講真, 已經好耐冇買過波. 一來係大陸做野冇波睇; 二來自己自問唔係好有心得賭波點至贏到錢; 玩玩下當然冇乜問題. 幾個月前, 有個朋友介紹佢一個朋友比我識, 條友多年黎有野唔去做, 日日係屋企研究賭波, 又幾得意. 同佢網上聯絡左幾個月, 都算好好傾, 似乎佢死都唔信世界上有人職業賭馬, 所以佢對我同我認識既人好好奇. 今日大家都得閒, 約左出黎飲野.

估唔到佢係正忠香港人, 本來以為點都會鬼鬼地. 第一次見面, 點都有少少”小心D, 唔好亂信佢”, 網上好傾係另一件事. 不過傾左一陣已經發覺: 呢條友一D都唔簡單. 起碼佢唔會同我講”長買邊隊有著數”之類D低能野.

一路以黎, 自己對波有一樣野諗唔通. 一個馬會攪賽馬, 馬會係彩池度抽水, 其他D錢就比D勝利者瓜分. D錢既分佈係賠率機上面一清二楚(外圍另計), 自己既對手係邊個都好明顯. 波就唔同, 賭波公司set賠率, 賠率隨著D錢既流動而浮動, D賭仔當然唔會理咁多, 有得賭就照買. 但係所有bookmaker都係通過trading黎賺錢. 個賠率有幾真(即究竟係唔係真係反映隊波既真實贏波機會), 我都好有懷疑. 簡單黎講, 我買波果時, 我唔係好知我買緊乜, 同唔係好清楚我係同邊個人對賭緊. 我中左既話, 我唔知我究竟係好彩定係我睇度D野. 賭馬唔同, 彩數一定有, 但係我好清楚我唔係賭緊自己既運氣.

我同呢條友提出呢個問題, 點知佢一點就點出個問題既徵結所在, 佩服佩服. 好彩我都冇諗錯, 不過要考慮多少少野. 同佢傾完計, 自己對賭波既睇法有D唔同左, 又好有衝動要試試佢. 不過再理解一下佢宜家要做既野, 嘩……. 點打低呢條友呀? 都好, 起碼知道: 我地睇馬就要狂睇帶, 但係佢就唔洗日日狂睇波. 唔係唔洗睇, 係唔會有時間睇. 一日十場馬, 每場得分幾鐘, 都要攪咁耐, 一場波九十分鐘, 點睇呀?

當然, 我唔會白白拿佢D野. 佢話佢有諗過試下玩馬, 但係諗唔通一個問題: 水位. 當佢理解到跑馬抽水起碼十幾二十percent, 佢就諗唔通點解有人會職業賭馬. 唔好怪佢, 佢賭開波當然接受唔到. 到我出場點醒佢…….

就係咁, 我同佢係幾個鐘裏面, 就由未見過面既網友變成勁friend既朋友. 臨走前, 佢問我: 其實宜家香港馬咁多人賭, 究竟仲有冇拉馬? 我答佢: 宜家英超都好多人賭, 你話英超仲有冇假波? 大笑, 大家心照啦. 咁快已經唔講都明, 勁.

飲完野, 佢有佢繼續工作, 我有我繼續忙碌. 但係有一樣野大家唔洗講都明白: 我同佢買波都一定唔會買落馬會度. 唔洗問亞貴.