２００５年９月3日於留言版連載

今次趕稿趕到暈左; 忙碌唔係一個藉口. 事實上, 呢一篇真係修改左好Q多次. 改咁多次係因為一個原因: 過關係一個好敏感既題材. 身邊好多好朋友玩馬同玩波既時候都好鍾意過幾關, 我冇理由係呢度寫話鍾意過關既人正笨實. 但係......

pp. 92......過關是最笨的彩池, 職業集團是不會把錢投注過關的. 要講過關就先要講一樣野: 水位. 呢度講緊既係抽水既水位, 英文通常就咁叫做tax. 水位既定義個個都明, 但係唔係個個都會明白水位既奧妙之處. 教識我水位既奧妙既人係我做investment banking時我既師父. 我雖然冇係果一行繼續玩落去, 但係師父教我既野我仲記得好清楚. 我師父來頭一D都唔細, 佢當年曾經同管理過量子基金既國際大鱷共事過; 師父寫既書到而家係Page One都仲有得賣.

有一次, 有個好鍾意玩外?既客同我地坐低傾佢個portfolio. 個客係一個好聰明既生意人, 亦都放左好多時間同心機落去個遊戲度, 但係佢玩完一排之後都仲係輸. 我睇晒個客既投注記錄, 做好晒D分析, highlight晒個客做得0岩同做得唔0岩既地方, 個客都好滿意我份功課. 最後師父至行入黎, 我以為佢入黎只係同個客打個招呼. 點知師父坐低, 睇下我個分析, 一臉不悅既神情, 我都知道大鑊.

師父同個客講: 我知你好比心機去玩呢個遊戲, 而我個靚仔亦都比左個好全面既分析比你, 但係呢個其實唔係你輸既原因.

師父指住一個個客輸左錢既trade繼續講: 你而家睇番轉頭, 你會以為你係呢度賣出而唔買入既話, 你就會反敗為勝. 其實無論你買入定係賣出, 你都會輸. 你已經輸左比水位.

我同個客都呆左, 唔知佢講緊乜.

師父: 你實在玩得太開心lu, 日日都想贏, 日日都去做買賣, 因為你好想贏. 你日日都做咁多買賣, 抽水都已經抽死你, 你想overcome個水位, 就去做一D唔係最理性既決定, 因為你想去追番你失去既野. 嚴格黎講, 你無論買邊一邊你都係會輸. 你本身既trading skill其實唔差, 但係你要學識點樣去打敗水位. 要諗辦法去打敗水位, 先決條件就係你要減少買賣既次數, 呢個係唯一一個減少抽水既方法. 你能夠耐心等待機會來臨既時候至出擊, 加上你本身既技術, 你起碼比左一個機會自己去打敗水位. 但係水位太高既話, 你一定會浸死, 你冇比自己一個贏既機會. 你而家只係保證自己日日都會贏一D野, 但係亦都保證自己拉勻一定輸.

個客番屋企睇番自己既投注記錄, 第二日打電話比我師父同佢講左三個字: You are right. 而家睇番轉頭, 師父講既說話簡直係神之話. 好簡單但係亦都好正確. 一矢中的.

我用車仔對紅軍再講一次水位之終極奧義.

茂利先生對水位既敏感程度近乎零. 佢買佢睇會贏果隊波, 無論係1.35, 1.55 或者係1.75 佢都係買咁多, 因為茂利先生覺得: 佢買中會贏果隊波佢就會贏, 賠率係幾多唔重要. 茂利先生今日買車仔, 所以佢既對手係紅軍. 茂利先生會盡全力咒死紅軍佢. 茂利先生用車仔做重心買過關, 實行串餐懵.

結果: 車仔順利勝出. 茂利先生中到一條過六關, 十蚊一注收五千. 仲有一條過八關差兩關過唔到, 如果中多一關又會收多一皮, 過晒八關就發?囉. 茂利先生通街打電話比人同人講自己D戰績, 以為自己係波神.

水位之終極奧義話: 茂利先生既對手唔係紅軍, 又唔係車仔. 由頭到尾茂利先生既對手只係得一個: 水位. 由於茂利先生既買法, 無論邊隊波贏茂利先生都已經輸左. 茂利先生人如其名, 收五千仲周圍唱通街. 水位之終極奧義話: 茂利先生應該死都唔好同人講自己中左五千銀, 因為佢果注過關, 保守估計應該收番七八千銀; 如果佢買得精一D既話應該輕易收過萬. 點解而家收少左咁多? 你話呢? 水位之終極奧義話: 買得過八關, 要過晒八關其實同一關都唔中一樣咁難. 茂利先生買八關中六關其實係自然不過既事, 因為茂利先生買既係一D得兩至三個outcome既野. 茂利先生狂小攪到佢過唔到關果一兩隊波, 連續幾個禮拜有同樣既遭遇就認為係自己黑. 查實有茂利先生同樣遭遇既人周街都係, 唔通周街都係黑人咩?

