２００５年５月２８日於留言版上連載

話說禮拜五, 全世界返齊公司開大會. 檔主同大家講得好清楚, 佢唔係唔滿意而家既position, 而係唔滿意部門與部門之間既溝通同合作性. 聽講開會時每人前面都有兩張紙, 一張係我地盤數(即係我既力作), 一張係我地既position, 兩樣野一睇就知係天同地, 強如我地既檔口冇理由會攪到咁. 我老豆同trading room既兩大舵主差唔多想打交. 好彩我唔係度, 唔好煩我, 我乜都唔知.

Trading Room兩大舵主其實都好猛料, 開大會前已經準備好晒咁多個scenario, 如果檔主想咁咁咁, 佢地就可以點點點去做. 可惜佢地D心機全部都白費晒. 檔主睇完個position, 居然話: 得番一日, 就咁啦, 唔洗補. 兩大舵主同我老豆開完會要留低, 我仲有D野想做, 叫D手足係自己岡位準備好. 老豆叫人打電話比我, 要我隨時on call.

我冇份開會, 所以係on call時問番個Asian trader開會時檔主講過D乜. 外面大B一路係1.3至1.38之間, 我地比街客都係大約係咁, 問題係之前受左好多1.4 至1.8之間, 數額好Q大, 好難走到太多. 檔主同個個講話係而家既街價, Sales可以放心做. 我老豆其實覺得風險大過頭, 提議不如認輸, 來日方長. 點知一講出口, 比檔主小到飛左上天花板. “又係你個仔(即係我)話大B唔值呢個賠率既, 你如果信唔過佢盤數, 你做乜叫我請佢呀?” 既然唔值呢個賠率, 做乜唔受呀? 盤數冇問題, 我地又唔係受唔起, 照去啦.”

我聽到都驚, 萬一檔主話盤數有問題, 我就PK囉.

個形勢其實好簡單, 大B跑出黎我地就好大鑊, 小宇宙就係小鑊. 小宇宙既分析我放左好多心機落去, 有埋片睇(我份功課係有DVD送既), 我知會好impressive. 檔主開會講左一句: 睇下, 對面M記一定冇人睇東洋馬既videoform, 我地有. 我個心裏面YEAH晒.

我份功課係係七日前交既, 基本上D料我好滿意. 場馬呢七日內有一個好大既轉變: 好明顯, 客觀因素係大B贏晒. 馬會幫佢已經幫到出晒面, 全世界有晒意會, 會比大B自己放. 馬會比埋條最利放頭既track比佢跑, 慌死佢唔到, 只係差在未做馬比佢贏. 小宇宙係唯一一隻會同大B係前面博過既馬, 加埋個騎師因素, 我最後都覺得唔洗驚佢, 唔好補太多, 我知檔主同我既睇法係一樣. 大B就唔同, 有隻無形之手幫佢. 七日前我會同個個講: 大B多數會香. 跑之前一日, 我記得我同個個講: 大B多數會贏. 如果大B輸既話, 會係因為佢自己係最尾二百自己停. 但係其他係賽事途中會發生既野都係會對大B有利既.
我知檔主同我係呢方面既睇法唔同. 我諗緊係咪檔主睇到一D我睇唔到既野.

大家對馬女既睇法好一致. 唯一問題係根本冇乜人想買佢. 講到呢度, 我同同事講我有一樣野唔明. 檔主受晒大B同小宇宙, 馬女佢又唔鍾意, 咁係咪即係話檔主勁睇好牛仔?

同事答我: 一半一半. 檔主係講明牛仔要keep safe, 但係仲set左安全線比好多香港馬, 唔准受太多佢地. 我問同事, 其他馬檔主鍾意乜? 佢答話: 檔主最保守果隻係碌竹.

我份功課裏面, 碌竹得果兩句: 馬明顯好番好多, 不過都係唔夠跑. 同事果時至話: 檔主係好鍾意賭紳士D馬既. 原來紳士隻二奶今年年頭去袋鼠國跑果兩場馬, 檔主兩次都係勁賭二奶; 二奶吐氣揚眉果次檔主中到飛天. 檔主講過: 跑親呢D賽事, 一定要防紳士既馬.

我再打開自己份功課睇多 一次, 諗下檔主講既野, 開始睇到同明白檔主既意思. 檔主係上市公司主席, 平時忙到PK, 又唔係香港人, 又唔係係香港做野, 居然對香港馬可以咁有認識, 又要寫多十個服字比佢.

講到呢度, 電話響. 終於開完會, 聽下老豆有乜野講. 點知拿起個電話一聽, 電話傳黎既唔係老豆把聲, 而係檔主把聲. 嚇到我即刻唔敢呼吸.

個電話應該唔係講左好耐, 但係我感覺好似檔主問左我好多野. 佢問左我好多關於六月係東洋果場大戰既野, 我一一答左佢. 問完晒之後, 佢叫我而家即刻將頭先我答佢既野, 試下半個至一個鐘頭之內point form寫好晒email比佢, 佢地而家開會要用, 講完就收左線.

