話說跑馬前一日, SD問我馬騮今日有冇比電話我; 我之前己經同佢提過馬騮次次出賽前都會問我點睇.  我答番SD: 今日就冇, 但係早在禮拜一佢己經比左電話我, 鬼死咁緊張.

其實早係上次跑細場之前, 馬騮就己經同我提過話跑完上次細場之後, 就會走過黎大場跑呢隻盃.  上次係細場己經精彩萬分; 隻馬騮我自己一亳子都冇買, 同馬騮傾電話我己經同佢提過話隻糕點係最大對手, 老實講我都幾有信心糕點可以比到馬騮好大壓力, 同埋最緊要係糕點會好好分.  入直路前糕點己經針對性咁企正係隻馬騮前面, 如果一轉入直路入面貼住條欄有一個位, 糕點就會攞左個位等馬騮追佢.  發生左乜野事大家都知道我唔再多講, 果場馬一跑完我幾個朋友仔即刻係MSN衝出黎狂小個後生仔.  大部份都係買左比個後生仔阻到亞媽都唔認得果兩隻馬既單Q, 唉.

攪成咁我都唔想主動揾馬騮住, 等佢冷靜下先.  成個禮拜冇收過佢既電話仲以為佢真係冷靜番晒, 點知睇番馬會網頁至見到佢同馬會投訢個司機單野.  果單野我唔知得比你多, 呢D野好難問出口.  我睇完個新聞稿唯一既反應就係: 希望呢單野唔好成為一個先例; 如果以後個個主人遇見D咁既事就同馬會投訢要開庭審理既話, 馬會真係特登開多一個部門專門做呢D投訢都得.  其實係個圈子發生呢D咁既事真係大L把, 邊有得投訢架.

其實次次接到馬騮呢D賽前既電話都幾煩, 問我佢果隻亞茂都知會熱到得番1.x倍既馬機會如何, 點答喎?  今次好D, 得四隻馬跑但係馬騮應該唔會係大熱門, 可能場面冷清清佢都費事問番我同一個問題.  佢同我八卦一下佢今次打算點做:

一,  換左司機 (講真, 預左)

二,  一早同個新司機同馴獸師肥仔開定會講策騎指示: 跟住駝背佬隻不敗之師屁股入直路, 跟住拉出黎試下衝贏佢

三,  成個會議錄晒音

最正係最尾果part, 難得肥仔同個司機又肯陪佢玩.  我將馬騮同我講既野係MSN同幾個老友記提過, 個個都笑到碌地, 咁都得.

其實早係禮拜一馬騮比電話我之前, 我己經比過電話波波; 啱啱係呢場馬跑之前果個禮拜冇週中賽事, 波波飛左去獅城放假.  我打比佢既時候, 佢啱啱同條囡入緊去遊樂場玩.  話雖如此, 波波知道我有緊要野揾佢, 都停一停低聽左我講乜先:

“黎緊禮拜日會有十一場馬, 第一場馬將會只係得四隻馬跑, 一號馬肯定會跑第一, 二號馬肯定會跑第二; 有少少可能性會係二號跑第一一號跑第二但係我睇機會好微, 但係無論如何三號四號一定唔會跑入黎, 一二Q係中梗.”

排位都未出但係我講到咁肯定, 波波覺得好神奇, 我大約解釋過點解三號同四號係點都唔想跑贏一號同二號, 佢就信到我十足十.  特別係我同佢講清楚:

“一號W披幾本上都中梗, W應該得十個零五, 披得十個零一, 但係最穏其實係條Q, 會得十個零五但係你千祈唔好食晒佢博佢死, 冇得博架.  好早就會有人開始想買一號W披同一二Q, 你諗諗點樣做啦.  唔好見佢熱博佢死呀, 冇得博架.”

我係打電話比佢講呢番說話之前, 己經反覆諗過會唔會跑四-三-二-一出黎.  點睇都應該唔會, 我應該唔會有生命上既威脅.  波波收線前講左一句: ”多謝你”, 我回味左好耐.  成件事過晒之後, 問番波波D伙記佢點做: 原來佢唔單止同所有伙記講明唔受頭場一號W披同一二Q, 佢仲叫個仔不斷打電話比D唔識死既行家, 排位都未出之前就少少地少少地咁買定呢兩樣野, 好多行家放緊假又冇刨馬都上左佢當, 比佢執左唔少.  原來”多謝你”係咁樣解.

