２００５年９月3日於留言版連載

Cxwong係前言度咁樣寫:

pp. 9 因為一個由原居民在日本杯跑第二而起的種種機遇, 我找到了一份以賽馬投資為正職的工作…… 有冇攪錯? 點會咁寫架? 睇怕得我明Cxwong點解咁樣寫. 計得精彩我最鍾意既地方已經講過, 其他大大小小既鍾意地方唔逐個講lu. 唔鍾意既地方唔係冇, 但係嚴格黎講唔應該叫做我唔鍾意既地方, 而係我會用唔同既手法去處理既地方. 亦即係話: 比我寫呢本書既話, 我唔會咁樣寫.

pp. 17 為甚麼投注賽馬可以長線贏錢呢? 因為馬匹的賠率不是由馬匹的機會率決定的. 那麼, 就可能買到”抵買”的機會了. 我寫書既話我會咁寫:
為甚麼投注賽馬可以長線贏錢呢? 因為賽馬以至所有既賭博遊戲都係充斥住好多勁懶同埋全無discipline既人. 鍾意賭馬既人, 唔多唔少都係有些少懶性, 鍾意不勞而獲. 成個賽馬遊戲, 其實係一個賭仔之間既遊戲, 如果你能夠係咁多個懶人之中, 稍為勤力一D, 你就可以打敗大部份既對手, 增加自己既贏面. 事實上, 所有係呢個遊戲有出色表現既人, 如果你細心留意佢地做野既方法, 你會發覺呢D人全部都係勁勤力, 勁有discipline同埋唔會周圍去搵藉口既人黎.

如果有一日我有機會教Horseracing101賽馬投注入門, 我第一堂就係會教呢一樣野. 而我呢一堂既功課就會係: 由今日開始, 你要係自己部電腦度開一張excel sheet, 你由今日開始你要將你買既每一注飛記錄低. 如果呢樣野你做唔到既話, 你冇資格繼續讀落去, 因為你根本唔會有機會係呢個遊戲度贏到錢; 而我亦完全唔識有任何人可以唔做呢一樣野但係可以長期贏到錢. 唔好以為呢樣野好簡單. 我講過: 我估每十個人裏面做到呢樣野既人應該一個都唔夠. 做到呢樣野既人已經打敗左超過九成既對手.

pp. 262-270講海外賽事, 我覺得呢一部份Cxwong應該比我寫. 賭海外賽事有無限既機會, 由各國賽事既特色, 海外莊家既運作, 點樣搵出邊度有最佳既賠率, Eachway點樣去運用等等, 我睇係計得精彩2裏面Cxwong點都要留番幾頁紙比我發揮一下.

pp. 40 除非馬匹在短時間內大幅度外閃或內閃, 否則實在不宜為此作出調整. 若要調整, 則可用上述的畢氏定理簡單地計算實際跑了的距離. 畢氏定理當然係完全正確; 但係一隻馬內閃或者外閃我一定作出調整. 如果一隻馬向外斜跑走六疊係全心有意咁向住外面果一點斜走過去既話, 我可以唔作出調整. 但係我睇超過九成既斜走都係面向正前而隻馬向斜走, 我要調整唔係因為佢走多左路, 而係調整佢因為面向正前但係向斜走所失去既momentum. 如果我要你面向前, 但係向斜既一方面跑過去既話; 你一定跑得慢過你全心全意向斜果一點跑過去. 我諗深一層, 其實呢一點可以illustrate到我同Cxwong之間既分別.

Cxwong係一個聰明人, 佢如果比心機讀Arts班既話佢都會讀得好, 但係佢係一個讀Science既人, 而佢亦都以自己係一個計數人而驕傲. 我中學都係讀Science, 而我亦都應付到大部份既Science subject, 但係我而家知道我其實係鍾意讀Arts多好多, 我讀文學或者文化方面既野我會讀得好好.