水位之終極奧義話: 茂利先生不斷用唔同既方法去研究邊隊波會贏, 其實係多餘既, 因為茂利先生睇唔通自己既對手由頭到尾只係得一個. 茂利先生唔認清自己真正既對手既話, 佢同街市魚檔個魚缸裏面D魚一樣, 點樣掙扎都係死路一條.

如果茂利先生要打敗水位, 佢應該乜都唔好買, 淨係全部買晒車仔贏, 但係買大一百倍, 一千倍, 或者一萬倍. 冇錯, 車仔輸波佢就會輸到貼晒地, 但係咁樣做佢比人抽水會抽得最少, 亦都比到自己一個贏既機會. 但係茂利先生唔會咁樣做, 因為佢知道自己唔係波神, 佢完全唔知車仔會贏定係紅軍會贏, 所以佢唔會夠膽賭大; 佢只係夠膽買十蚊飛.

前一排, 一班朋友一齊食晚飯, 同檯有人問Cxwong點解唔好買過關, Cxwong答佢: 你買左過關, 你完全冇能力去改變過左關之後既注碼分佈情況; 如果臨場形勢有變, 你就唔可能作出相應既改變.

我絕對同意Cxwong既答案; 我想作出一D補充. 過關最大既問題係: 你每過一關你都會比人抽一次水, 越過得多關就越抽得多., 所以你既effective tax rate係比起正常既水位高出好多.

其實賽馬真係一個一D都唔容易既遊戲黎; 我平時玩馬時都已經覺得抽水好多, 個水位感覺上好似高到去到我條頸咁高, 要戰勝水位真係好Q難. 但係我完全覺得玩過關既人唔係面對緊一個浸到上條頸既水位; 佢地係面對緊印尼大海嘯.

如果茂利先生依然覺得自己可以戰勝印尼大海嘯既話, 我只可以講祝佢好運. 我只係一個平凡既人; 茂利先生要去死既話我又有乜野可以做到呢? 唯一可以做既係: 走返去搵番茂利先生, 同佢講: 茂利先生, 你可唔可以買落我果度呀? 求下你啦...... 幫下我啦......

如果你睇到呢度, 你同我一樣都認同戰勝水位既重要性既話, 咁係咪即係話: 所有有抽水既遊戲都係玩唔過呢? 答案係否定既.

pp. 17 理論上, 所有賭場內的遊戲都”不抵買”...... 因為莊家都已經計算過機會率, 並且已訂出一個不抵買的賠率.

我話: 賭場裏面, 總共得四個遊戲係賭仔可以用適當既策略去同賭場作長期戰爭而有機會贏錢既; 其他既遊戲, 你短時間內贏到錢係你好彩, 長時間要贏到錢係冇可能. 果四個遊戲係: 廿一點Blackjack, 撲克Poker, 撲克老虎機Poker machine, 同埋sports betting(包括波同埋馬). 呢四個遊戲都有水位, 但係都係可以贏到錢既...... 如果你識玩既話.

當然, 凡事都有例外. 如果你有一D超人一等既策略既話, 可能你可以係其他遊戲度長期贏到錢. 我最記得我好幾年前睇過賭仔權威雜誌Casino Player裏面講有一對兄弟, 係世界各地贏輪盤贏到D賭場束手無策. 佢地係雜誌透露左佢地贏輪盤既方法: 佢地用左幾年時間研究輪盤既構造, 其中一個兄弟自己走埋去學點樣去做一個賭場用既輪盤, 發覺根本世界上冇一個輪盤係完全平衡既. 所以係一個大約固定既發球位置同力度之下, 任何一個輪盤都係唔公平既. 有一D號碼開出黎既機會係會大過另外一D.

我唔係謙虛, 但係好老實講我唔覺得我玩馬好叻; 我而家用緊既野都係有前人用左好耐, 我只係係度抄佢地做緊乜. 不過起碼我係抄緊一D贏錢既人做緊既野, 比我既信心度都會高一D. 無論你玩乜野都好, 千祈唔好抄報紙佬寫既野; 佢贏既話佢就唔會寫緊報紙. 你搵到一個贏錢既人肯寫報紙既話我話你叻.

所以, 假設你想賭波贏錢既話, 你就應該用盡你搵到既所有方法去睇下賭波贏錢既人點樣去賭波. 賭足球長期贏錢既人我仲未認識, 賭American sports贏錢既人我就見過. 有條友叫亞Joe住係拉斯維加斯, 佢賭波賭到而家係幾間賭場既波盤顧問. American Sports通常都係賭line, 就好似上下盤咁, 例如一場NBA波, 一隊讓第二隊6.5分, 總之得兩個outcome, 永冇打和. 亞Joe可以set條line係兩邊既人係五十五十, 亦即係話, 一個普通人買亞Joe既盤贏輸既機會係五十五十, 你唔係勁knowledgable既話你就係輸比水位.