同一日, 阿加汗同埋碌七呢D老友記己經問定呢場馬我地會點做, 個個都想排定隊執錢, 連黑柴都話我地照做既話麻煩預埋佢一份; 我同老板開過會, 傾過調整一下呢兩樣野既折扣, 真係唔好意思, 平時我都盡量幫朋友仔但係今次真係幫唔到, 幾個朋友仔聽到個價錢都話算數, 玩後面D場次算.  希望大家會明白, 其實呢D場合我地係好難做; 老板話如果個個賽馬日都有呢D賽事, 我地檔口都應該好快趣會執笠.

賽事當日, 碌七一早就同馬騮等人入左場, 佢跟埋馬騮落沙圈等睇馬騮戲.  碌七同我傾計傾得多己經開始明白個遊戲實際係點玩; 其實馴獸師同司機係一定唔會去到沙圈至開始傾場馬應該點做, 係果度發生既野只係做比個主人睇.

碌七冇帶DV或者錄音機落去沙圈, 佢用佢最大既能力同記憶力重組番係沙圈發生既事情比我聽; 所以你睇以下既對話既時候要明白, 呢D未必係最真確既記錄, 可能同實質既對話會有少少出入, 但係碌七想表逹既意思就應該係非常真確:

司機行出黎見到馴獸師肥仔:

司機: hi, 呢場馬你想我點做?

肥仔: 出閘之後跟係不敗之師後面一個馬位, 留係佢外面唔好走入去.  入到直路就拉出黎試下衝唔衝得贏佢.

司機: 如果步速太慢, 你想唔想我放頭走?

肥仔: 唔好放, 我諗不敗之師會放頭走, 你比佢放, 跟係佢後面一個馬位.

司機: 咁如果不敗之師唔放, 比杏仁果兩隻或者是但一隻放頭, 咁你想我點做?

肥仔: 我諗杏仁果對唔會放, 但係如果佢地放都唔會夠我地跑, 唔好理佢地, 照跟番係不敗之師後面一個馬位.

司機: 意外既野好難講; 如果隻不敗之師勁漏閘係後面, 咁我點做好?

肥仔: 得幾丁友仔跑好少會漏閘, 但係就算係咁冠軍都一定會比隻馬好快趣走番上黎, 你照跟番係佢後面一個馬位.

司機: 咁如果不敗之師狂放, 放得超快呢?

肥仔: 千祈唔好比佢走甩, 唔係就會好難追到佢, 一定要跟係佢後面一個馬位.

碌七見佢地講黎講去都係講緊同一樣野, 冇乜意思, 忽然拉埋肥仔一邊問佢點睇佢第六場隻新馬.  碌七問佢有邊隻係對手, 點知肥仔答佢: “咁場場我隻馬都有十三隻對手既……”  碌七覺得好無癮, 覺得肥仔有少少寸佢既感覺, 心裏面諗第日到碌七做主人既時候, 死都唔會放隻馬係肥仔度.  後來去到第六場, 佢就同肥仔隻馬對賭, 重鎚駝背佬中到正, 大快人心.

司機又捉番肥仔返黎, 原來佢仲未問完.

司機: 入到直路你想我幾時比隻馬走?

肥仔:  唔好太早比隻馬走, 細場條直路冇呢度咁長, 太早比我驚佢最後會冇, 你留到三百左右至比佢走.

司機: 如果隻不敗之師放得快左, 你想唔想我留多D力遲D至開始發力追佢?

肥仔: 馬騮係一隻好馬, 佢會比到你既, 你唔洗特登去做一D野去就佢, 三百左右比佢就ok.

司機: 我睇得幾丁友跑, 步速唔會太快, 如果係咁大家係直路頭就會走埋一堆, 咁你會唔會想我早D走甩佢地?

肥仔: 唔好, 馬騮衝刺力強但係力短, 太早比我睇唔係咁好, 我睇三百左右比就應該啱啱好.

打鐘上馬, 根據碌七既觀察, 馬騮好滿意馴獸師同司機既策略.  碌七行番上沙圈, 見到隻馬騮個披有成十二個幾十三蚊, 己經完全唔記得晒會有囚徒困境, 買左一個超級無敵巨形披落馬騮度.  淨係波波自己一個人都係馬會一開機做生意時買左接近七位數落不敗之師個披度啦, 馬騮披實會好分一陣間, 但係到現場點會仲有人買不敗之師披喎?  反而好似碌七咁, 以為買馬騮披著數過買一二Q所以瞓落去既人就有唔少.  跑到直路既一半碌七嚇到鼻哥窿都冇肉; 好彩昌哥都仲記得策騎指示, 千祈唔好跑贏前面果兩隻啫.

第日唔知會唔會見到D司機同馴獸師帶埋自己御用既律師落沙圈度呢?