如果我一定要做Cxwong做果一樣野, 我可能可以做得好. 但係我好驚我掛住計數而失去左我對賽事同馬匹既觸覺同判斷. 如果我將好多data放左落去好多方程式而得出黎既結果我係冇辦法接受同解釋到既話, 我會好苦惱. 諗到呢度, 我突然有一個諗頭.

如果我同Cxwong拍擋一齊賭馬既話, 可能我地會係一個勁強既組合. 有Cxwong現有既野, 加上我係個industry既網絡, 對海外賽事既認識, 搵出最理想既賠率邊度有, 加埋我既marketing skills……我地呢一個組合可能仲強過勝負師傳說裏面既哲也加土佐健. 有一段好長既時間我都係咁樣諗. 有一晚, 我發夢夢見我同Cxwong組成左呢一個夢幻組合, 一齊係度賭馬.

Cxwong: 第一場, 主力7同9號, 補番6同12, 2同3 號輸一半; 你點睇?

我: 呢場馬9 號贏叉梗, 全部買晒9 號, 乜都唔洗補.

Cxwong: 你傻L左呀? Kelly叫買6, 7, 12呀! 咁鬼抵買你都唔L買?

我: 唔會贏既馬我比一萬倍你都冇用啦! 9號贏叉梗架! 而家係Kelly傻左定係你傻左呀?

Cxwong: 你明知冇馬係贏梗既, 如果9號冇位上比另外果幾隻偷左係咪你賠先??? 等左好耐至搵到咁抵買既野, 點可以唔買呀???

我: 如果我地贏少左係因為你買埋D輸叉梗既野係咪你賠先??? 等左好耐至等到9號對D咁既對手, 你而家叫我補埋D輸叉梗既馬???

Cxwong: 你低能既!!!!!! 如果investor問點解呢幾隻馬咁都補唔到既話你同investor解釋!!!!!! 我用我個account跟Kelly買, 你唔好郁我個account!!!!!!

我: 你白癡既!!!!!! 如果investor問點解買埋呢D輸叉梗既馬你同investor解釋!!!!!! 我用我個account訓落去9號度, 你唔好郁我個account!!!!!! 醒左. 如果個夢繼續發落去既話我諗我會夢見Cxwong同我係個office度打大交, 雙方水火不容, 勢不兩立. 情況就好似......好歌劇大戰森林寶穴 (2).

唔得唔得唔得. 兩隻馬其實旗鼓相當, 勝負既分野其實係係個騎師度. 應該咁講:

情況就好似......和田龍二大戰柏兆雷 (3).

唔得唔得唔得. 呢兩個又相差得太遠, 對Cxwong好唔公平. 點好呢? 試下咁:

情況就好似......周麗淇大戰屎塔肥 (4).

周麗淇同屎塔肥都係暑假推出個人大碟, Cxwong出左本計得精彩, 而我亦都用左七七四十九日練好武林秘笈裏面既武功, 準備好迎接新一個馬季既來臨. 唔單止Cxwong有新攪作, 身邊有兩個朋友都同我講話新一季會同自己身邊既朋友仔一齊攪一個賽馬基金黎賭馬, 希望可以磨練一下自己玩馬既技術; 另一個朋友仔就話由今季開始做自己既投注記錄, 希望可以同我每一個月飲一次野, 睇番自己投注方面點樣可以做得更加好. 聽到佢地咁講, 心裏面果份喜悅都唔知點樣去形容. 喜悅係因為: 只要佢地比D心機, 唔好懶同唔好輕易放棄既話, 佢地肯定會進步得好快, 佢地會好慶幸佢地今日所作出既決定.

新馬季, 新景象. 祝大家新一季贏多D, 不過贏其他人好0勒, 唔好贏我喎.

2 分別是cxwong和我很喜歡的日本馬

3 分別是之前兩匹馬在日本杯的騎師

4 Niki 和 Stephy 分別是cxwong和我很喜歡的女明星