2005年5月13日於留言版上連載

呢鋪真係PK得好交關.

話說上個月果場世界大戰, 我地檔既檔主大戰前夕親自督師. 檔主出左名惡死, 成個trading room緊張過乜, 個個驚死係檔主面前犯錯. 我地受兩隻袋鼠仔係檔主既意思, 佢睇馬睇左咁多年, 對馬佢真係好有眼光, 我已經寫左好多個服字. 場馬入到直路我地已經胸有成竹, 係前面D馬對我地黎講全部都係good result. 冷不防馬仔突然發難, 唔知係咪知道下季冇得做法拉利個主帥, 佢走大圈都識得狂衝上黎. 好彩主隊既鯪魚球力抗馬仔既傷心客棧, 檔主同所有手足都封左阿杜做英雄.

上個禮拜六我準時交功課比我老豆(即係檔主下面負責國外賽馬既舵主). 有時我真係唔明佢點做呢個位; 明明大戰七日前開始call card, 佢就call card第一日至開始睇功課. (註: Call Card係檔與檔之間既trading, 係retail trading開始前開始做, 用黎比每個檔establish一D佢地想要既position) 好老實講, 我身邊都有兩三個朋友仔, 係世界賽馬上既認識唔會差過佢. 不過佢係trader出身, 明白bookmaker既角色係乜, 知道幾時要balance番D野, 唔會比個檔冒太大風險.

我比佢既功課其實係有兩盤數, 一盤係rating, 一盤係position. 通常計數都係得一盤rating數, 用rating就可以出probability, 有probability就可以出賠率, 有賠率當然就可以開檔. 大部份既賽馬都可以咁樣做, 偏偏我負責既世界大戰就唔得. 計數人可能會好唔同意咁樣既處理方法, 但係我地檔做呢D大戰都唔少; 如果次次都行rating可能我地檔唔會有今日. Position盤數係一個推測, 好老實講好多野係估計, 但係係要黎supplement rating盤數既不足.

老豆睇功課, 最主要就係要幫個檔建立好一個開retail之前既position. 兩盤數佢都可以用, 我所有supporting都做得好詳細, 我以為佢同兩個senior analyst會攪得掂, 諗住禮拜一至睇下初步環境點. 禮拜日晚老豆已經打黎, 個電話一響我都心知不妙.

我比佢果兩盤數, 我自己鍾意position果盤多好多. Rating係好objective既野黎, 做得好既話係勁有用, 但係rating都有佢既limitation; 要做quanlitative analysis時就好麻煩, 乜鬼都係咁make assumption, 都唔知個結果信唔信得過. 我交功課比老豆時都寫得好清楚, 叫佢要好小心, 呢場世界大戰唔係咁簡單. 最慘係同兩個大analysts做出黎既野好似, 佢好明顯係好信我D rating, 果晚我至知trading room trade左兩日都唔知我原來係有兩盤數既.

老豆同我講果晚既環境, 真係嚇死我. 雖然係檔既錢, 唔係我落袋既錢, 但係我已經知道老豆禮拜一同檔主開會會慘死. 好彩老豆講得好清楚, 完全唔關我事.
原來Call Card Day 1開波, 我地檔開大B1.8. 班trader仲未知死, 老豆又禮拜日唔返公司. 禮拜日晚老豆call我時, 大B仲係1.4比人係咁打. 果個range我地受左好Q多. 我問佢D人仲買乜, 佢話: 完全冇.

靜晒.

我地開檔唔係要估邊隻馬會贏; 事實上大部份時間我地係完全唔知邊個會贏. 香港馬會就係最完美既bookmaker, 完全唔洗理邊個會贏, 完全唔洗受風險, 但係又完全唔會有行家或者對手打佢. 我地呢D檔幾大都好, 熟客要買既話, 點都要受, 仲要比折扣. 如果唔受佢, 佢去左對面度買既話, 可能佢就永遠唔會返轉頭. 所以一定係受左先, 之後至用trader去走左D風險佢. 而且生意唔容易做, 如果好似馬會咁做perfect book(一盤全無風險既數)既話, 根本margin係好細. 所以有analyst既檔都會試下係某一D馬上面受多D風險.

但係唔係受大B囉.

禮拜一, 老豆話檔主叫睇定D先, 大B根本唔值呢個賠率, 遲D可能會有機會走貨. 班Sales周圍搵人買其他D馬, 夜晚比佢地搵到一個日本仔買日本馬, 係買是但一隻日本馬贏, 佢要三十倍. 個賠率係做到, 而且我地勁想搵人買其他馬, 老豆話同佢傾傾但點都要做佢生意. 最後個日本人廿四倍買左好Q多, 老豆仲未知死.

