２００５年8月30日於留言版連載

話說書展之前既禮拜六, 係郵箱收到好友Cxwong寄黎既新書. Cxwong係我身邊朋友之中第一個可以正正式式出一本係書展有得賣既書既朋友(唔好意思, 我唔覺得山高係我既身邊朋友). 衷心恭喜Cxwong呢一個成就.

呢篇讀後感難寫, 唔係因為Cxwong係我好朋友, 唔好意思寫D唔好既野. 本書我禮拜六下午已經睇完第一次, 鍾意既地方有好多. Cxwong亦都已經寫左個短訊過黎話唔洗唔好意思, 希望可以多多指教.

正常寫一篇讀後感, 由作者既寫作動機, 意念既鋪排, 文字既運用, 點樣同讀者溝通等等, 我雖然唔係寫野搵食既人, 但係要做呢方面既分析我自問都可以應付到. 但係對我黎講, 要好客觀咁去分析計得精彩係有一定既困難. 原因得一個: 我同Cxwong太好朋友lu. 佢既為人, 思想, 做野既動機我都某程度上了解, 冇計, 識左Cxwong太耐了, 有D野已經唔洗講都明. 就係因為咁, 加埋睇左佢本書個Blog, 我未收到本書都已經係我個腦裏面建立左一個對計得精彩既expectation.

呢篇讀後感已經寫過好幾次, 全部都唔滿意, 唔出得街. 呢度1既兄弟, 大部份都應該有睇本書, 所以唔打算詳細講本書裏面有乜野好野. 我只係想用呢一個空間隨意寫少少自己睇呢本書時既感覺; 或者Cxwong最想我寫既其實就係呢D. 我就將計得精彩上中下篇送比好朋友作為一份小小既禮物.

Cxwong係前言果度咁樣寫:

pp. 10 寫這本書的主要原因, 是我不明白為何香港沒有一本有質素的, 有關賽馬投注的書籍……因此希望寫一本有誠意, 有內容的賽馬書籍, 讓香港人知道賽馬知識的廣博.

我話: 計得精彩係一本教科書, 係一本對賽馬投注入門既教材. 如果香港學校有賽馬投注呢一個科目既話, 計得精彩應該係每一個同學必讀既一本書.

你可以話係Cxwong既職業病; Cxwong寫左一本教科書出黎係我意料中事. 計得精彩有晒一本教科書既元素: 1) 同教科書一樣, 先唔好計本書裏面無可避免既錯別之誤, 計得精彩講既賽馬投注概念係正確既; 2) 同教科書一樣, 計得精彩將Cxwong既理念好有條理同有秩序咁寫出黎, 以最容易既方法比讀者去領悟同理解, 讀者睇完都唔明係讀者既問題; 3) 同教科書一樣, 計得精彩有D悶.

無可避免地, 計得精彩要同馬觀微既馬神秘笈正面作出比試. 材料上, 我會話計得精彩打敗左馬神秘笈. 馬神秘笈第一期最正既一樣野: Kelly’s Criterion, Cxwong成功指出佢既錯誤係邊(pp. 210). 計得精彩亦都冇馬神秘笈果D嚴重吹水野. 但係就算我以前讀書果陣時, 我對住我鍾意果幾科, 我都唔會得閒就拿本教科書出黎睇. 我唔想用腦既時候, 我想拿住去街睇既會係馬神秘笈. 但係, 計得精彩就係每個對賽馬投注認真既人屋企書架上面一定要有既書.

我想講下我覺得計得精彩最正既地方.

我第一個覺得好正既地方係解簽佬選馬法(pp. 84).

我以後會多左一個口頭禪: 呢樣野好鬼解簽佬. 遠至我0岩0岩學跑馬時既闊場窄場, 近至近年公仔箱好鍾意講既壓迫感, 我都覺得好鬼解簽佬.

仲記得上年睇過一次公仔箱講賽後, D馬跑到對面時, 個評馬人講過四隻馬: 第一隻係裏面慳緊位, 第二隻係裏面好大壓迫感; 第三隻係外面走得好順, 第四隻係外面望空用左好多力. 咁即係點呀?

Cxwong同版主唔知仲記唔記得幾年前我地一齊睇跑馬, 個評馬人貼左一隻馬因為隻馬跑fresh特佳. 到隻馬跑到冇晒影之後, 佢就話隻馬”fresh過左籠”, 下次應該會0岩0岩好.

我到而家都唔知道一隻馬點樣至係”fresh過左籠”.

Cxwong 係pp. 18-19講左評馬人講貼士既動機. 問題係: 傳媒既力量真係好驚人; 明明錯既野D評馬人講得多都會攪到好多人會信.

