唔好亂黎, 千祈唔好做野, 呢邊冇人會隔晚落飛, 同埋我要睇睇個地, 睇左之後會有把握好多.  係車上面同幾個東洋記者friend左, 同佢地傾下東洋馬既野, 佢地死都唔信我係香港人, 連幾個歐洲鬼都當左我係東洋黎既記者.

去到馬場, 第一件事要決定基地係邊度.  我先上去馬主廂房, 環境都OK, 好過舊年, 起碼D馬主會有自己張枱.  同幾個老朋友打招呼, 佢地都叫我同佢地一齊係度玩, 死都唔好應承佢住: 佢地主要玩獅城賽事, 我就主要玩香港賽事同睇D獅城賽事跑成點, 電視機對我黎講係好緊要, 但係我驚係呢度玩我會同佢地爭電視機.  同D老友話要做野, 陣間再返黎.

馬主廂房係三樓, 傳媒廂房就係地下果層.  成個房十幾張大枱, 仲有好多張冇人坐, 房兩邊差唔多二十部電視, 一半播香港馬一半播獅城馬, 仲有免費長途電話, 電腦同食野飲野, 唔洗諗lu.  老板唔洗我玩香港馬, 但係我都諗住幫自己玩.  最key係我可以揀係香港買定係係獅城買, 雖然唔係有好多現金在身但係都要試下咁樣玩, 可能可以第日咁樣幫老豆玩馬呢.

獅城同香港加埋成十九幾場馬, 邊度玩得晒啊.  房裏邊D友個個係度刨獅城頭場, 我就係度睇沙田沙圈.  睇住隻旺到嘔劏左隻大熱門, 香港成五十一倍, 呢邊一睇, 得十四倍, 唔係掛?  係呢邊買中左真係激死.  驚魂稍定, 諗到呢樣野其實係可以好好地利用既, 決定耐心等候出撃既機會來臨.

等到第四場, 見到隻超級處女馬豉油鳥係呢邊3.8倍大熱門, 香港有成12倍喎, 仲唔係出手既黃金機會? 買左成村馬一齊打隻處女, 橫睇掂睇點都冇理由唔中.  點知跑到入直路, 我條村一齊圍住處女都冇人衝上黎, 得隻蝦仔同處女單打獨鬥, 我嗌到班東洋記者都幫我一齊同蝦仔打氣, 蝦仔影贏左果時佢地上黎恭喜我, 好似我係馬主咁.  嘩, 大佬, 真係嚇餐死, 冷靜番坐低諗清楚, 隻處女連呢鋪都可以跑到咁, 等到季尾兩個場都breakdown果陣時, D放頭馬會越黎越有利, 隻處女到時應該唔會再係處女lu.  用同樣既技巧之後中多幾場, 但係要大規模咁用呢個技術去搵食似乎有一定既難度.  個彩池始終都係唔夠大.

睇左大半日, 有個東洋黎既freelance writer叫Kenny仔, 連佢都發覺到D獅城馬玩唔過, 佢見我玩得咁開心就同我一齊係度玩香港馬.  佢一日到黑都係咁問我呢場亞逹哥騎邊隻, 亞馬仔又騎邊隻.  跑到第七場, 我都忍唔住出招醒下佢: 嗱, 今日亞逹哥冇野睇, 你諗下法寶果隻啦, 呢隻有野黎得果五六分在手但係對手咁鬼弱, 仲唔趁馬fit砌多一場咩.  我地一齊慶祝有野黎既勝利; 我地兩隻野既好感度提高左唔少.  我同佢己經約好下個月係佢祖家再玩過, 佢話到時有香港馬既料記住單聲.

獅城第九場係獅城短途三冠系列第三關, 獅城兩大新興短途勢力Why Be同Arenti既大對決.  兩隻短途新貴黎自獅城既兩大袋鼠勢力; Laurie Laxon既Why Be係三歲Success Express仔, 跑左十一場九勝(包括短途三冠系列頭兩關)兩個第二, 開飛被捧成1.2倍大熱門.  另一前領練馬師John Meagher有隻Arenti, 四歲O’Reilly仔.  七戰六勝一個第二, 唯一一場敗仗就係輸比Why Be.  一開飛有成八倍, 唔知係咪D人驚佢排大外檔.  獅城D馬仔我根本都唔識, 從來都冇諗過會大賭, 見係當地一級賽點都要買番一D.  我淨係用行沙圈果兩分鐘去刨form, 去到沙圈時己經好肯定係呢兩隻馬是但一隻贏, D舊馬係完全冇機會既.

去到沙圈, 因為係大賽, D馬有多D時間上鞍, 都未有馬出黎; 架大電視係度播番Why Be同Arenti D舊片, 兩隻都係子彈馬, 贏果D賽事一定係一放絶塵, 帶頭入直路一比油後面就冇得追.  跑短途就梗係放頭好啦; 但係老老實實如果放唔出會點呢?  諗到呢度點都唔會唔記得上年跑呢場馬既九五之尊.

行沙圈其實兩隻馬都靚, 見到成村馬主圍住John Meagher, 果時至留意到原來場馬有十隻馬跑, 有成五隻都係John Meagher既; 連埋Why Be隻廐侶, 兩大勢力以外既馬只係得三隻.  忽然見到一個熟口熟面既騎師同John Meagher企埋一齊: 嘩, 己經好耐冇見過金屎忽lu.  佢騎上去隻Arenti時我急忙搵聽日本馬簿睇一睇.  金屎忽聽日場大賽根本冇馬騎.  突然之間明白晒John Meagher點解要出幾隻毫無機會既馬出黎跑.  原來Arenti個大外檔係一個優點而唔係一個缺點黎………如果唔好比我估中Why Be真係放唔出既話.

應該點賭法己經呼之欲出: 反正都唔識, 一係唔賭, 要賭就賭Arenti win.  我從來冇對金屎忽反感; 佢D衰野其他騎師都大把, 只係我飛過黎獅城之前冇諗過會賭佢啫.  金先生你要坐穏呀.

場馬跑到去轉彎見到隻Why Be唔隊留番係隻Lim’s 叉叉後面第四位時我己經笑晒; 講真隻Arenti真係好有限公司, 金屎忽出盡九牛二虎之力至逼到佢出頭, 仲要裏面隻二打六Always Fast狂衝上黎, 叫做頂住贏一個頭.  十隻馬跑居然有九隻係頭馬三個半馬位內過終點, 基哥係度講馬既話佢實會話: “呢場馬既水準……真係……騎騎騎騎騎騎騎騎騎騎騎騎…….”

聽日場大賽是禍是福都仲未知, 但係獅城盃連續兩年對我黎講都係good result.  返酒店途中不斷係度諗大賽日會唔會同上年一樣咁樣慘死法.