禮拜二有兩大件事發生. 第一件係勁好消息: 日本仔有一件發燒, 琴晚個大客變左廿四倍得番隻小宇宙, 我老豆以為掂晒. 第二件事係: 對面M記果日會開retail盤. Retail盤就係對街客既盤, 乜客都受. 對班trader黎講係好重要既事.

袋鼠國既盤口主要比四大檔瓜分. 除左我地之外, M記係傳統既大檔, retail盤永遠第一個出. S記球類運動強過馬仔, 同東南亞好多地下檔有路. B仔係新興勢力, 佢地近年積極發展大陸市場, 好多國內既錢出左黎都係去左佢地果度, 恨死我地檔主.

我同老豆講, 禮拜二M記開盤, 大B佢地最高開1.5, 最低1.35, 我估會低果邊居多. 結果我中到反轉: 大B1.35, 馬女6, 牛仔14, 小宇宙35. 日本仔另外果件佢地開101, 似乎佢地都收到風. 等我上個禮拜仲寫比老豆話隻所羅門係心水冷門, 一定要keep safe添. 老豆同trading果邊開會, 好唔好lock左一D小宇宙先, 佢地最後都係話睇多一陣, 冇鬼用.

又唔可以話老豆錯. 根據以往既經驗, M記retail盤係四十八小時內會走得好勁, D細檔會用佢地黎establish好佢地既position. 星期三左右個個都會開晒盤. 老豆話等到禮拜三先至算.

禮拜三, 老豆晨咁早打黎, 肯定係壞消息. 收到S記retail盤: S記既retail盤可以話係香港呢邊賠率既指標. 牛仔8, 馬女同小宇宙13, 人地都費事開所羅門. 大B呢?

1.14. 唔係呀嘛!?!?!?!? M記D賠率一D都唔郁, 大鑊. 根本冇人買其他野. 點算呀?

之後既事已經唔關我事. 檔主叫埋專做American sports個top trader, 同埋racing既兩大trader三個人輪班鎮守trading room至到禮拜六. 我地個position好差: 大B同小宇宙跑出黎都PK. 馬女同牛仔就幾好, 但係話晒我地係開檔, 冇理由有D咁差既position. D trader真係食晒屎. 大佬呀, 你睇番我份rating, 大B同小宇宙係邊? 點會受呢兩隻架?

Trading果邊盡力走小宇宙, 但係M記果邊根本受唔到太多, 買得多比佢地估到我地個position就仲麻煩. 大B個position我都唔知有乜野可以做. 連埋比熟客既折扣, 大B跑出黎既話真係賠到PK. 有個口痕既同事話禮拜三檔主開會唔知會唔會叫人買起大B佢. 當年Phar Lap都試過比人買起, 點知個神槍手樣衰衰, 射唔中. 我落機鋪搵個玩射槍機既金毛強可能仲勁D.

個key係點樣可以買到大約1.8倍既大B. 老豆諗到一條橋: 買孖寶. 今個禮拜其實係有三場馬有袋鼠跑既: 香港, 英國同新加坡. 禮拜三晚跑完馬, 乜電話都唔聽, 因為要通頂做晒兩場馬比老豆今朝開會用.

英國果場馬, 雖然隻袋鼠仔輸梗, 但係呢D季初大賽, 我點睇都買唔過. 勁果D全部都係今季初出, 有季初form果D係G2G3馬, 又好似會唔夠跑. 我地而家要做一D好有把握既野, 唔係好得. 新加坡果場好好多, 實力應該係四大高手玩晒. 檔主叫check下M記呢場D盤我地有冇野可以做到, 點知一D驚喜都冇: 堅尼4.5, 朗尼6, 簡尼7, 科東尼5. 同M記傾過孖寶大B落四大高手做唔做到我地要既賠率. 佢地話做唔到, 買三隻就得. 老豆知我最唔鍾意簡尼, 問我夠唔夠膽唔要簡尼.

我同老豆講: 個問題唔係咁簡單. 隻袋鼠應該香梗, 問題係另外果幾隻野. 科東尼隨團有一隻電兔, 會同隻Rambo一齊狂放. 簡尼唔會可以好似上年咁樣放法, 但係唔表示簡尼會死; 佢應該會做到守係佢地後面, 入直路至同你玩. 最麻煩係落雨: 我都未見過果邊落雨個地會點. 我以為D電兔會攪到場馬利追, 但係場雨會唔會變到利番前領呢? 好多隻馬我都唔知跑落雨會點. 隻木村睇種好有可能會見水即生. 萬一大B贏跟住呢場爆咁點算?

靜晒.

聽日馬會開盤lu. 時間越黎越少, trading room已經冇乜野可以做到. 星期六個即場賠率好難估, 唔好問我. 呢個禮拜六日我會開開心心睇跑馬; 大B贏既話我會高聲歡呼, 話之我老豆同檔主嘔白泡.