亞Joe得盤既話, 佢當然明白有一邊係著數一D. 你又估下亞Joe自己賭line咁多年既成績係點? 你估佢贏面係90%? 80%? 定係70%? 全錯. 亞Joe全職做咁多功課, 睇咁多帶, 佢既贏面係58%. 每一百場波裏面, 亞Joe只係比普通人贏多八場波. 但係呢八場波就係一個professional同一個普通賭仔既分別. 呢八場波就可以幫亞Joe打敗水位(果邊賭波中間抽水1.5至2.5%不等). 其實, 一年中有好多場波亞Joe買既野同一個低能仔買既野係冇分別既. 我諗大部份人都唔會相信強如亞Joe咁既人贏面都只係得58%.

或者, 有好多人會以為賭波要贏面有58%唔係好難. 又或者, 有好多人以為自己賭line贏面有58%甚至更加多. 但係, 其實呢D人連基本條件都冇, 因為佢地根本冇自己既投注記錄. 我識得既人當中, 有自己既投注記錄既人, 每十個人裏面應該唔夠一個.

呢樣都唔緊要. 最緊要既係: 我諗當呢D人知道同了解左亞Joe每日要做D乜野至做到贏面有58%既話, 我諗佢地會揀做茂利先生而唔做亞Joe.

我以前一講到呢D野, 我身邊就會有一個朋友走過黎同我講: 喂, 唔洗咁激呀嘛. 冇左茂利先生, 你估個遊戲會易玩左咩? 其實你係咪應該多謝佢地呢?

我呢個朋友講得0岩. 我愛過關. 我最鍾意喜歡過關既人; 錫晒你.

查實我呢個朋友係書展買計得精彩番去睇時, 佢都唔知我原來係識得Cxwong既. 佢都可以話係半個圈內人, 對賽馬投注都有D研究. 我問佢對本書既感覺, 佢居然同我講: 冇乜. 佢咁樣講我諗番轉頭其實唔應該覺得意外. 其實我呢個朋友係賽馬投注方面既功力有幾多我心知肚明, 基本既投注概念佢可以做我師父, 但係我知道佢有咁既意見係因為佢唔會同意計得精彩裏面講過既幾樣野.

pp. 77 但筆者研究所得負磅的影響實際上沒有這麼大. 1000米的情況, 馬匹負磅重十磅才會慢一馬位, 而在長途2000米情況, 則相差七磅才是一馬位...... 整體上負磅的影響均不是這是大.

pp. 82 ……發現了一個頗令人驚訝的結論, 就是馬匹的同程成績, 田草成績, 以及人馬合作成績, 是沒有很大的作用.

我知我朋友唔會同意Cxwong既結論; 佢甚至乎會覺得Cxwong係挑戰緊一D長久以黎既賽馬基本理論. 呢個亦都係我朋友有以上既comment既原因.

結果我返屋企用左幾晚既時間去做一樣野: 我嘗試去估計Cxwong點樣去計到同得出以上既結論. 我絕對唔係挑戰Cxwong; 我同Cxwong咁多年朋友, 我大約都知道Cxwong會點樣去處理呢D課題. 如果你話我挑戰緊Cxwong既理論, 你不如話我挑戰緊我對Cxwong既了解程度仲似D.

我既做法其實唔係好複雜. 其實當馬匹暑期總評分一出街果陣時, 我已經做過一D類似既動作: 我分析每一隻馬新既評分黎估番個評磅員點樣去做暑期評分, 同埋佢想透過暑期評分做到D乜. 情況就好似你折開一部電腦去睇番人地點樣去砌一部電腦一樣.

做左幾晚, 我做左一D野出黎, 我估我諗到點解Cxwong會有呢一D結論. 如果我既估計係正確既話, Cxwong得出呢D結論既計算方法係有問題既. 但係我唔知我既估計0岩唔0岩, 而我更加唔可以話Cxwong計錯數. 亦都因為咁, 我唔會講我呢幾晚做左D乜野出黎; 我要尊重我呢個朋友.

講番我果個半個圈中人朋友. 佢講過一句說話: 我唔信呢條友(指Cxwong)可以用書裏面講既野贏到錢; 佢方向係正確既, 但係仲有好多野可以做得好D. 如果佢而家已經贏緊錢既話, 其實佢係可以贏多好多錢. 我睇佢根本冇老實寫佢套野出黎, 而我亦都唔會信佢係前言講佢寫呢本書既目的.

我話: 計得精彩如果有可以改善既地方既話其實係一件好事; 可能我第日可以睇到朋友仔寫既計得精彩延續篇. Cxwong寫呢本書既目的, 明眼人應該一眼就睇得出, 係呢個point我死都唔會出聲架0勒.