乜都唔諗, 即刻開工. 寫point form就好快, 不過佢有一D問題, 一定要搵帶至答到佢. 我用極速做起晒D野, send左email過去, 睇下隻錶, 用左廿五分鐘. 都OK掛?

終於可以坐低諗下檔主問我D野. 場東洋大戰係我地檔黎講唔會好似香港呢場咁有吸引力. 又未必有袋鼠仔跑, 冇既話佢地根本冇直播睇, 檔主問黎做乜呢? 一定係想賭果場, 賭乜呢? 連報名表都未出, 點賭呀? 唔通佢想出英國佬果隻antepost? 但係D東洋馬搵春買呀?

再諗深一層, 佢一定唔係想開antepost. 佢問我D問題, 根本唔係問我有乜野馬會跑, 或者問D馬既實力既問題. 佢係問我關於呢場馬會點跑, 有乜野特別既地方. 簡單黎講, 係關於呢場馬既環境因素同呢場馬既特色. 我比佢既email, 有一大部份係關於東洋跑道既track rotation問題. 呢樣野, 我知好少人會睇, 但係我幾年前已經試過係呢個話題上做功課, 所以搵番D野出黎交功課就好簡單. 最大鑊就係東洋馬場重建過, 幾年前有一D野已經唔再0岩用, 所以要即刻搵帶做過. 蝦仔贏果場馬, 如果係而家果個馬場上再跑一次, 蝦仔應該贏唔到.

去到好夜至收到老豆來電, 佢終於返得屋企. 佢已經想死但係都要打電話比我. 佢問左我好多關於東洋大戰既野之後, 話比我聽點解檔主要問我果D野. 有一個大客想買大B, 但係又唔想買1.3幾既野, 於是想我地受大B贏香港同東洋兩場大戰既過關孖寶. 檔主話死都受佢, 5.5倍. 我問老豆: 個賠率點黎? 老豆話唔知, 係檔主自己開既.

大B如果聽日贏得, 過到東洋一定冇4倍. 呢個5.5倍一定開高左. 當然, 照計呢個賠率仲有antepost賠率有既風險, 例如大B贏完唔去東洋之類. 檔主問我D問題, 顯然佢係計到: 大B應該贏唔晒兩場大戰. 除非檔主知道一D內幕野, 但係佢問得我咁多東洋場馬既野, 佢都有準備可能大B會去東洋跑.

我最唔明既係: 我地幾日黎都係講緊點樣走大B, 點解而家又受多D風險呢?

老豆點醒左我一樣野: 我地係開檔既, 唔好同賭仔一樣, 係一隻馬或者一場波上面定勝負. 呢個遊戲, 如果個賭仔同我地打持久戰, law of average會保證我地既贏面係高唱入雲. 老豆話: 冇錯, 大B係一個bad result, 但係我地有能力輸多好多隻大B. 你要盡能力做好你盤數. 盤數冇錯既話, 大B係唔值我地比出面既賠率, 即係話你既贏面係大既. 可能你聽日已經殺晒班友仔, 唔洗係度諗點樣買孖寶去補. 你點樣補法都補唔晒, 可能會越補越大鑊. 就算聽日大B贏, 我地買左好多時間返黎, 可以慢慢睇下點樣走左D孖寶佢. 你放心, D客一定會返黎再玩既, 佢地玩得開心既話我地一定有生意去做, 冇人會好彩一世, 就等如冇人會黑一世一樣. 呢場係我地開檔十年以黎, 投注額最勁既一場海外馬, 聽日記住幫大B以外既所有香港馬打氣.

喂, 我自己都係主力牛仔, 幫佢打氣冇問題. 要幫埋碌竹同好大波打氣, 唔係呀嘩?!?!?!

禮拜六, 同事係trading room博命, 我就可以自己入場享受賽馬, 真係勁開心. 大賽日trading room會勁緊張, 唔係好方便打電話過去問乜野環境, 都係聽日係獅城至打比佢地. 我地會全力咒死大B, 對面M記會全力咒死小宇宙.

場馬一過終點, 馬場D大B擁躉靜晒. 我估袋鼠國全部檔口都一齊開香檳慶祝. 身邊好友口痕話馬場市場部終於可以鬆一口氣, 我睇佢講得好0岩. 我地檔主唔止可以鬆一口氣, 似乎今晚會玩得好開心添. 繼續寫好多個服字比佢; 真係超勁.

第八場跑完, 我同朋友就飛的去機場. 入閘前, 朋友自己去左食飯, 我就坐低計一計自己既戰果. 牛仔跑出黎當然係good result, 最key係有幾口孖寶叫糊, 有兩條有成百倍, 心諗今年一定會係獅城贏錢返黎.