又記得有一個朋友仔問過我: 你場場馬鍾意某一隻馬既原因都唔同, 我都知跑馬係要考慮既野有好多, 但係我點樣可以知道幾時應該考慮D乜野呢?

我果時答佢: 你用下個腦就會知.

而家諗番轉頭, 真係唔係幾好意思, 好似對佢好惡添. 我當時既意思其實係: 你唔好諗到咁複雜, 簡單D諗就得架啦.

如果你問一個完全唔識跑馬既細路仔, 呢一場馬贏果隻馬點解會贏, 我諗佢會答: 因為呢隻馬跑得最快. 如果你再問佢輸果幾隻馬點解會輸, 我諗佢會答: 呢一隻馬走左個大圈, 果一隻馬冇位上, 但係佢地輸既主要原因係: 佢地慢. 但係我睇個細路仔唔會答: 呢一隻馬輸因為佢壓迫感好大.

我睇一場馬, 其實個心態都係好簡單, 好細路仔, 都今時今日都係. 如果有一隻馬, 有一個夠佢過既位比佢衝上黎而佢冇衝到上黎, 係我心目中佢一係跑得慢, 一係就係騎師拉馬. 但係佢唔會因為壓迫感好大而唔肯衝上黎.

係我跑馬初期, 山高係影響我最深既一個人; 冇山高可能唔會有我. 但係好對唔住, 我睇唔到有乜野馬係闊場特佳或者係窄場特佳. 我完全同意有一D馬係快活谷好過沙田, 但係唔係表示佢窄場特佳, 雖然快活谷係窄過沙田. 我更加唔會因為一隻馬係外國一個窄既馬場跑得好跟住就話佢係香港窄D果個場都會跑得好. 事實上, 大部份既馬都係會盡量貼住條內欄黎跑, 如果有一隻馬係跑窄場特佳, 就即係話條外欄好近佢時佢就會跑得快, 條外欄離佢好遠時佢就會跑得慢. 對唔住, 我接受唔到.

關於馬場既特性, 我只係得一個概念: 馬場既特性同隻馬既特性配合既話, 隻馬自然會係果個馬場跑得好. 但係個key係: 你一定要比心機分析個馬場既特性, 究竟適合乜野馬發揮. 舉多一個例: 快活谷同濠江馬場都可以叫做係窄場, 但係兩個馬場對隻馬既要求係完全唔同既. 鬼佬有一個差唔多既概念叫做A Horse for a Course. 如果你唔知乜野叫A Horse for a Course, 你試下搵番好幾年前袋鼠國有一隻馬叫Chief de Beers既賽績你就會明. 香港既馬迷好幸福, 跑黎跑去都係得兩個馬場, 要計其實唔難.

Cxwong係pp. 66寫左同呢一樣野有關既野, 亦都同我自己既理解好吻合: 唔好將馬太過人性化, 馬係好簡單既野黎. 我老細講過一句我好同意既說話: 馬係一種出奇地老實既野黎, 唔老實既係其他野.

pp. 86 我們看選馬因素, 必須客觀, 對每匹馬都有同一個準則. 要大膽找出自己心水馬的缺點, 並勇敢面對.

個評馬人貼一隻馬輸左, 有幾多個會周圍去搵藉口? 又有幾多個會勇敢面對?

我第二個覺得好正既地方係六骰遊戲6 Dice Game(pp. 194).

我第一次見人咁樣去simulate跑馬, 但係真係簡單又易明, 所有賽馬既元素都係晒度, 正. 個遊戲好玩得黎, 佢比到一個好大既insight出黎, 雖然唔知係咪個個都明.

我試過好多次, 個連贏或者三重彩派彩一公佈左之後, 身邊就會有人口痕話條Q或者條T咁熱, 有古怪. 六骰遊戲解釋左: 其實條Q或者T大部份時間都冇問題, 有問題既係個口痕友估個派彩果條方程式.

我睇絕大部份既讀者都唔會睇關於Harville Formula果一部份, 但係個六骰遊戲就應該個個都明. 兩隻冷馬串Q或者三隻冷馬串T係某一D場合其實唔係咁難, 尤其是當有一隻馬嚴重偏熱既場合, 因為佢地一齊跑入黎既先決條件只係得一個: 隻大熱門死. 就等於係個六骰遊戲裏面, 粒二十面骰贏既機會係好大, 但係如果佢一死, 之前一D好似冇乜贏面既野, 例如六面骰搭八面骰既Q, 其實機會係唔差既. 明白呢一樣野既人, 就會自然適當咁下注, 形成果D好似偏熱既派彩.

其實用六骰遊戲講Harville Formula同Benter Correction係好正既野黎, 但係我唔打算再係呢度講落去, 因為Cxwong要面對番一個事實: 講Harville Formula同Benter Correction果幾頁應該冇乜人會睇.

1 指這篇文章發表的私人論壇